Read Chang Naga EZEKIEL 20 Bible Online

EZEKIEL 20 - Chang Naga bible

EZEKIEL 20

¹Langsenbü po nyetboubü, lit ngaoboubü, chalou anbounyet, Israelbü leiyeibü at BUNYUBOU ka phela loukei hoba haoen kü thedanga setkei.

²Kheijinei BUNYUBOU ngüh kü jungto louan laukei:

³“Müteibü shou, Israelbü jaishou shuong to joyoashi, hoba haoen to, Thükenbou BUNYUBOUei hai lauda dogo lenshi: Kan kü ka phela loukei sai? Ngo langkeibü Mühghaüei thekolanko lauda, ngei kanei kü to phela akitilabü, dogo Thükenbou BUNYUBOUei lauda.

⁴“Nyi haoeneibü mat jemlep lo? Müteibü shou, nyi haoeneibü mat jemlep lo? Khülonga haoeneibü pisiboueibü mangsenlabü kümsilei shuong ngeentiashi,

⁵hoba haoen to lenshi: Thükenbou BUNYUBOUei hai lauda: Ngei Israel pienbü chaloua ngei Jakob chungeibü thensilen to ngeibü ik tuokan theyolanyokei hoba ngei ngo lolo haoen to Ijep kaodaka tang khitkei. Ngei ik tuokan haoen to laukei: Ngo BUNYUBOU kaneibü Mühghaü ki.

⁶Khünyet chaloua, ngei haoen sendei si naodei kouko kibü kaodak, khei kaodak pendou tokei shanenbü kaonyek to leian atla shanga haoen Ijep ka leibalabü dogo ngei haoen la thekukei.

⁷Hobaje ngei haoen to laukei: Kan mütpem wekoei kanei dühbü mangsenlabü heangsho shuong apashi, hoba amlangbü Ijepbü mühghaü shuongei kan lolo teshati, aieilausi ngo kaneibü BUNYUBOU Mühghaü ki.

⁸Lausikei haoenei ngo khulimbo meimeikei hoba kü to ngüha ale. Haoenei mangsenlabü heangsho shuong ayingsi haoenei Ijepbü mühghaü shuong üpyo. Hibü ngei Ijep kaodaka ngeibü khauang longbü haoen khulimbo kümla shanga hakan jinkulabü dogo ngei laukei.

⁹Lausikei phangshuong aoyou yoa haoen kiteikei khübü thea, hoba Ijep ka haoen leian longbüei ngo Israelbü thedanga tang khittikei, haoen thedanga ngeibü nyen ashatilabü laüa ngei kho aküm.

¹⁰“Hibü ngei haoen Ijep kaodak ka leian longkei hoba yam to haoen leian loukei.

¹¹Hobaje ao mütei kho kümlaje hao lang kilabü lele ngei haoen la kü ngühkhüm kukei hoba ngeibü sakkubü ngetikei.

¹²Tokei ngei haoen la ngo hoba haoen kanglanga tetsida phola hoba ngo BUNYUBOUei haoen saüenkukei dogo ngela shanga Nounyet kukei.

¹³Lausikei Israel mütshuongei yama mangkei ngo khulimbo meimeikei. Haoenei ngeibü ngühkhüm leilukei hoba haoenei ngeibü sakkubü inletkei, laobou mütei jungeia longa haoeibü langkei kila kiteikei. Haoenei Nounyet khümbomeiko shatikei. Hibü ngei haoen yama shemtila shanga haoen la ngeibü khauang longbü hakan jinkulabü dogo ngei laukei.

¹⁴Lausikei phangshuong thea ngei Israelbü shuong Ijep ka leibako hapbü shuong thedanga kü nyen ashatilabü laüa ngei kho aküm.

¹⁵Hibü khoei ngei sendei si naodei kouko kibü kaodak, pendou to shanenbü kaonyek to haoen leian ütlabü dogo ngei yama ik tuokan thekukei.

¹⁶Aieilausi haoenei ngeibü sakkubü inletkei hoba kü ngühkhüm leilukei, hoba ngeibü Nounyet shatikei. Aishanga haoeneibü maangpon heangsho lembü phaito haukei.

