Read Chang Naga EZEKIEL 17 Bible Online

EZEKIEL 17 - Chang Naga bible

EZEKIEL 17

¹Hobaje BUNYUBOUeibü ngüh kü jungto loukei:

²“Müteibü shou, ngühsung che kuashi hoba ngühphatbü che Israel mütli to lenashi.

³Haoen to hai lenshi, ‘Thükenbou BUNYUBOUei hai lauda: Aulu yaangbou che kaak yaang hoba wi lounyu, wiei shenan, son phangche yeman Lebanon to loukei hoba cedar bulong hotena pakkei.

⁴Haoei hoten bhekyaak kho khean sungkei hoba haoei kho namyak namseibü kaonyek che to sungjung haukei, hoba haoei kho namseibü sangnyu chenei kean phokukei.

⁵Haoei tokei Israel kaonyek ka lilabü ponshou at sungjung haukei, hoba kho kaomaia kekei. Haoei kho dei juong kibü kaoen kabü willo bulong tegü apyokei.

⁶Hobaje kho yembei hoba khaüjung satbü semlüh long tuibü la yeikei. Bhek shuong kho aulu ae yeian chingkei, hoba khoeibü li phangto haüko atkei. Hibü kho semlüh long la yeikei, hoba bhek shuong longkei, hoba bhek haanbü shuong yembei.

⁷“Tokei aulu lubü yaangbü che kaak yaang hoba wi juong angan kikei. Hobaje chühashi, semlüh long khoei hao ae haoeibü li süngjung litikei, hoba hao ka dei nahapla shanga mudonga yeman kibü kaoen ka bhek kho hao aeto sepeian khuikei.,

⁸Lausikei khoeibü bhek khaüan mai hektila hoba hangenbü semlüh long yeitila shanga mudonga kho kaomaia hoba dei juong kibüa kekei.

⁹“Hibü, ngo Thükenbou BUNYUBOUei pheda: Ho semlüh long lang kiasao hoba chingasao? Shaangboubü aulu khoei ho li ka mokko pheian, hoeibü semlühhek nyaaklettian, hoba bhek shuong leilutian khübü kho linoktham üptilep lo? Ho pheian sungla yaangbü ayingsi hauki yaangkibü mütli phang akhamlabü.

¹⁰Haü, ho keakei, lausikei ho langasao ayingsi chingasao? Chaangbou yeiei soualonga ho ayuilep lo? Yemshang khünei ho yuian üplep lo?”

¹¹Tokei BUNYUBOUeibü ngüh kü jungto loukei:

¹²“Ngüha alebü chung to lenashi, ‘Kanei ho ngühphatbü tetlabü ngekeilao?’ Haoen to lenashi: ‘Babilonbü Choba Jerusalem to loukei, hoba khükabü Choba si haoeibü leiyeibü yaangbü shuong hao yoa Babilon to leian ngaikei.

¹³Hobaje hao chemdang ka lilabü che sungkei, hoba hao yoa theyolan- yobü che phangto hao attikei. Haoei tokei kaonyek kabü leiyeibü shuong leilangkei.

¹⁴Kho Choba sangle nyibou loenla athüklabü lele phangto nakan yantilabü, lausikei haoeibü thebülanbü jungeibüei hao loan kienlabü shanga kikei.

¹⁵Lausikei Jihudabü Chobaei hao khulimbo lokei hoba haoeibü lambubou shuong Ijep to koli si sepai juong hao la hautikushi dogo phela hautikei. Haoei thükenlep lo? Kho tegübü kümsilei kümbo hao satenlep lo? Haoei thebülanbü leilutian hao tokei satenlep lo?

¹⁶“Ngo lang kishongko, dogo Thükenbou BUNYUBOUei lauda, laonei haoei hao Choba setshang to nguitikei, aoeibü thebülanbü haoei aweasüng, hoba aoeibü thebülanbü haoei leilukei, hao kho Babilon kaonyeka hailabü.

¹⁷Ladang Babilonbüei langkei juongnyu shemtila shanga kaomang laiko thulaje hoba lapheishon shelaje kheijinei Ijep Choba Faraoeibü lakjaibü sepai tan yaangbüeikei hao to thuijim akilabü.

¹⁸Haoei theyolanyobü leilubüei jembüei theletbü aweasüng. Aieilausi haoei jembüeibü ngühei theletan khübü pendou kümbei, khoei hao asatenlabü.

¹⁹“Hibü Thükenbou BUNYUBOUei hai lauda: Ngo lang kishongko, haoei kü nyen phongko theletbü thebülanbü leilubü shanga hao khulimbo haoeibü khu to kayang sungbalabü.

²⁰Ngei hao la meishibüeibü tak sankulabü hoba ngeibü taka hao minlabü. Ngei hao Babilon to leilanglabü hoba khünei hao khulimbo ngühkhüm lulimbü kayang matjem kulabü, aieilausi hao kü to maangalan.

²¹Haoeibü shanenbü sepai tan pendou lasona inei tuonglabü, hoba jouletbü shuong pendou ae aalabü. Kheijinei kanei ngo BUNYUBOUei kho joyoa dogo ngelabü.”

²²Thükenbou BUNYUBOUei hai lauda: “Ngeikei cedar bulong hoten kho sunglabü, hoba hoten bhek haanbü ka alibü sem kho sunglabü hoba ngei kho shetenbü shongh suokbüa kelabü,

²³khei Israeleibü shonghkhu suokbouthama kelabü. Khoei bhek longtilabü hoba lang heklabü hoba nyenhang kibü cedar bulong che yeilabü. Kaakyembü au phang pendouei khonei hap huonglabü hoba khoeibü yeme phanga haksolabü.

²⁴Kaonyua yembü bulong pendouei ngo BUNYUBOU ki dogo ngelabü. Ngei bulong yaangbü chengan koutida hoba bulong hanbü lounyu chingtida. Ngei bulong sangtüngbü lintida hoba linbü bulong sangtüngtida. Ngo BUNYUBOUei laua, hoba kho ngei kümlabü.”