Read Chang Naga EZEKIEL 22 Bible Online

EZEKIEL 22 - Chang Naga bible

EZEKIEL 22

¹BUNYUBOUeibü ngüh kü jungto loukei:

²“Müteibü shou, nyi sii phinbü sangnyu mat jemlep lo? Kholonga sao la saoeibü mangsenlabü kümsilei pendou damentiashi

³hoba laushi: Thükenbou BUNYUBOUei hai lauda: Aieilausi nyi kaibü jembü mütli juongnyu haitikei hoba heangsho lembü danko no lolo shatikei, khoei kaibü jihsiphai kho sühjung louda.

⁴Nyi lolo jembü sii phinbüa no shedla yeida, hoba nyi kümbü heangshoei no shedan apa. Nyi kaibü chalou nyangbou to loutikei, hoba kaibü po thonbü sühjung loutikei. Hibü ngei no phang pendou shanga haklabü hoba kaonyek pendou thedanga akhainyu yeitilabü.

⁵Aoyou no nyangko ki hoba aoyou ka jungka saako bangan ki haoenei ka la nyikulabü, O no, oyolemenei shenbü nyenshedbou sangnyu.

⁶Chühashi, kan yoa Israel khuleibü shuongei haoeneibü hau pendou sii phinbüa kuda.

⁷Sangnyua kanei nyusibou aweasüngda. Kanei kan yoa homan kibü yenbou shuong shieikoeko jungeida hoba shoujitshou si latnyu shuong amaiko jungeida.

⁸Nyi ngeibü saopobü peisilei shuong awealau, hoba nyi ngeibü Nounyet shatikei.

⁹Kan yoa müt haitila jukbüsabü shuong at kia, hoba kan yoa müt at heangsho to lembüsabü shausiyung shaubü kia hoba müt at nyekdüh maangdüh loushedtibou shuong kia.

¹⁰Kan yoa at jembüeibü bousi shuongeibü yaksi to jambü ki; kan yoa at yaksa mang asaopojinei tukosekko jambü kia.

¹¹Kan yoa atei jembü lepboueibü yak to mangsenlabü kümsilei jungeida, hoba atei thedüh maangdühei jembü shoueibü yak shatida, hoba kan yoa atei jembüeibü na, khei nyumaunyueibü shou shatida.

¹²Kan yoa sii phintila besa anyem leda; hoba nyi kaibü lepbou la lotkubü ka aeilam aeiphopei phobnam leko pailetda. Hobaje ngoje maan apakei,” dogo Thükenbou BUNYUBOUei lauda.

¹³“Chühashi, nyi maang alanbü pailetbü lebü hoba kan yoa sii phintibü shanga ngeibü ik seman ngümlabü.

¹⁴Ngei kan khei jungeibü chaloua kan to maangkhai ayingsi kaneibü ik shingla hau kiteilep lo? Ngo BUNYUBOUei joyoa hoba kho kümlabü.

¹⁵Ngei kan phangshuong yoa phinnyintilabü, hoba ngei kaonyek shuong jungto lintilabü; hoba kaibü ihinseibü kümsilei thonbü che to loutilabü.

¹⁶Hobaje ladang no phangshuongei hapbo shaanlaje, kheijinei nyi ngo BUNYUBOU ki dogo ngelabü.”

¹⁷Kheijinei BUNYUBOUeibü ngüh kü jungto loukei:

¹⁸“Müteibü shou, kü thedanga Israel chemdang namphet la yeiakei; haoen pendou yaüshema chisaknam, tinnam, nammai hoba shisanam phatko ki, haoen chandinam phet ki.

¹⁹Hibü Thükenbou BUNYUBOUei hai lauda: Kan pendou nam- phet lansan yingbü ka, chühashi, ngei kan Jerusalema kamshaitilabü.

²⁰Mütei chandinam, chisaknam, nammai, shisanam hoba tinnam wanei juokko tühnyinla yaüshema onshaibü tegü, ngei ngeibü khauang longbü hoba ngeibü maangshata kan sangnyu to leishailabü hoba khonei tühnyintilabü.

²¹Haü, ngei kan leishailabü hoba ngeibü khauang maangpok wan kan la metan jinkulabü, hoba khonei kan tühnyinlabü.

²²Chandinam yaüshema tühnyinbü phatko kan sangnyua tühnyintilabü, hoba ngo BUNYUBOUei kan thükto ngeibü khauang maangpok khüpan jinkuakei dogo kanei ngelabü.”

²³Tokei BUNYUBOUeibü ngüh kü jungto loukei:

²⁴“Müteibü shou, Israelbü to lenashi, khei haoeneibü kaonyu kho asaopobü ki, khoei ngei ngeibü kauang maangpoka shieikoeda.

²⁵Aishanga kaonyeka songdakbü shuong kho molosaonyuei ngühko, jembüei haitian, shaula meisiau phenthetbü phatko ki; haoenei müteibü langkei suida, haoenei nyaksinam si namsek peisilei soda hoba haoenei saoshuong juong latnyu la yeitida.

²⁶Saoeibü ungshedbou shuongei kü ngühkhüm leiluda, hoba ngeibü saopobü peisilei shuong shatida; haoenei saopobü si takübü kümsilei abangnyinda; hoba haoenei ngeibü Nounyet shuong weeiko aki. Kho tegütham Israelbüei ngo shatida.

²⁷Saoeibü khuleibü shuong kho haitibü meisiau phenthetbou sho shuong phatko ki. Haoen keila yaangla shanga haoenei müt haitida.

²⁸Haoeneibü thuseibü shuongei tokei haoeneibü kümthanga shini son naangko haoen to amlangbü mangsang lenko amlangbü thu tetenkuda. BUNYUBOUeije ajoyonyu, ‘BUNYUBOUei hai lauda,’ dogo haoenei lenda.

²⁹Kaonyek kabü naangmaibü mütshuongei khü- pettida hoba soshau soyungda. Haoenei shalebü shieikoeda hoba küksithangbü amaiko jungeida.

³⁰Ngei haoen yoa kümthang yaüla hoba kaonyek lusakbü lothetko püetla, ngei kho leilutila kibü ka thangetla shanga müt che laman chühkei, lausikei ngei che ongkei ühüp.

³¹Hibü ngeibü khauang maangpok haoen la khü- pan jinkulabü, ngeibü khauangbü wanei ngei haoen mautilabü, hoba haoeneibü kümsilei shuong ngei haoeneibü khua kün lekulabü, dogo Thükenbou BUNYUBOUei lauda.”