Read Chang Naga EZEKIEL 14 Bible Online

EZEKIEL 14 - Chang Naga bible

EZEKIEL 14

¹Israelbü khuleibü at kü jungto loukei, hoba kü thedanga setkei.

²Kheijinei BUNYUBOUeibü ngüh kü jungto louan laukei:

³“Müteibü shou, khübü mütshuongeibü maanga heangsho shuong phoakei hoba khübüei haoen thea shedshonbü phaiyetlaang phoakei. Haoenei kü to joyola ai janbü ki?

⁴“Hibü haoen to joyoashi hoba hai lenshi, Thükenbou BUNYUBOUei hai lauda: Israel chung atei jembü maangpona heangsho shuong lotian phoan hoba hao thea shedshonbü phaiyetlaang phoda, hoba hao thuseibü jungto louda, ngo BUNYUBOUei hao to haoeibü heangsho lühbak thüng jungailabü.

⁵Khübü heangsho shuongei Israel chungeibü maangpon khümbo kü jungka kuktikei, lausikei ngeibü jongaibü danko ngei haoen leibangaila haujemda.

⁶“Hibü Israel mütli to lenshi, Thükenbou BUNYUBOUei hai lauda: Maangpon sepeiashi! Kaneibü heangsho hoba mangsenlabü kümsilei shuong pendou ka kaneibü thenyek sepeiashi.

⁷“Ladang Israelbü at ayingsi Israelbü to penan kibü küksithang jembü lolo kü jungka bangjung satda hoba haoeibü maangpon to heangsho shuong sungletda, hoba hao thea shedshonbü phaiyetlaang phoda hoba thuseibü jungto hao danko kü shangabü phela hauda, ngo BUNYUBOUei ngei lolo jongailabü.

⁸Kho müt khulimbo ngei ngeibü the sepeilabü, hoba hao tetlatala hoba amaaphelabü laueilabü ngüh che yeitilabü. Ngei hao kü mütli yo ka wapan aplabü. Kheijinei kanei ngo BUNYUBOU ki dogo ngelabü.

⁹“Hobaje thuseibou kho khü- pettiko ngüh lautialonga ngo BUNYUBOUei thuseibou kho khü- pettia, hoba ngei hao thükto ngeibü ik shinglabü, hoba hao ngeibü mütli Israel ka mautilabü.

¹⁰Hobaje thuseibou si hao lambou hamei jeteibü shedshon kayang künlabü.

¹¹Kheijinei Israel mütliei touje kü ka bangjung asatlabü, ayingsi haoeneibü shabü pendouei touje haoen lolo ashalabü. Haoen ngeibü mütli shuong yinglabü, hoba ngo haoeneibü Mühghaü yinglabü, dogo Thükenbou BUNYUBOUei lauda.”

¹²Hobaje BUNYUBOUeibü ngüh kü jungto loukei:

¹³“Müteibü shou, kaonyek cheei maangalanbü danko kükhu limbo shabü shonalonga, hoba ngei kho khulimbo ngeibü ik shingalonga hoba khünei kibü shausiyung leilutialonga hoba kho thükto mühsinou hautialonga hoba khükabü mütshuong si meisiau haitialonga,

¹⁴habü müt sem Noa, Daniel hoba Job, khünei kiasi dogokei haoeneibü saopobüei haoeneibü langkei ong khümenlabü, dogo Thükenbou BUNYUBOUei lauda.

¹⁵“Ayingsi ngei yamkabü meisiau kaonyek danko hautia longa hoba haoenei taketkhüman kho sangliphang la yeitialonga, khei meisiau kibü haangjung müt aokei danjung ohauenlonga,

¹⁶ngei thekolanko laukho, dogo Thükenbou BUNYUBOUei lauda, khei khübü müt sem kho khünei kiasi dogokei, haoenei jembü nouyang jayangshou shuong akhümenlabü. Haoen lansan khümenlabü, lausikei kaonyekje sangliphanga apyolabü.

¹⁷“Ayingsi ngei ho kaonyek khulimbo in che sungbaalonga hoba, ‘Kaonyek danko in hautishi,’ dogo laualonga hoba müt si meisiau ham haitialonga,

¹⁸ngei thekolanko laukho, khei khübü müt sem kho khünei kiteia habü tegükei haoenei haoeneibü nou- yang jayangshou shuong akhümenlabü, lausikei haoen ong khümenlabü, dogo Thükenbou BUNYUBOUei lauda.

¹⁹“Ayingsi ngei kaonyek to limsilang che hautialonga hoba kaonyek ka müt si meisiau shemtila ngei kho thükto sii angbü danko ngeibü maangshat hakan jinkualonga,

²⁰ngei thekolanko laukho, Noa, Daniel hoba Job khünei kiasi dogokei haoenei nouyang jayangshou shuong akhümenlabü, dogo Thükenbou BUNYUBOUei lauda. Haoen jembü saopobüei haoeneibü langkei ong khümenlabü.

²¹“Aishanga Thükenbou BUNYUBOUei hai lauda: Ngei ladang ngeibü matjem yaangbü lei, in, mühsinou, sekbülakbü meisiau hoba shatlim, Jerusalem khulimbo müt si meisiau shemtila hautilaje latetche amaibou yingla?

²²Khei yingasikei, chühashi, leilanglabü joubü nouyang jayangshou shuong shisho apyolabü. Chühashi, haoen kan jungto loulabü, hoba ladang kanei haoeneibü thechüh hoba haoeneibü kümsilei haplaje, ngei Jerusalem thükto amaibü sungbabü shanga hoba ngei kho thükto sungbabü pendou shanga kan solotilabü.

²³Hobaje ladang kanei haoeneibü thechüh hoba haoeneibü kümsilei haplaje haoenei kan haksotilabü, hoba ngei khünei kümbü pendou ai ayingkoje aküm, dogo kanei ngelabü, dogo Thükenbou BUNYUBOUei lauda.”