¹⁷“Khei yingasikei haoen shemtila ngei onouko dambei. Ngei haoen yama ashemtila janthetkei.

¹⁸Ngei yama haoeneibü shousi shuong to laukei: Kan kaneibü pisibou ngühkhüm deikhüma tepai, ayingsi haoeneibü sakkubü tejungei, ayingsi haoeneibü heangshoei kan lolo teshati.

¹⁹Ngo kaneibü BUNYUBOU Mühghaü ki; ngeibü sakkbü phai semashi hoba ngeibü ngühkhüm deikhüm shuong jungeiashi.

²⁰Ngeibü Nounyet saüenan phoashi, hoba khübü kho ngo hoba kan kanglanga kanei ngo BUNYUBOU kaneibü Mühghaü ki dogo ngela shanga tetsida che yinglabü.

²¹“Lausikei shousi shuongeikei ngo khulimbei. Haoenei ngeibü ngükhüm deikhüma apai, hoba ngeibü sakkubü ngüh shuong maangsangko ajungei, laobou mütei kümalonga khünei langkei kilabü. Haoenei ngeibü Nounyet shuong shatikei, hibü haoen khulimbo yama ngo khauang longbü haoen thükto khüpan jinkulabü dogo ngei laukei.

²²Lausikei phangshuong thea ngei Israelbü shuong Ijep ka leibako hapbü shuong thedanga kü nyen ashatilabü laüa ngei kho kümbei.

²³Hibü ngei yama lubü thebülanbü che kümbei. Ngei haoen kaonyek pendoua phangshuong yoa phinnyintilabü dogo theletlanletkei.

²⁴Aieilausi haoenei ngeibü ngühkhüma ngüha ale lausikei ngeibü sakkubü inletkei hoba ngeibü Nounyet shuong shatikei; hoba haoeneibü nyek haoeneibü pisiboueibü heangsho phai sembei.

²⁵“Kheijinei ngei haoen la amaibü ngühkhüm hoba langkei asungbalabü sakkubü shuong kukei.

²⁶Ngei haoen lolo haoeneibü lembüei shatikei, hoba haoeneibü jembü jayangshousi shuong juokbü lembü kutikei. Kho haoen shieikoela hoba haoen la ngo BUNYUBOU ki dogo lenla shanga kümbei.

²⁷“Hibü müteibü shou, Israelbü chung to joyoashi, hoba haoen to lenashi: Thükenbou BUNYUBOUei hai lauda: Khoneikei kaneibü pisibousi shuongei haoen maangalanbü danko kü la nyikukei.

²⁸Ngei haoen la kulabü dogo ik tuokko theletlanletbü kaodak to haoen leibakei. Ladang haoenei shongh suokbü hoba bukhu shangtüngtham hapbei, haoenei khübü wekoa haitibü juokbü lembü kukei. Khünei haoenei juokbü lembü kubü hoba yunglabü lembü sungbabü danko ngo khau angtikei.

²⁹Kheijinei ngei haoen to phekei: Kan haushang shongh kho ai tegübü che? Hibü tat sühko kho kaodak to ‘Bama’ dogo lauda.

³⁰Hibü, Israelbü shuong to lenshi: Thükenbou BUNYUBOUei hai lauda: Kaneibü pisibousi shuongei shabü shonbü maimai kaneikei haoeneibü mangsenlabü heangsho shuong phai sembo kan lolo shed shonlep lo?

³¹Tat dogokei kanei jeteibü jongsak kuda hoba kaneibü shousi shuong haoen la wana juokbü lembü kubü danko jeteibü heangsho shuong yoa kan lolo shatida. Hobaje O kan Israelbü shuong, kü jungto ngeibü maangangbü phela loulep lo! Ngo langkeibü Mühghaü ki shongko, ngei kan la kü ka ai aphetilabü, dogo Thükenbou BUNYUBOUei lauda.

³²Kanei lauda: Kün bu si laang lembü lubü kaodak phangshuong hoba mütli shuong phatko kimang sühda. Lausikei kaneibü maanga kibü kho ladangkei aloushadlabü.

