Read Chang Naga EZEKIEL 1 Bible Online

EZEKIEL 1 - Chang Naga bible

EZEKIEL 1

¹Po khujin boubü, lit leiboubü, chalou ngaobounyet Kebar shumang nyangko thüngbü shu- ong yoa kijinei müh ipan ngei Mühghaüeibü mangsang hapbei.

²Lit ngaoboubü, Jehoiakhin Choba langsenbü po ngaoboubüa;

³Kebar shumang nyangko Khaldibü kaonyeka Buzeibü shou Ezekiel ungshedbou jungto BUNYUBOUeibü ngüh shangashatko loukei, hoba BUNYUBOUeibü ik hao thüka kikei.

⁴Hobaje ngei chühkei, hoba chühashi, yeithu yeinak yungkük aeka sangmei yaangbü, kho danko langpon hoba kho kaijembo shaüshaü ponponbü hoba kho jenyua nam tegü jajalalatham hauan kikei.

⁵Hobaje kho yoa lang kibü meisiau lei phatko hapbei. Khübü chühla hai kikei, haoen kho chühla hesihaang kho müt phatko kikei.

⁶Hobaje haoen weko thenyek leibang yembei hoba haoen weko kaak leibang kikei.

⁷Haoeneibü you tangsheibang kikei, hoba haoen la masueibü hak tegü yeman kikei. Khübü kho samenbü chinam tegü ponyokei.

⁸Hobaje haoeneibü hip leia haoeneibü kaak phanga müteibü ik yeman kikei. Khübü lei pendou la thenyek si kaak yeman kikei,

⁹hoba haoeneibü kaak cheei che to meiyouko kikei. Khübü weko lulu lam to thedangae tangshaitham haukei; haoen haujinei haoeneibü thenyek asepei.

¹⁰Khübü leieibü thenyek chühla hai kikei: haoen lei weko la müteibü thenyek yeman kikei, hoba maiaenei haoen lei weko la molosaonyueibü thenyek yeman kikei, hoba haoen lei pendou la nanaenei masu pongsu thenyek yembei; haoen lei pendou la tokei aulueibü thenyek yeman kikei.

¹¹Haoeneibü thenyek kho khei yeman kikei. Haoeneibü kaak shuong thükaeto pinan kikei; haoen weko la kaak penyi bang, cheei che to anyoan, hoba penyiei haoeneibü mang küplepan kikei.

¹²Hobaje haoen weko thedang aeto tangsheitham haukei. Soushouei lae aeto haumang sühkei, thi aeto haoen haukei, hoba haujinei haoen asepei.

¹³Hobaje lang kibü meisiau yoa che chühla wanthung phatko kikei. Wan kho meisiau shuong yoa hau longei dogo shoongaiko kikei; hoba wan kho ngesaktham hoba khüka langpon longkei.

¹⁴Hobaje meisiau shuong kho langpon ponbü tegü wenjung hau hoba longei dogo kikei.

¹⁵Tou lang kibü meisiau shuong to ngei chühsi, thenyek leibang yembü meisiau weko shanga tongjinyou che bang kaoa tenan phobü ngei hapbei.

¹⁶Tongjinyou son hoba kümsembü hai kikei: Haoen kho yasangle lailaibü namseklaang tegü kikei, hoba khübü lei pendou chühla jeteitham kikei. Khübü kho tongjinyou che maanga tongjinyou che thenyoan kümbü phatko kikei.

¹⁷Haoen haujinei haüpangteiko kaophei lei ka meisiauei chühko kibü aedang to hauko lekei; hoba haoen haujinei khübü asepei.

¹⁸Hobaje tongjinyou kaijembo kho lounyu hoba hatlabü hoba khübü lei kaijembo nyekei shenan kikei.

¹⁹Ladang lang kibü meisiau shuong meimeikei, tongjinyou shuong khokei haoen yoa haukei, hoba ladang lang kibü meisiau shuong kho kao ka tonenkei tongjinyou shuongkei tonenkei.

²⁰Laeto ong soushou shuong meimeilaje haoen haukei, hoba tongjinyou shuong kho khübü yoa tonenkei, aishanga soushou kho lang kibü meisiau shuong tongjinyou yoa kikei.

²¹Ladang ong meisiau shuong haulaje khübükei haukei hoba haoen lojinei khübükei lokei, hoba haoen kao ka tonenjinei tongjinyou khübükei haoen yoa meimeikei; aishanga soushou kho lang kibü meisiau shuongeibü tongjin yoa youa thonan kikei.

²²Hobaje lang kibü meisiaueibü khua müha kibü peisilei onshaibü phatko hatlamoklabü ninthu laang son phatko haoeneibü khu thükaenei longan kikei.

²³Hobaje onshaibü phang khünei haoen nyangko kaakshuong khoei nyibou meisiau khüto meiyouan kikei, hoba lubü penyi khoei mang yuklepan kikei.

²⁴Hobaje ladang haoen haukei haoeneibü kaak ngühbü kho dei yaang koubü langh tegü ayingsi, pendou Thükenboueibü langh, khei lakjaibü tan yaang lemenbü langh tegü ngei ditkei. Ladang ong lokei, haoenei haoeneibü kaak shuong kho lottikei.

²⁵Hobaje haoeneibü kaak shuong lottian lojinei thükaenei haoeneibü khua onshaibü kibü thük ka ngühlang che longkei.

²⁶Hobaje haoeneibü khu thüka kibü onshaibü thükaenei chühla safir laang phatbü Choba setshang tegü kikei, hoba kho thüka müt che phatko kikei.

²⁷Hao chühla shenjang ka thükae ngei son lailai chinamkung denche tegü hapbei, hoba khüka jaüan phangae kho wan maimai hapbei; hoba sonlailai ngesakei hao kaijeman kikei.

²⁸Lang loubü chaloua sangmeia yepukshangjep tegü hao kaijembo sonlailaibü hapbei. Kho BUNYUBOU soneikangbü phatko hesihaang kikei. Ladang ngei kho hapbei, ngo the khüman tuongkei, hoba cheei joyobü langh ngei ditkei.