Read Chang Naga EZEKIEL 18 Bible Online

EZEKIEL 18 - Chang Naga bible

EZEKIEL 18

¹BUNYUBOUeibü ngüh kü jungto loukei

²hoba laukei, “Israel kaoa mütshuongei ho tetentanbü athakko jungeibü ngühtet ai? ‘Bousi shuongei haijepbü semlüh shaukei, Lausikei shousi shuong to hauh ambei.’

³“Ngo lang kishongko, dogo Thükenbou BUNYUBOUei lauda, kanei touje Israela kho tetentanbü ajungeilabü.

⁴Chühashi, müt pendou ngeibü, boueibü langkei tegütham shoueibü langkeikei ngeibü ong. Shabü shonbou langkei khoje hailabü.

⁵“Ngühtet chenei müt che saopobü hoba janbü ong kümbo ngühmaanglanbü ki.

⁶Haoei shongha Israelbüeibü heangsho alemda ayingsi asakkubü lemshang kabü lembüsabü shausiyung ashauda. Haoei jembü lepboueibü yak to ajamda, ayingsi ihinseibü jihsiphaia yaksa to ajamda.

⁷Haoei aokei ahonetda ayingsi akokda. Haoei hao ka lotboueibü angthetnam kungaida; haoei mühbünoubü la oknyinda hoba mütkongbü la neisimei kuda.

⁸Haoei phobnam pailetla shanga alotkuda. Müt si müt kanglanga oyolemenbüa amaibü kümla haoei senetda hoba ngühmaanglanbü janthet kuda.

⁹Kheibü mütei ngei sakkubüa ngüha leda hoba kü ngühkhüm jungeida. Hao saopobü, hoba hao lang kilabü,” dogo Thükenbou BUNYUBOUei lauda.

¹⁰“Tokei ngühtet chenei haoei soshau soyungbü hoba müt haitibou, ayingsi habü tegübü lubü amaibü kümsilei kümbü shou che kia,

¹¹(khei boueije kheibü kümsileije ladangkei aküm). Haoei shongh kabü lemshanga lembüsabü phe shauda, hoba müeibü yak to jamda.

¹²Haoei shalebü si akialebü shieikoeda. Hao koklasemla hauda. Haoei lotboueibü angthetnam akungaida. Hao küksithangeibü lemshang to hauda. Haoei mangsenlabü heangsho shuong lemda,

¹³hoba haoei pailetla shanga phobnam lela lotkuda. Kho tegübü müt lang kilep sai? Aying, hao lang akilabü. Aieilausi haoei khübü mangsenlabü pendou kümbei, hibü hao haitilabü hoba haoeibü sii hao thüka kilabü.

¹⁴“Lausikei ngühtet chenei nyiboubü müt khoei shou che kia. Haoei haobouei kümbü shabü kümsilei pendou hapda, lausikei haoei bouei kümbü nei anou.

¹⁵Haoei Israelbüeibü heangsho shuong to alemda ayingsi asakkubü lemshanga lembüsabü shausiyung ashauda. Haoeibü lubüeibü yak to ajamda,

¹⁶ayingsi aokei ashiakoeda ayingsi aoeibükei akoklangda. Lotbouei hao la angthetnam phokubü kungaida. Haoei mühbünoubü la oknyinda hoba mütkongbü la neisimei kuda.

¹⁷Haoei shabü ka haoeibü ik senetda hoba phobnam pailetla shanga alotkuda. Haoei kü ngühkhüm jungeida hoba ngei sakkubü phai semda. Hao boueibü shabü shanga ühailabü; hao tükde lang kilabü.

¹⁸Lausikei haobouje haoeibü shabü shanga hailabü, aieilausi haoei jaisina ka soshau soyungkei hoba kokkei hoba jembü mütli yoa ai amai kho kümbei.

¹⁹“Lausikei kanei lauda, ‘Aila shouei boueibü shabü akünla?’ Aieilausi shouei janbü hoba tükdebü kümbei. Haoei kü ngühkhüm jungeikei hoba ngeibü sakkubü phai maangsangko sembei, hibü khoei hao lang kilabü.

²⁰Shabü shonbou müt khoje hailabü. Boueibü shedbüshabü shouei akünlabü, ayingsi shoueibü shedbüshabü bouei akünlabü. Saopoboueibü kümsilei maibü kho hao thüka kilabü, hoba amaiboueibü kümsilei amaibü kho hao khulimbo kilabü.

²¹“Lausikei müt amaibouei haoei shonbü jembü shedbüshabü pendou ka sepeialonga, hoba kü ngühkhüm janbü hoba tükdebü kho kümalonga, hao maimaitham lang kilabü; haoje ühailabü.

²²Haoei kümoubü shedbüshabü aikei hao khulimbo adamenlabü. Aieilausi haoei kümbü saopobüa hao lang kilabü.

²³Amaibü müt haibüa ngo olinbü ki sai?” dogo Thükenbou BUNYUBOUei lauda. “Aying, aeiko hao jembü lamnyu ka sepeian lang kitimang sühda.

²⁴“Lausikei ladang saopobou haoeibü saopobü ka sepeinyu satlaje hoba shed shonlaje hoba amaibouei kümbü tegü mangsenlabü kümsilei pendou kümlaje hao lang kilep lo? Aying! Haoei kümbü saopobü che ongkei adamenlabü. Ngühmaangalanbü ka hao sheda hoba haoeibü shedshonbüa hao hailabü.

²⁵“Lausikei kanei lauda, ‘BUNYUBOUeibü lamnyu janbü aying.’ Ditashi, O Israel chung: Ngeibü lamnyu janbü aying se? Ajanbou kho kaneibü lamnyu bouje aying lo?

²⁶Ladang saopobü mütei haoeibü saopobü ka sepeinyu ngailaje, hoba shed shonlaje, hao hailabü.

²⁷Ladang amaibü mütei haoei kümbü shabbü ka sepeida hoba janbü ngühkhüm si tükdebü kho kümda, haoei hao langkei khümenlabü.

²⁸Aieilausi haoei kümbü hoba ngühkhüm lulimbü shabü pendou haoei damanchühda hoba hao khüka sepeinyu longeida, hao maimaitham lang kilabü; hao ühailabü.

²⁹Khei yingasikei Israel chungei lauda, ‘BUNYUBOUeibü lamnyu janbü aying.’ O Israel chung, ngeibü lamnyu shuong janbü aying se? Ajanbou kho kaneibü lamnyu bouje aying lo?

³⁰“Hibü, O Israel chung, mütpem weko lulueibü kümsilei thüng ngei kan mat jemlabü, dogo Thükenbou BUNYUBOUei lauda. Maangpon sepeiashi! Kan lolo kanei ngühkhüm lulimbü ka sepeiashi; khei yingsi ong shedshonbü kho kan maushang ayinglabü.

³¹Kanei shonshaibü ngühkhüm lulimbü pendou kan lolo tekan apashi, hoba kaneibü maangpon haanbü hoba langkei haanbü yeiashi. Aila kan haila, O Israel chung?

³²Aishanga ao haibüakei ngo olinko aki,” dogo Thükenbou BUNYUBOUei lauda. “Maangpon sepeiashi hoba lang kiashi.”