Read Chang Naga EZEKIEL 16 Bible Online

EZEKIEL 16 - Chang Naga bible

EZEKIEL 16

²“Müteibü shou, Jerusalema saoeibü mangsenlabü kümsilei shuong ngetiashi,

³hoba laushi, Thükenbou BUNYUBOUei Jerusalem to lauda: “No bukbü hoba no nashouabü jihsiphai kho Kanan kaodak ki; hoba kaibü bou Amorbü, hoba kaibü nyu Hitbü kiteikei.

⁴Hobaje no bukletbü nasakshoua kaibü shung alipbu ayingsi no deiei asakenku, ka la jem aikei anaangku, ayingsi nasak neiei aikei asho.

⁵Aoeikei ka shanga sanouko dambuko khübü at ongkei kümla ka to nyekei onouko achüh. Lausikei no buknyet ka to mangsenkei, hoba khongthua tekan apbei.

⁶“Kheijinei ngo dankei hoba ngei no kaibü siia khoneiko hapbei. No siiei khuilepan kiteikei, hoba ngei ka to laukei, ‘Tou lang kiashi!’

⁷Hobaje ngei no khongthu kabü bulong phatko chingtikei. No chingkei hoba thong loukei hoba no pendou to saomaibü yaksa la yeiko chingenkei. Kaibü sen tokkei hoba kaibü khulou yembei, khei yingasikei no mütkong kelutham kiteikei.

⁸“Kho phaia ngo no nyangko dankei, hoba ka to chühsi, ka to sanouyolabü jihsiphai sühan kiteikei. Hobaje ngei ngeibü neiei no mütkongbü küpletkukei. Haü, ngei no kankei, hoba ka to chemkanla theyolanyokei, hoba no ngeibü la yeikei, dogo Thükenbou BUNYUBOUei lauda.

⁹“Kheijinei ngei no deiei mang yukukei, haü, ngei ka ka sii sakan apbukei, hoba ngei ka la onang naangkukei.

¹⁰Tokei, ngei ka la noksa kakbü neisimei lekukei phekhon ngok lonkukei. Ngei ka la inyaibü khude tekukei hoba namton hele lekukei.

¹¹Hobaje kaibü ika ngei phülem chikhap hangan jinkukei, hoba kaibü ngüma yak yakkukei.

¹²Hobaje ngei ka la kungsaü chinem khapbukei, noua chipen jikukei hoba kaibü khua hemaibü khun hankukei.

¹³Kho tegü no hon si chandinamei janko lekukei; hoba kaibü nei noksa shuian takbü inyaibü nei hoba shanshanbü nei kiteikei. Kaibü shausiyung kho inyaibü wen, naodei hoba onang kikei. No son kakko saomaian yeikei; hoba Chobasao la yeikei.

¹⁴Hobaje kaibü hemaisaomai nyensang phangshuong yoa phinthonkei, aishanga ngei ka la soumo yaang phokukei kho benbüsoubü yeikei, dogo Thükenbou BUNYUBOUei lauda.

¹⁵“Lausikei nyi kaibü saomaibüa maanglembei; hoba kaibü nyenhang nyi suonlambü kümsileia jungeikei. Danbüphaibü weko la no yepbukei hoba kaibü saomai haoeibü la yeikei.

¹⁶Hobaje nyi kaibü neisiei at hangletkei hoba tonenbü lemshang hele lamlekei, hoba khonei nyi suonlam kümsilei kümbei. Kheibü kümsilei ühaüthükjan ayingsi ladangkei aloushadjan.

¹⁷Tokei nyi ngei ka la kubü hon hoba chandinam sungkei hoba kho nyi ka shanga bousu heangsho kümla lekei hoba khübü yoa suonlam kümsilei kümbei.

¹⁸Hobaje nyi kaibü noksa jinbü neiei khübü kho küplepbei, hoba khübü thedanga ngeibü onang si ngeibü jenjuokbü phokukei.

¹⁹Tokei ngei ka la kubü wentek, wen inyaibü si oliv onang hoba naodei, laobouei no sambei, nyi khübü khokei haoen thedanga ponlem maibü shanga phokukei,” dogo Thükenbou BUNYUBOUei lauda.

²⁰Kanei kü shanga bukkubü nouyang jayangshou shuong kanei sungkei hoba haoen heangsho shuong la lembüsabü shanga kukei. Kaneibü suonlambü hoei ongkei soubü aying lo?

²¹Kanei ngeibü shousi shuong haitikei hoba heangsho shuong la juokbü lembü kukei.

²²Kaibü mangsenlabü hoba suonlambü kümsilei pendoua nyi no kaibü siia khoneiko kibü kaibü nashouabü chalou shuong nyi adamen.

