Read Chang Naga EZEKIEL 23 Bible Online

EZEKIEL 23 - Chang Naga bible

EZEKIEL 23

¹BUNYUBOUeibü ngüh nyibou kü jungto loukei:

²Müteibü shou, nyu cheeibü shou yaksashou müt nyi kikei.

³Hobaje haosi medei jiha Ijepa kijinei saosüngbü haang mautikei hoba suonlam kümsilei kümbei.

⁴Noushounyueibü nyen Ohola hoba naeibü nyen Oholiba kikei. Hobaje haosi ngeibü yak la lekei, hoba haosiei nouyang jayangshou bukkukei. Ohola kho Samaria hoba Oholiba kho Jerusalem kikei.

⁵Hobaje sao küyak yingasikei, Oholaei suonlam kümsilei kümbei hoba saoei sao to nyekthebü Assiriabü shuong to saoei aeibou sanoukei.

⁶Haoen kho nakthüngan sakbü neisimei lebü kikei, governor shuong hoba lakjaibü shuong; haoen pendou süngsilop maibü heshou shuong kolia setbü koli sepai shuong kikei.

⁷Hobaje saoei haoen to maangdühkei hoba haoeneibü heangsho pendou yoa saoei jembü lolo totkei.

⁸Ijep ka leian loubü jihsiphai ka thama saoei suonlambü üpyo, laonei saoei saosüngbü haang mautikei. Sao yaksa nashou che ong kijinei ka jaüan bousuei sao junga yepbei hoba suonlambü che hima jungeikei.

⁹Hibü saoei suletbü sao to sanoubü Assiriabü ikto ngei sao khümbo kukei.

¹⁰Haoenei sao mütkong phokukei, saoeibü jayang nouyangshou shuong laplangkei hoba haoenei sao inei wapettikei. Yaksa shuong yoa sao shangabü tetlaltalabü ngüh che la yeikei, aishanga haoenei sao thüka mat jembei.

¹¹Saoeibü na Oholibaei kho hapasikei, sao aeiko Ohola tokei amaibou nyekdüh maangdüh hoba suonlambüa kiteikei.

¹²Hobaje saoei Assiriabü governor shuong hoba saoeibü yaangenbü shuong, soumo aeibou kiko hele lebü shuong, koli sepai shuong hoba hemaibü heshou shuong to dühbü yaang kikei.

¹³Hobaje saokei totnyina dogo ngei hapbei; haosi hamei lamnyu jeteibüa paikei.

¹⁴“Lausikei saoei sao suonlambü aei ong yeitikei. Aishanga Khaldibü noksa mangkei shouko saklangbü laüei kümbü

¹⁵shembe neiei kaian lean, laama hambü neiei khua kaian haoen bukmüt kao Khaldia Babilonbü phatko haoen pendou chühla leiyeibü shuong tegü noksa kümthanga saoei hapbei.

¹⁶Saoei haoen hapsilengko saoei haoen to dühkei, hoba haoen jungto Khaldi to ngühlang künbü hautikei.

¹⁷Hobaje Babilonbü saoeibü sanou yepshang to lotkei. Haoen sao jungeikei haoenei sao totnyinkukei hoba sao haoen yoa ihinseiko apbei hoba lepde haoen to saoei mangsenko bangkei.

¹⁸Hibü saoei sao suonlambü hoba sao mütkongbü ngean aptikei, kheijinei ngeibü soushouei nou to mangsenko bangkei.

¹⁹Khei yingasikei sao Ijepa suonlambü tokei aei, sao medei jih damenko sao suonlambü aei yeitikei.

²⁰Hobaje saoei khongkabü laosi shuong, aoyoueibü dühbü gadueibü ayingsi kolieibü tegütham kikei, khübü to dühbüei shenkei.

²¹Kho tegü Oholiba, nyi no yaksa nashoua Ijepa kijinei kaibü senlanga jungbü hoba sen alibüa nyatbü thedüh maangdüh nyi nyibou dambo loutida.

²²“Hibü, O Oholiba, Thükenbou BUNYUBOUei hai lauda: Chühashi, nyi mangsenko bangbü kaibü sanoubü shuong ngei no khulimbo longtilabü, hoba pendou aeka haoenei no khulimbo leian loulabü.

²³Ngei Babilonbü hoba Khaldibü pendou, hoba Pekod, Shoa hoba Koa ka, hoba Assiriabü pendou leibalabü. Ngei ngeibü süngmai lopmai heshou shuong, governor shuong, hoba haoeneibü lakjaibü pendou, nyenshen mütshuong hoba kolia setbü shuong pendou leishailabü.

²⁴Hobaje haoeneibü insiaubu, koli kailong si tongjin kailong, hoba phangshuong tan yoa no khulimbo loulabü. Haoenei no kaijembo thangetlabü aih haanbü hoba nameibü khun pholabü hoba ngei haoen la matjem kulabü hoba haoeneibü matjem younak haangei ka la kayang kulabü.

²⁵Ngei ngo nyekto shatbü kakhu limbo pholabü hoba haoenei ka to maangshat lamlam kümlabü. Haoenei kaibü kung si nou shipan apbulabü hoba kaibü shousi shuong haitilabü. Haü, haoenei kaibü jayang nouyangshou shuong ka ka sunglabü hoba joubü shuong wana lang juokettilabü.

