Read Chang Naga EZEKIEL 19 Bible Online

EZEKIEL 19 - Chang Naga bible

EZEKIEL 19

¹BUNYUBOUei kü to laukei, “Nyi Israelbü Chobashou müt nyi shanga waangbü chia che atashi:

²Kaibü nyu ai kikei? Molosaonyu nyunyu! Saoei sekbülakbü molosaonyu paang shuong yoa saoeibü shoushou shuong chingentikei.

³Saoei saoeibü shoushou shuong yo ka che pangteienkei; hao la lamshaula ngetikei hoba haoei müt shaula ditletkei.

⁴Phangshuongei hao shangabü ditkei, hoba haoenei haoen püngkhüna minoukei. Haoenei hao ngauyaüjinei Ijep kaodak to senan haukei.

⁵Saoei saoeibü maanglem athonshongko chüheikei. Kheijinei saoei lubü molosaonyu shoushou che chingentikei, hoba hao sekbülakbü molosaonyu paang la yeikei.

⁶Ladang hao chingenkei, hao lubü molosaonyu yoa shoongkei. Haoeikei meisiau taketla hoba müt shaula ditletkei.

⁷Haoei lapheishon pankukei hoba sangnyu shuong leilukukei. Haoei ngühbü langh wekoei kaonyu kabü mütshuong mokde apyokei.

⁸Phangshuongei hao to wapyola meimeikei; kaophei pendou aeka pendou ka mütshuong loukei. Haoenei meishibü tak sankukei hoba haoeneibü taka hao mintikei.

⁹Haoenei hao ngauyaüjinei thüngshang chem to jinkei hoba Babilonbü Choba jungto leian haukei. Touje haoei ngühbü Israel shongha ladangkei aditlabü lele haoenei hao lombou phanga thüngkei.

¹⁰Kanyu, dei nyangko kebü kaibü semlühlaak kabü semlühlong phatko kikei. Aieilausi dei apsileko kibüei, semlühlong kho bhek si mai hekbüei shenan kikei.

¹¹Saoeibü bhek kho hau kikei hoba Chobaeibü julo la yeiko chingkei. Semlühlong kho sangmeia jakko louan chingkei; müt pendouei sao buham yaangbü hoba loubü hapbei.

¹²Lausikei khau angbü ikei sao lito mokko pheienkei hoba kaoa tekan apbei. Hobaje chaangbou yeiei khoeibü hek lintikei. Saoeibü bhek shuong ngokan apbei; haoen yuian apbei hoba wana lonkei.

¹³Touje sao phetsen kaoa, kaolin hoba dei akibü kaoa keakei.

¹⁴Saoeibü bumanga wan lapbei; wanei khoeibü bhek si hek lona. Touje bhek shuong kho ladangkei hau akingailabü, hoba Chobaeibü julo la alelabü.” Ho waangbü chia ki; ho thonsithak akiko laukei.