Read Chang Naga EZEKIEL 12 Bible Online

EZEKIEL 12 - Chang Naga bible

EZEKIEL 12

¹BUNYUBOUeibü ngüh kü jungto loukei:

²Haoei laukei, “Müteibü shou, ngüha alebü phangshuong yoa kida. Haoen la haplabü nyek yemakei lausikei ühüpda hoba ditlabü nou yemakei lausikei aditda, aishanga haoen ngüha alebü chung ki.

³“Hibü, O müteibü shou, satbümaubüeibü on che tegü lamleashi, hoba haoenei hapbo chaloua satashi, kaoen che ka kaoen che to haoen thedanga no langsenbü che tegü hauashi. Aingenyu haoen lenbü aditbü chung yingasikei haoenei ditenlakei thükkei.

⁴Hobaje nyi kaibü on chaloua haoenei hapbo langsenshang to haula shanga künlebü kho sungba. Hobaje nyi chasem haoenei hapbo mütshuong thüngshang to haubü tegü no lolo hauan lenshi.

⁵Haoenei chühko kijinei nyi kümthanga khün yettiashi, hoba nyi künlebü on kho danko langashi.

⁶Kaibü on kho haoenei hapbo kaibü phaka künenashi, hoba kho nakthüh phanga, khei nyi kao ühüplabü lele kaibü thenyek küplepan künlangashi, aishanga Israel chung thedanga ngei no tetsida che yeitida.”

⁷Hibü BUNYUBOUei kü to lenbü tegütham ngei kümbei. Chaloua langsenbü shanga künlebü on ngei künbakei. Hobaje chasem ngeibü ikei kümthang paithetko thuyetkei. Hobaje müt pendouei hapbo ngei kho nakthüh phanga ngeibü phaka künan satkei.

⁸Ngeyang BUNYUBOUeibü ngüh kü jungto loukei:

⁹“Müteibü shou, tubüsekbü Israel chungei ka to, ‘Nyi ai kümda’ dogo alau lo?

¹⁰Haoen to lenshi, ‘Thükenbou BUNYUBOUei hai lauda: Ho tetsida Jerusalema yaangenbü hoba khünei kibü Israel chung shangabü ki.’

¹¹‘Ngo kan shanga tetsida che ki,’ dogo haoen to lenshi. Ngei kümbü tegütham haoen to kümlabü. Haoen satbümaubü hoba langsenbü yeilabü.

¹²Haoen yoa kibü yaangenbouei haoeneibü on phaka tonlabü hoba nakthüh phanga haulabü hoba haoei kümthang paiko thuyetlabü hoba kho danko anglabü. Haoeibü nyekei kao ühüplabü lele haoei haoeibü thenyek yukleplabü.

¹³Ngei ngeibü tak hao la seilepbulabü, hoba hao ngeibü taka minlabü; Khaldibü kaodak Babilon to ngei hao leian loulabü, khei yingasikei haoei kho ühüplabü hoba khünei hao hailabü.

¹⁴Hobaje hao to thuilabü shuong hoba hao kaijembo kibü khangenbü tan pendou ngei yeia pendou ae aatilabü, hoba ngei haoen in jungan shieilabü.

¹⁵“Ladang ngei haoen phangshuong yoa lintilaje hoba kaonyek pendoua phinnyintilaje, kheijinei haoenei ngo BUNYUBOU ki dogo ngelabü.

¹⁶Lausikei haoen lae aeto ong haulaje phangshuong yoa haoeneibü mangsenlabü kümsilei shuong shedbü nathekula shanga ngei haoen shisho mühsinou ka hoba limsilang ka khümenlabü, hoba haoenei ngo BUNYUBOU ki dogo ngelabü.”

¹⁷Tokei BUNYUBOUeibü ngüh kü jungto loukei:

¹⁸“Müteibü shou, kaibü nyak lühjilühko shauashi, hoba hatbü ka kaibü dei nyaakeiko yungashi.

¹⁹Hobaje kaonyek kabü mütli shuong to lenashi: ‘Jerusalema hoba Israel kaodaka kibü shuong shangabü Thükenbou BUNYUBOUei hai lauda: Haoenei lulueibü nyak lühjilühko shaulabü hoba hatbü ka haoeneibü dei nyaakeiko yunglabü,’ aishanga khonei kibü pendou ik shatyobüei haoeneibü dei kaonyeka kibü khümbo aaklanglabü.

²⁰Müt kibü sangnyu shuong tekan aplabü, hoba kaonyek sangliphang la yeilabü. Kheijinei kanei ngo BUNYUBOU ki dogo ngelabü.”

²¹BUNYUBOUeibü ngüh kü jungto loukei:

²²“Müteibü shou, ‘Chalou shuong welangda, hoba tetenbü shuong aloushadda,’ dogo Israel kaonyeka lauyobü kaneibü tetenbü ngüh kho ai?”

²³Hibü haoen to lenshi, “Thükenbou BUNYUBOUei hai lauda: Ho tetenbü ngüh ngei thontikulabü, hoba touje haoenei Israela ho tetenbü ngüh ajungeilabü. Aeiko haoen to hai lenshi, ‘Mangsang weko loushadlabü chalou khama nyanga!’

²⁴“Aishanga touje Israel chung yoa amlangbü mangsang hoba suletjaletbü shambülebü thusei ngüh lauyobü akilabü.

²⁵Lausikei ngo BUNYUBOUei haoen to joyolabü, hoba kho aphaiko loushadlabü Aishanga kaneibü chaloua, O kan tubüsekbü chung, ngei laubü ngüh pendou loushadlabü, dogo Thükenbou BUNYUBOUei lauda.”

²⁶BUNYUBOUeibü ngüh kü jungto loukei.

²⁷“Müteibü shou, chühashi, Israel phangshuongei lauda, ‘Haoei hapbü mangsang kho loulabü posilit juong shanga ki, hoba haoei jih lounyu shanga tetenko lauda.’

²⁸Hibü haoen to lenshi, ‘Thükenbou BUNYUBOUei hai lauda: Touje ngeibü ngüh che ongkei aphailabü; ngei laubü ngüh pendou loushadlabü, dogo Thükenbou BUNYUBOUei lauda.’ ”