Read Chang Naga EZEKIEL 21 Bible Online

EZEKIEL 21 - Chang Naga bible

EZEKIEL 21

¹Hobaje BUNYUBOUeibü ngüh kü jungto loukei hoba laukei:

²“Müteibü shou, kaibü thenyek Jerusalem ae yeiashi hoba saoposhang khulimbo songlenashi. Israel kaodak khulimbo tetenashi

³hoba sao to lenashi: ‘BUNYUBOUei hai lauda: Chühashi, ngo no khulimbo kia. Ngei mepou ka inlou setenlabü hoba ka ka saopobü shuong hoba amaibü shuong pendou wapan aplabü.

⁴Aieilausi yungkük ka yungthang sühko ngei saopobü si asaopobü ham wapan apla shanga ngeibü in mepou to nyibou angailabü.

⁵Kheijinei müt pendouei ngo BUNYUBOUei ngeibü in mepou ka setenkei dogo ngelabü; hoba kho touje nyibou alongeilabü.

⁶“Hibü ngühashi, müteibü shou! Haoen thedanga maangpon leiluko hoba maangto shatbü yaangei nyi ngühashi.

⁷Hobaje ladang haoenei ka to, ‘Nyi aila ngühda?’ dogo phelaje, nyi laulabü, ‘Lousühko kibü ngühlang shangabü; aieilausi maangpon weko tühnyinlabü hoba ik pendou hau akiko aplabü; soushou weko semthetlabü, hoba youkük weko dei tegü hau akiko aplabü.’ Chühashi, kho lousühada! Kho kümlabü haang, dogo Thükenbou BUNYUBOUei lauda.”

⁸BUNYUBOUeibü ngüh kü jungto loukei:

⁹“Müteibü shou, tetenashi hoba lauashi, ‘BUNYUBOUei hai lauda: In, in, ho phametnyu uakei hoba lailaitham samenakei.

¹⁰Kho haitila shanga uakei, kho langpon maimai yingtila samena. Khünei maangmai angyobü kila athük, aishanga kü mütliei maangsanglabü si kayang weko nyikukei.

¹¹Haitibou ika junglabü lele ong inlou kho lailaitham samenan kia.

¹²Ngekashi hoba haapashi, müteibü shou, aishanga ho kü mütli thüka hoba Israel leiyeibü pendou thüka kia. Haoen pendou ngeibü mütli joubü shuong yoa liko haitilabü shuong ki. Hibü kaneibü khükjak to ipashi.

¹³Aishanga ngei kü mütli takteida, hoba haoen maangpon asepeilabü laualonga, khübü pendou haoen to haüthüklabü.

¹⁴“Hibü no, müteibü shou, thusei ngüh joyoashi. Kaibü ik ipashi hoba in kho nyibou louyantiashi, hoba kho semboukei louyantiashi. Ho haitibou in, haitibou in yaangbü ki!

¹⁵Hibü hoei haoeneibü maangpon tühnyinda hoba phaiyetda. Ngei haoen haitila shanga bakhün pendoua inlou phokuakei. Oh! haitila shanga ho langpon tegütham jajalalatham lotakei.

¹⁶O akbü inlou, nanae maeae ik shatashi, lae aeto ong kaibü thenyek sepeilaje wapashi!

¹⁷Ngei ngeibü ik iplabü, hoba ngeibü khauangbü koulabü. Ngo BUNYUBOUei kho lauan apa.”

¹⁸BUNYUBOUeibü ngüh kü jungto loukei:

¹⁹“Tokei no, müteibü shou, Babilon Chobaeibü in louenlabü lele nyi lam penyi chühan phoashi. Penyi ham kho kaonyek jetei ka khanglabü. Sangnyu lambheka shensinge che phoashi.

²⁰Nyi lamnyu che Ammoneibü shousi shuong Rabba khulimbo loula hoba lubü che kho Jihuda si thangtetan kibü Jerusalem khulimbo loulabü lamnyu chühletan phoashi.

²¹Aishanga Babilonbü Choba lamnyu penyi la bhekshang lambheka lolabü. Lambhek khonei haoei laujin shuong jungeiko phaang paklabü, haoei heangsho noksa to phelabü, hoba haoei lembü meisiaueibü senei silip jako takteilabü.

²²Chühashi, tou haoeibü mae ika jungbü shensinge kho ‘Jerusalem’ dogo kiteikei! Hoei hao to banyu kümthang tuyetko haula, haitilabü ngühkhüm kula, langh yaangbüei lashuok uihinla, bakhüna pangetlela, kao yaüenla, hoba latho phasei kümla shanga.

²³Hao to theyobü leabuba ho amlangbü soutakan chühda dogo ong Jerusalemei damlabü. Lausikei ho tetenbüei haoeneibü shedbüshabü laüa haoen langsenlabü shangabü damentida.

²⁴Hibü Thükenbou BUNYUBOUei hai lauda: Aieilausi kanei kaneibü shedbü damenlabü lele yeitisije kanei ngühkhüm leilubü danko hoba kanei kümbü kümsilei pendoua tang khitbü shabü haangjung khübü danko kan damentiko kisije kan langsenlabü.

²⁵“Hobaje no, O asaopobü Israel songdakbou, kaibü jihsiphai lousüha, kayang jihsiphai sühan apa.

²⁶Thükenbou BUNYUBOUei hai lauda: Choba khun sungenashi hoba kaibü khukai sungan phoashi. Ho shangied tegü ayinglabü: Phanga kibou tonenlabü hoba thükaenei kibou ton- yanlabü.

²⁷Lusakbü! Lusakbü! Ngei ho leilubü che la yeitilabü! Ho tükdebü ao shangabü yingkeije hao alou shongko aikei ajeileilabü; hao la ngei kho kulabü.

²⁸“Hobaje no, O müteibü shou, thusei ngüh joyoashi hoba lenashi: Ammonbü shousi shuong shangabü hoba haoenei nyikubü shangabü Thükenbou BUNYUBOUei hai lauda: ‘Inlou, inlou, haitila setenan kia, langpon tegü ponko shemtila shanga samenan kia.

²⁹Kan shangabü amlangbü mangsang hoba thulenbü kubü jeila, ho haitilabü müt amaibü shuongeibü ngüma tenkulabü, aoyoueibü jihsiphai, khei aoyoueibü thonbü matjem kayang chalou lousühan apa.

³⁰“ ‘Inlou kho mepou to ngaitiashi! No kümshang hoba no bukbü kaodaka ngei no mat jemlabü.

³¹Hobaje ngei ngeibü khauang ka thükto khüpan jinkulabü hoba ngo maangpokbü ngei ka thükto metan jinkulabü; hoba ngei no kaangbüsekbü hoba müt haitila sekokbü ik to khümbo kulabü.

³²No wan shanga bu yinglabü. Kaibü kaonyeka kaibü sii phinlabü, hoba no touje adamenlabü.’” Aishanga ngo BUNYUBOUei laua.