Read Chang Naga EZEKIEL 11 Bible Online

EZEKIEL 11 - Chang Naga bible

EZEKIEL 11

¹Kheijinei soushouei ngo tonenkei, hoba chanyu angbou ae yeian kibü BUNYUBOUeibü Lembüchem chaangbou bakhün to ngo leian loukei. Hobaje bakhün atshang khonei müt saoto ngao ngei hapbei, hoba haoen yoa Azzureibü shou Jaazania si Benaiaeibü shou Pelatia, dogo mütli khuleibou nyi yoan ngei hapbei.

²Hobaje Mühghaüei kü to laukei, “Müteibü shou, habü mütshuong ho sangnyua kümthen amaibü huonbü shuong hoba songsido amaibü kubü dan ki.

³Haoenei lauda, ‘Chem dangla sen shanga ho jih tükdebü aying lo? Ho sangnyu shikchak che ki, hoba sen phe ki.’

⁴Hibü haoen yuktiko tetenashi; tetenashi, O müteibü shou.”

⁵Hobaje BUNYUBOUeibü soushou kü thükto lotkei, hoba haoei kü to ho lenshi laukei: “BUNYUBOUei hai lauda: Kanei, O Israel chung, dogo lauda, lausikei kaneibü maangpon to ai lotda hoba kanei ai huongda kho ngei ngeakei.

⁶Kanei ho sangnyua juong haitia hoba haibü mangei khongnyu shenakei.

⁷“Hibü Thükenbou BUNYUBOUei hai lauda: Maimaitham ho sangnyu shikchak ki hoba kanei haitibü shuong kho phe ki; lausikei kan hanei akilabü, aishanga ngei kan tekan aplabü.

⁸Kan in to hatda sai? Ngei kan shilabü müt yoa inlou sungbalabü, dogo Thükenbou BUNYUBOUei lauda.

⁹Hobaje ngei kan sangnyu ka sungenlabü, hoba küksithangeibü ik to khümbo kulabü, hoba kan thükto matjem hautilabü.

¹⁰Kan inei tuonglabü ngei kan Israel leikhu leidang pendoua matjemlabü. Kheijinei kanei ngo BUNYUBOU ki dogo ngelabü.

¹¹Ho sangnyu kan shanga chak ayinglabü ayingsi kho maanga kan phe ayinglabü; ngei kan Israel leikhu leidang pendoua mat jemlabü.

¹²Hobaje kanei ngo BUNYUBOU ki dogo ngelabü, aishanga kanei ngeibü ngühkhüm deikhüma apai, ayingsi ngeibü sakkubü ajungei, lausikei kan kaijembo kibü phang shuongeibü haangphai lamphai sembei.”

¹³Ngei thusei ngüh lauko kitoua Benaiaeibü shou Petalia haikei. Kheijinei ngei ngeibü the kaoae khümbei hoba ngüh yaangbüei ngekkei, “Aiwaü, BUNYUBOU Mühghaü! Nyi jouletbü Israel khümbo shemtilep lo?”

¹⁴Hobaje BUNYUBOUeibü ngüh kü jungto louko laukei,

¹⁵Haoei laukei, “Müteibü shou, kaibü jaisinasi shuong, khei kaibü chem- pen shuong, kaibü thenbülenbü shuong hoba Israel chung pendou shangabü Jerusalema kibü shuongei lauda, ‘BUNYUBOU to lemla shanga haoen saako hauakei. Haoei sen la ho kao kimla kuakei.’

¹⁶“Hibü lenashi: Thükenbou BUNYUBOUei hai lauda: Ngei haoen saabü to hautiasikei hoba haoen phangshuong kaodak hoba kaonyeka phinnyintiasikei, haoen hauan kibü kaodaka haoen thedanga longche shanga ngo haoen shanga saoposhang kiteikei.

¹⁷“Hibü lenashi: ‘Thükenbou BUNYUBOUei hai lauda: Mütshuong yoka ngei kan leishailabü, hoba kan phinnyinan kibü kaonyek pendou ka kamshaitilabü, hoba ngei kan la Israel kaodak kungailabü.’

¹⁸Hobaje haoen khüto longeilabü, hoba haoenei lejim akibü heangsho pendou hoba mangsenlabü pendou khüka sungan aplabü.

¹⁹Hobaje ngei haoen la maang- pon haanbü che, hoba soushou haanbü che kulabü; ngei haoeneibü maangpon ka laang phatbü maangpon sungan apbulabü hoba ngühalebü maangpon kulabü.

²⁰Kheijinei haoenei ngeibü takletbü ngühkhüm phai semlabü hoba ngeibü ngühkhüm deikhüm jungeilabü. Kheijinei haoen kü mütli yinglabü, hoba ngo haoeneibü Mühghaü yinglabü.

²¹Lausikei aoyouei haoeneibü maangponei amaibü kümsilei shuong hoba mangsenlabü heangsho shuong phai semtida, ngei haoenei kümbü haoeneibü khu thükto sungbakulabü,” dogo Thükenbou BUNYUBOUei lauda.

²²Kheijinei kaakyembü kherabimei haoeneibü kaak tonenkei, hoba tongjinyou shuong kho haoen yoa thonan kikei, hoba Israel Mühghaü soneikangbü haoen thüka kikei.

²³Hobaje BUNYUBOUeibü soneikangbü sangnyu ka maukei hoba sangnyu chanyu angbou aenei kibü shongh thüka lokei.

²⁴Hobaje Soushouei ngo tonenkei, hoba Mühghaü Soushouei mangsanga langsenbü shuong jungto Babilon to ngo leian lotkei. Kheijinei ngei hapbü mangsang kho kü ka angan apbei,

²⁵hoba ngei BUNYUBOUei kü la lenbü pendou langsenbü shuong to lenkei.