Read Chang Naga EZEKIEL 10 Bible Online

EZEKIEL 10 - Chang Naga bible

EZEKIEL 10

¹Kheijinei ngei chühkei, hoba kaakyembü kherabim thükaenei kibü müh onshaibüa sapfir laangei kümbü tegütham Choba setshang phatbü che hapbei.

²Hobaje inyaibü nei neibü müt to Mühghaüei haoei laukei, “Kaakyembü kherabim phanga tongjinyou kanglang to atashi. Kaakyembü kherabim kanglang ka wankak yasebüei kaibü ik penyi ham shentiashi hoba khübü kho sangnyua phinashi.” Hobaje ngei hapbo hao atkei.

³Tou müt kho atjinei kaakyembü kherabim Lembüchem yungthang aenei loan kiteikei, hoba sangmeiei maangkabou shemjang kho shenkei.

⁴Hobaje BUNYUBOUeibü soneikangbü kaak- yembü kherabim ka angkei hoba Lembüchem to atshang thüka lokei. Sangmeiei Lembüchem shenkei, hoba shemjang kho BUNYUBOUeibü soneikangbüei shenan kikei.

⁵Hobaje Thükenbou Mühghaüei joyojinei ngüh longbü tegü, kaakyembü kherabim kaakeibü langh kho shemjang thükkaboua sühko ditkei.

⁶Hobaje ladang haoei nei inyaibü neibou müt to, “Tongjin- you kanglang ka, kaakyembü kherabim ka wan sungashi,” dogo lauko sakkukei, müt kho atkei hoba tongjinyou thedanga lokei.

⁷Hobaje kaakyembü kherabim yoa cheei haoeibü ik khübü yoa wan kibü aeto shingkei. Haoei kho sungkei, hoba inyaibü nei neiboueibü ika kho jinkukei, hoba haoei kho sungkei hoba satkei.

⁸Hobaje kaakyembü kherabim la haoeneibü kaak phanga müteibü ik phatko yeman hapkei.

⁹Hobaje ngei chühkei, hoba kaak- yembü kherabim nyangko tongjinyou lei, tongjinyou che kho kaakyembü kherabim che bang nyangko kikei; hoba tongjinyou kho chühla khrisol namseklaang son phatko kikei.

¹⁰Hobaje tongjinyou che chenei kibü tegütham khübü lei pendou chühla phatyoko thenan kikei.

¹¹Ladang haoen haukei, haoen lei pendou lulu kaoen lei aeto haukei, lausikei khuei chühko leibü ae khüto haoen phai semjung haukei, hoba haoen haujinei asepei.

¹²Hobaje haoeneibü mang khümbo, haoeneibü shenjang, haoeneibü ik, hoba haoeneibü kaak hoba tongjinyou lei yoan khümbo nyekei shenan kikei.

¹³“Tongjung haubü tongjinyou shuong,” dogo ngako ngei ditkei.

¹⁴Kaakyembü kherabim weko thenyek leibang yeman kikei: Shaangboubü kho masu pongsueibü thenyek, nyiboubü kho müteibü thenyek, semboubü kho molosaonyueibü thenyek, hoba leiboubü kho aulueibü thenyek yeman kikei.

¹⁵Hobaje kaakyembü kherabim kho sengjung angkei. Khübü kho ngei Kebar Shumang nyangko hapbü lang kibü meisiau shuong yingan kiteikei.

¹⁶Hobaje ladang ong kaakyembü kherabim meimeikei, tongjinyou shuong haoen yoa haukei; hoba ladang kaakyembü kherabimei kao ka pilangla kaak sengkei, tongjinyou shuongkei haoen yoa thonlangkei.

¹⁷Ladang kaakyembü kherabim lokei, khübükei loan kikei; hoba ladang haoen pila khangkei, khübükei haoen yoa haukei, aishanga lang kibü meisiaueibü soushouei haoen leikei.

¹⁸Hobaje BUNYUBOUeibü soneikangbü Lembüchem koukhün atshang ka satkei, hoba kaakyembü kherabim thüka lokei.

¹⁹Hobaje kaakyembü khe- rabimei haoeneibü kaak tonenkei hoba ngei hapbo kao ka pilangkei, hoba haoen haujinei tongjinyou shuongkei haoen yoa haukei. Haoen BUNYUBOUeibü Lembü- chem chanyu angbou koukhün to atshanga lokei, hoba Israel Mühghaü soneikangbü haoen thüka kikei.

²⁰Khübü kho ngei Kebar Shumang nyangko Israel Mühghaü phanga hapbü lang kibü meisiau shuong kiteikei, hoba haoen kho kaakyembü kherabim dogo ngei damenkei.

²¹Che che weko thenyek leibang hoba kaak leibang yeman kikei hoba haoeneibü kaak phanga müteibü ik phatbü kikei.

²²Hobaje haoeneibü thenyek kho ngei Kebar Shumang nyangko hapbü thenyek shuong phatan kikei. Meisiau weko theae tangshaitham haukei.