Read Chang Naga EZEKIEL 13 Bible Online

EZEKIEL 13 - Chang Naga bible

EZEKIEL 13

¹BUNYUBOUeibü ngüh kü jungto loukei:

²“Müteibü shou, tou tetenko kibü Israelbü thuseibü shuong khulimbo teten- ashi. Jembü maang ka bakbü thusei ngüh laubü shuong to hai lenashi: ‘BUNYUBOUeibü ngüh ditashi!’

³“Thükenbou BUNYUBOUei hai lauda: Ngoubüloubü thuseibü shuong, aoyouei ai ühüpbo jembü songeidoei thusei ngüh lauda haoen shanga ügütü!

⁴O Israel, kaibü thuseibü shuong kho sangliphang kabü selong shuong phatkei.

⁵BUNYUBOUeibü chaloua loenlabü shanga kan leilubü kümthang kümetla üang ayingsi Israel chung shanga ba aleku.

⁶Haoeneibü mangsang kho amlangbü hoba haoeneibü tetenbü kho yepeijawebü. BUNYUBOUei haoen ohautinyu haoenei, ‘BUNYUBOUei lauda,’ dogo lauda; khei yingankei haoenei haoeneibü ngüh loushedtimang sühda!

⁷Ngei ajoyonyu kanei, ‘BUNYUBOUei hai lauda’ dogo laujinei, kanei amlangbü mangsang hapbü hoba yepeijaweko tetenbü ngüh angda aying lo?

⁸Hibü Thükenbou BUNYUBOUei hai luda: ‘Kanei amlang laubü ngüh hoba yepeijaweko tetenbü mangsang hangshong ngo kan khulimbo kia,’ dogo Thükenbou BUNYUBOUei lauda.

⁹Jim akibü mangsang hapbü thuseibü shuong hoba yepeijaweko tetenbü shuong khulimbo ngeibü ik kilabü. Haoenei ngeibü mütli kishanga kaoen ühüplabü, ayingsi Israel chung dobü lea haoen adoletlabü, ayingsi Israel kaodak to haoen alottilabü. Kheijinei kanei ngo Thükenbou BUNYUBOU ki dogo ngelabü.

¹⁰“Aieilausi haoenei solo akinyu, ‘Solo kia,’ dogo lauko ngeibü mütli shuong suletkei, lausikei hakso akida, hoba ladang atei ba kümthang yaülaje, chüh- ashi, haoenei kho shiniei naanglepda,

¹¹hibü haoen shinei naangko küplepbü shuong to kho tuonglabü dogo lenshi. Langdok kaangbü louan piyungdei yungsen koutilabü hoba senlaang yaangbang attilabü hoba yeithu- yeinakei kho nopthetthet apbulabü.

¹²Ladang kümthang kho tuonglaje mütshuongei kan to, ‘Kanei shini naangbü kho lala?’ dogo alaulep lo?”

¹³Hibü Thükenbou BUNYUBOUei hai lauda: “Ngeibü maangshata yeithuyeinak lottilabü, hoba ngo khauangko langdok louan piyungdei yaang koutilabü hoba senlaang yaangbang yantian ngeibü khauanga mautilabü.

¹⁴Hibü ngei kanei shiniei naanglepbü kümthang kho pankulabü hoba kaoa yeptikulabü, hibü chemshang kho khongthu la yeilabü. Ladang kho tuonglaje kho yoa kan maulabü; hoba kanei ngo BUNYUBOU ki dogo ngelabü.

¹⁵“Kho tegü banyu kümthang hoba shini naangko küplepbü mütshuong khulimbo ngei maangshat phetan aplabü. Ngei kan to, ‘Banyu kümthang hoba kho naangbü shuong,

¹⁶hoba Jerusalem shanga tetenbü thuseibü shuong, hoba sao shanga sangmai mangsangje akinyu sangmai mangsang hapbei dogo laubü shuong koulanga dogo laulabü,’ dogo Thükenbou BUNYUBOUei lauda.”

¹⁷BUNYUBOUei laukei, “Müteibü shou, kaibü mütli yaksa shuong aoyouei lulueibü dambüei tetenbü ngüh lauda, haoen khulimbo tetenashi

¹⁸hoba lenashi, ‘Thükenbou BUNYUBOUei hai lauda: Ikngüm pendoua shiyobü nei hoba mütpem weko lulueibü thoong thüng khu shanga yuklabü nei shiko mütshuong langkei senbala lambü yaksa shuong shanga ügütü! Kaneibü ku shanga lubü senetan phoan kanei ngeibü mütli shuongeibü langkei lamlep lo?

¹⁹Yepeijawebü ngüh ditbü ngeibü mütli to yepeijaweko lauko barli youshou ikkhong che shenko shanga hoba wentek hansho shanga ühüiko kilabü langkei haitila hoba langkei akilabü mütshuong khümenla shanga kanei ngo hoba ngeibü mütli shuong shatida.’

²⁰“Hibü Thükenbou BUNYUBOUei hai lauda: ‘Ngo kanei au mintibü tegü mütshuongeibü langkei senbala lambü huonsei khulimbo kia hoba ngei khübü kho kaneibü phem ka thettikulabü; hoba kanei au tegü mintibü langkei shuong kho ngei litilabü.

²¹Ngei kaneibü yuklepbü nei jitan apbulabü hoba kaneibü ik ka kü mütli khümenlabü, hoba haoen ashieitila shanga touje kaneibü ika akilabü. Kheijinei kanei ngo BUNYUBOU ki dogo ngelabü.’

²²“Aieilausi ngei ngühmaanglanbü hau athettiko kijinei kan yepeijawebüei haoen maang- üangti, hoba amaibüa ong haoen maangpon asepeitiko hoba langkei akhümenko kitilabü lele kanei haoen maang kaangtikei,

²³hibü kanei touje amlangbü mangsang ayingsi yepeijaweko atetenlabü. Ngei kaneibü ik ka kü mütli shuong khümenlabü. Hobaje kanei ngo BUNYUBOU ki dogo ngelabü.”