²³Ügütü! Ka to ügütü, dogo Thükenbou BUNYUBOUei lauda. Nyi jungeibü kaibü amaibü pendou yo to,

²⁴kanei kan shanga saopobü lemshang dangkei hoba khongnyu wekoa kan shanga suonlamshang kümbei.

²⁵Khongnyu naphei wekoa nyi jembü kishang kümbei hoba khünei no saomaibü mangsenlabü yeitikei, hoba danbü phaibü weko la kaibü you kaakkukei; hoba kaibü suonlambü aei yeitikei.

²⁶Tokei nyi ka lepbou Ijep to maangdühbüa suonlambü jungeikei; hoba ngo maangto shattila kaibü suonlambü aei ong yeitikei.

²⁷“Hibü, chühashi, ngei ka thükto ngeibü ik tuokkei, hoba ngeibü haülabü ka kaibü phejan ngailangkei. Ngei no ka to mangsenbü Filistiabü shuong, aoyou kaibü asangalan kümsilei shanga himouko ki, haoen la khümbo kua.

²⁸“No mü to jambüyangbüei maanga amaiko tokei nyi Assiriabü to jambei. Haü, no haoeneibü suonlamnyu kiteikei, lausikei haoenei no senyüh- ashemti.”

²⁹Kho phaia nyi Khaldibü namyaknamseibü yoa suonlam kümsilei kümbei, khei yingankei khoei no senyühashem.

³⁰“Jajasasa suonlamsao kümsilei khübü pendou nyi hapan kaibü maangpon lai hau akiko ki, dogo Thükenbou BUNYUBOUei lauda.

³¹Khongnyu wekoa nyi heangsho lemshang dangda hoba suonlambü jungeida. Lausikei no nyishoubü mulebü suonlambü tegü khongto asatda.

³²No asangalanbü yak! Nyi jembü lao jeiko lubü yensiau to asangalanko kida.

³³Suonlamnyu wekoei jembü mu hapda, lausikei nyi kaibü pejapela shanga pendou aeka ka jungto yepla naloula shanga nyi haoen la anyem shangkuko kaibü sanoubü shuong pendou la jongsak kuda.

³⁴Hibü no lubü suonlamnyu shuong to mudonga lulusap; bousu aoeikei ka to dühko ka to asuaja. Aoeikei ka la mu aku; nyi bouje haoen la kukei! Haü, no mudonga lulusap.”

³⁵Hibü no, O suonlamnyu, BUNYUBOUeibü ngüh ditashi!

³⁶Thükenbou BUNYUBOUei hai lauda: “Nyi kaibü neisimei hangletkei, hoba suonlamnyu che phatko, hoba nyi jembü lolo kaibü sanoubü shuong la hoba mangsenlabü heangsho shuong la kuan apbei, hoba nyi kaibü shousi shuong haitian heangsho shuong la lemlasala kukei.

³⁷Hibü chühashi, ka to sanouyobü shuong pendou, aoyou to no olinbü hapbei, khei nyi sanouko kibü pendou, hoba nyi mangsenbü pendou ngei leishailabü. Ngei haoen pendou no kaijembo kamshaitilabü, hoba ngei kaibü neisimei khokan apbulabü hoba haoen la no mütkong haptilabü.

³⁸Hobaje chemdang yeibü asangalan hoba müt haitibü kayang matjemei ngei no yuktilabü; hoba ngei ka thükto ngeibü khauang hoba maangshat longbüa haibü sungbalabü.

³⁹Kheijinei ngei no haoeneibü ik to khümbo kuan aplabü, hoba haoenei no kishang hoba nyi suonlambü si heangsho lemshang kümbü pankulabü. Haoenei kaibü neisimei hoba phülem langkulabü hoba haoenei no mütkong apyolabü.

⁴⁰“Haoenei no khulimbo mütshang che leishailabü hoba ka to laangei sonlabü, hoba haoenei no inei netla yeiko jemnyinlabü.

⁴¹Hobaje haoenei kaibü chem wanei jikan apbulabü, hoba yaksa juong thedanga ka thükto kayang sungbalabü. Ngei no kaibü suonlam kümsilei ka thaktilabü, hoba nyi kaibü sanoubü shuong la jongsak kubü bangtilabü.

⁴²Kheijinei ngeibü khauang longbü koulabü hoba ngo sangsembo yeilabü. Touje ngeibü nyekshat maangshat khauang ka ka banglabü.

⁴³Aieilausi nyi kaibü nashouabü chalou shuong adamen lausikei khübü kümsilei pendouei ngo khauangtikei. Hibü chühashi, ngei maimaitham kaibü khu thükto kaibü kümsilei künan jinkulabü. Aila nyi lubü mangsenlabü kümsilei thükto pejapelabü shomyokei?” dogo Thükenbou BUNYUBOUei lauda.