³³“Ngo langkeibü Mühghaü ki shongko, dogo Thükenbou BUNYUBOUei lauda, ngei ngo khauang maangshat, hauki yaangkibü ik hoba sei khümboei kan thüka songdaklabü.

³⁴Hobaje hauki yaangkibü ikei hoba khauang maangpokei ngei kan phangshuong yo ka leibalabü hoba kan phinnyinan kibü kaonyek mütshuong yo ka leishailabü.

³⁵Hobaje ngei kan ‘Phangshuongeibü Phetsenkao’ to leibalabü hoba khünei theshuok matjema yuktilabü.

³⁶Ijep kaodak Sinai Phetsen kaoa kaneibü pisibousishuong matjema yuktibü tegü, ngei kan yuktilabü,” dogo Thükenbou BUNYUBOUei lauda.

³⁷“Hobaje ngei kan julo the- petbü phangto khomtilabü hoba ngei kan to theyolanyobü ngüha letilabü.

³⁸Hobaje kan yo ka khulimbo meimeibü shuong hoba ngo khulimbo ngühkhüm leilubü shuong ngei saüenlabü; haoen yen la lean kibü kaodak ka ngei haoen leian longlabü, lausikei Israel kaodak to haoen leian ütlabü, hoba kanei ngo BUNYUBOU dogo ngelabü.”

³⁹“Kan shanga, O Israel chung, Thükenbou BUNYUBOUei hai lauda: Hauashi, mütpem weko lulueibü heangsho khangenashi! Lausikei kho phaiaje kanei ngüha lelabü hoba kaneibü heangsho shuong la jongsak kubü danko kü nyen saopobü ashatilabü.

⁴⁰Aishanga ngeibü saopobü shongh, Israelbü shongh khua, khünei Israel mütli pendouei kaonyeka ngo khangenlabü hoba khonei ngei haoen sungletlabü, dogo Thükenbou BUNYUBOUei lauda. Khünei ngei kaneibü lembü shuong hoba kan pienbü jongsak shuong hoba kaneibü saopobü lembüsabü peisilei pendou ngei sungletlabü.

⁴¹Ladang mütshuong yo ka ngei kan leiyenlaje hoba ainei kan phinthonan ki khübü ka leishailaje ponlem teibü tegü ngei kan sungletlabü hoba phangshuongei hapbo ngo kan yoa saüenan kilabü.

⁴²Ladang Israel kaodak to hoba kaneibü pisibousi la kulabü dogo thekubü kaodak to, ngeibü ik shingbüei ngei kan leian loulaje, kheijinei kanei ngo BUNYUBOU ki dogo ngelabü.

⁴³Khünei kan lolo shatiko kümbü amaibü kümsilei shuong pendou kanei damenlabü; hoba kanei kümbü amaibü kümsilei pendou kanei mangsenlabü.

⁴⁴Hobaje, O kan Israel mütli, ladang ngei kaneibü shedbü kümsilei ayingsi kanei amaibü kümbü thüng ayingko ngei kan to jungeilaje kheijinei kanei ngo BUNYUBOU ki dogo ngelabü,” dogo Thükenbou BUNYUBOUei lauda.

⁴⁵Hobaje BUNYUBOUeibü ngüh kü jungto loukei:

⁴⁶“Müteibü shou, kaibü thenyek yungthang ae sepeiashi; yungthang khulimbo songlenashi hoba yungthang yam khongthuyaang khulimbo thusei ngüh lenashi.

⁴⁷Hobaje yungthang ae yam to lenashi: BUNYUBOUeibü ngüh ditashi. Thükenbou BUNYUBOUei hai lauda: Chühashi! Ngei ka to wan saplabü, hoba hoei kaibü bulong sangtüngbü si linbü weko lonshemlabü. Wanlüh wanlong kho anyetlabü hoba yungthang ae ka yungkük ae sühko thenyek pendou hoei maaklabü.

⁴⁸Hobaje ngo BUNYUBOUei kho wan sapbei dogo mütpem wekoei haplabü; hoba kho anyetlabü.”

⁴⁹Kheijinei ngei laukei, “Ügütü, Thükenbou BUNYUBOU! Haoei ho ngühphatbü che ong lauda aying lo? dogo haoenei kü shangabü lauda.”