²⁶Haoenei tokei kaibü neisimei hangletkulabü hoba kaibü namsek chisiyak sunglangkulabü.

²⁷Kho tegü kaibü maangdüh kho thaktikulabü hoba Ijep kaodak ka sungbabü kaibü pejapela ka ka ngei thaktilabü. Nyi touje kaibü nyekei haoen to adühlabü, ayingsi Ijep touje adamenlabü.”

²⁸Aishanga Thükenbou BUNYUBOUei lauda: “Chühashi, ngei no nyi mangsenbü mütshuongeibü ik to, khei nyi mangsenko bangbü ika khümbo kulabü.

²⁹Hobaje haoenei ka to mangsenko jungeilabü hoba nyi mouenbü pendou sunglangkulabü, hoba no mütkong apyolabü, hoba kaibü suonlambü tang khittilabü. Kaibü maangdüh si kaibü pejapelaei

³⁰khübü kho ka thükto sungbakei. Aieilausi no phangshuong shanga suonlamnyu che kiteikei hoba haoeneibü heangshoei jembü lolo shakei.

³¹No kaibü noueibü lama paikei, hibü jeteibü kayang thung yungla kulabü.”

³²Thükenbou BUNYUBOUei hai lauda: “Nyi kaibü noueibü thung ka yunglabü; laobou haülangtham hoba yaangbü ki kho ka yunglabü. Mütpem wekoei haklabü hoba nyikulabü; thung kho shenettiakei.

³³Hoei no khonkubü hoba ihjaak yeitilabü, hoba hatbülühbü hoba lusakbü thung kho, kanou Samariaeibü thung ki.

³⁴Nyi kho yunglabü hoba sopan aplabü, hoba kho chakkok nyinbüei kaibü sen jitnyinlabü. Aishanga ngei joyoa, dogo Thükenbou BUNYUBOUei lauda.”

³⁵Hibü Thükenbou BUNYUBOUei lauda: “Aieilausi nyi ngo maan apbei hoba kü la kaibü phaiae yeikukei, no kaibü maangdüh hoba kaibü suonlambüei khonkulabü.”

³⁶BUNYUBOUei kü to laukei: “Müteibü shou, nyi Ohola si Oholiba mat jemlep sai? Kholonga haosieibü mangsenlabü kümsilei shuongei haosi yuktiashi.

³⁷Aishanga haosiei asangalan shonkei hoba khoeibü sii haosi ika kia. Haosiei haosieibü heangsho yoa asangalan jungeikei; haosiei kü la bukkubü shousi shuong juokbü lembü kukei.

³⁸Hobaje haosiei kümbü kho ong aying. Haosiei ngeibü Lembüchem shatikei, hoba Nounyet shatikei.

³⁹Aishanga haosiei ngeibü shousi shuong heangsho la haitian lemla kunyet haosi ngeibü Lembüchem to loukei hoba kho shatikei! Kho tegütham haosiei ngeibü chema jungeikei!

⁴⁰“Haosiei tokei tokei saabü ka mütshuong chila ngühlang künbü hautikei, hoba ladang haoen lousühkei, kheijinei nousinanyiei mang yukei hoba nyeka son naangkei hoba chühjanko hele lekei.

⁴¹Hobaje soumo kibü yepshang thüka haoen thedanga khümsok che lamlekuan kibü junga haosiei ponlem hibü hoba onang shimtian phokuan khonei haosi setkei.

⁴²Khünei saonyi kaijembo ekyonyiyoko kibü langh ditkei; phetsen kao ka Sabeabü shuong yoa sousiwat mütshuong yoan leibaan kikei. Haoenei saonyieibü ika chikhap hangan jinkukei, hoba haosieibü khua khun maibü hankukei.

⁴³Kheijinei ngei asangalanei hüshuokan kibü shangabü laukei, ‘Tou haoenei sao kho suonlamnyu la nalea, aishanga sao kheibü la lelabü ong joukei.’

⁴⁴Hobaje haoen suonlamnyunyi jungto tokei tokei atkei. Haoen peja- pelabü yaksanyi, Ohola si Oholiba jungto ngaikei.

⁴⁵Lausikei saopobü mütshuongei asangalanbü yaksa shuong thükto kayang kukei, aieilausi haosi asangalan sao, hoba haosi ika sii phinbü ki.”

⁴⁶Aishanga Thükenbou BUNYUBOUei hai lauda: “Haoen khulimbo tan che leiba hoba haoen la khonku hoba leilutibü kuashi.

⁴⁷Hobaje mütshuongei haoen to laangei sonashi hoba in jungan shiashi hoba haoeneibü jayang nouyangshou shuong haitiashi, hoba haoeneibü chem wanei thean apbuashi.

⁴⁸Kho tegü ngei kaonyeka pejapela thontikulabü, khei yaksa pendouei asangalana haosi nei anoutila maangsanglabü lenlabü.

⁴⁹Hobaje kasi nousinanyikei ngei kasieibü pejapela hoba heangsho lembü shabü shanga shieikoelabü. Kheijinei kanei ngo Thükenbou BUNYUBOU ki dogo ngelabü.”