⁴⁴BUNYUBOUei laukei, “Chühashi, Jerusalem, mütshuongei ho tetenbü jungeilabü: ‘Nyu ailai ki, nouyangshoukei kho tegü ong’.

⁴⁵No maimaitham nyueibü nou- yangshou ki. Saoei saoeibü lao si saoeibü shousi shuong mangsenkei. No kaibü nousinasi shuong phatkei, aoyouei haoeneibü laosi shuong hoba shousi shuong mangsenkei. No hoba kaibü nousinasi sangnyu shuongei Hitbü nyu hoba Amorbü bou kiteikei.

⁴⁶“Kaibü nou si saoeibü sangnyu shuong kho yungthang aenei Samaria ki. Kaibü na si saoeibü sangnyu shuong kho yungkük aenei Sodom ki.

⁴⁷Haoeneibü youmo phai semla hoba haoeneibü amaibü kümsilei neinoula no maang nyema lo? Aying, longchetanga kaibü kümsilei pendoua haoenei kümbü tokei nyi amaibou kümbo kiteikei.

⁴⁸“Ngo langkeibü Mühghaü ki shongko,” dogo Thükenbou BUNYUBOUei lauda, “Kana Sodom hoba saoeibü sangnyu shuongei nyi hoba kaibü sangnyu shuongei amaibü kümbü tetcheje ladangkei aküm.

⁴⁹Chühashi, ho kaibü nou Sodomei shedshonbü kiteikei: Sao hoba saoeibü nouyangshou shuong lilisese, naangmaibüa apsilebü hoba hopabü; lausikei saoei shalebü si khonkubü to athounou.

⁵⁰Haoen lilian apbei hoba kü thedanga mangsenlabü kümbei. Hibü kanei hapbü tegütham ngei haoen shemtikei.

⁵¹“Samariaei kanei shonbü shedbü shabü ka jamde thüng ongkei ashon. Nyi haoen tokei yongbou mangsenlabü kümsilei kümbei. Nyi kümbü mangsenlabü kümsilei shuong takteialonga kaibü nasi shuong saopobou tegütham ki.

⁵²Nyi tou kaibü himou thonglabü. Ka to takteiyoalonga kanasi shuongje saopobü tegü chühlabü lele nyi haoen tokei aei amaibou shabü shonkei.”

⁵³BUNYUBOUei Jerusalem to laukei, “Lausikei ngei haoeneibü thu kümetlabü. Sodom si saoeibü sangnyu shuongeibü thu, hoba Samaria si saoeibü sangnyu shuongeibü thu kümetkulabü. Haü, ngei kan naangmaitilabü,

⁵⁴khei ngo khau angtila shanga nyi kümbü pendou laüa nyi himou künlabü hoba kanasi shuongeibü naangmaibü shangabü nyi himouko damlabü.

⁵⁵Kheijinei kana Sodom si saoeibü sangnyu shuong hoba Samaria si saoeibü sangnyu shuong shangiedbü thu to longeilabü; hoba no si kaibü sangnyu shuong shangiedbü thu to sepeilabü.

⁵⁶Aishanga no yonglam lilibü chaloua kana Sodom shangabü nyi laulonga alauei.

⁵⁷No amaibü tangto alongjinei, Edom nouyangshou shuong hoba sao kaijembo kibü pendouei, hoba Filistiabü nou- yangshou shuong si aoyou no kaijembo ki, haoenei ka to nyikubü hoba hakbü chalou phatko no kia.

⁵⁸Nyi kaibü pejapela thedühmaangdüh hoba mangsenlabü kümsilei shuong ka longbü on künngailabü,” dogo BUNYUBOUei lauda.

⁵⁹“Thükenbou BUNYUBOUei hai lauda: Ngei nyi kümbü muthüng ka to jungeilabü, aieilausi nyi theletbü aweasüngko ngeibü theletlanletbü leilutikei.

⁶⁰Khei yingasikei no nashoudanga ngei ka to theyolanyobü ngei damenlabü, hoba ngei ka yoa thonsithak akibü thesilan kümlabü.

⁶¹Kheijinei nyi kaibü kümsilei shuong damenlabü, hoba ladang nyi kaibü nousinasi shuong sungletlaje himouko kilabü. Ngei haoen ka la nouyangshou yingla kulabü, lausikei kho ngei ka to thebülanbü shanga aying.

⁶²Hibü ngei ngeibü thebülanbü ka yoa pholabü, hoba ngo BUNYUBOU ki dogo nyi ngelabü.

⁶³Ladang ngei nyi kümbü pendou ka la amai apbuko angthetlaje kheijinei nyi shedbü pendou damenlabü hoba ngüh angla ongkei himoulabü lele kilabü,” dogo Thükenbou BUNYUBOUei lauda.