Read Chang Naga EZEKIEL 24 Bible Online

EZEKIEL 24 - Chang Naga bible

EZEKIEL 24

¹Langsenbü po güboubü, lit anboubü, chalou anbounyet, BUNYUBOUeibü ngüh kü jungto loukei:

²“Müteibü shou, tat chaloutham nyi chalou dolet- ashi, aieilausi tat chaloubou- atham Babilonbü Chobaei Jerusalem komlepla khangda.

³Hobaje ngüha alebü chung to ngühphatbü che joyoashi, hoba haoen to lenshi: Thükenbou BUNYUBOUei hai lauda: Khaüchak wana hangashi, hoba kho deiei soptiashi.

⁴Khonei phe netshou maiboutham jinashi, kho youshi phejak si phak phejakei, khei pienbü lo maibüei shentiashi.

⁵Pienbü sanlon tan ka sungenashi; chak phanga bu shangashi. Dei tühtiashi; lo si phemai maisho thungashi.”

⁶Hibü Thükenbou BUNYUBOUei hai lauda: “Sii angtibü sangnyu shanga ügütü! Ho ladangkei asambü tüh baubü chak che phatkei. Hibü khünei kibü tüh ajoutiko che chea peikhümashi.

⁷Aishanga saoei phintibü sii sao to kia; lausikei sii kho thamei küpleplabü lele kaomaia asangti; saoei kho laangdaka sangtiakei.

⁸Khauang longko phoklam naloula shanga kho aküpletlabü lele ngei saoeibü sii kho laang thüka phokukei.”

⁹Hibü Thükenbou BUNYUBOUei hai lauda: “Sii angtibü sangnyu shanga ügütü! Ngei wanlong toukei yaangtila bu jikyokulabü.

¹⁰Bu juongko shangashi! Wan kho souashi! Phe kho yingko thungashi! Shikdei kho ontiashi! Losilak shuong jikan apashi.

¹¹Touje chisak namchak kongbü kho wankaka hangashi hoba saklangtham juokentiashi. Kheijinei namtüh kho khokletan phaiaje jungeila saüenbü yinglabü.

¹²Lausi dogokei latetche auko juoklaje juokasikei kho mak shangbü khoje akhokletlabü.

¹³Hibü, O Jerusalem, kaibü pejapelabü kümeileiei no shatia. Ngei no saüenkula haujemsikei no khei ong totnyinan ki. Ka thükto ngeibü khauang maangshat alotshongko no nyibou ihinseilabü.

¹⁴Ngo BUNYUBOUei kho joyoa. Kho kümla kü shanga jihsiphai lousüha. Ngei kaibü shabü awailetlabü, ayingsi onouko akilabü ayingsi üeisanou alenlabü. Kaibü kümsilei thüng no mat jemlabü,” dogo Thükenbou BUNYUBOUei lauda.

¹⁵BUNYUBOUeibü ngüh kü jungto loukei:

¹⁶“Müteibü shou, chühashi, ngei ka nyek to loubou kho ikok cheei sunglanglabü. Khei yingasikei nyi mang ühaaplabü ayingsi ühaapjan ayingsi kaibü nyek ka nyeksi üangjan.

¹⁷Ngüh alongko maangngangshi, haibü shanga mang tühaap. Manghaap küktet kaibü khua akhaiko ayingsi kaibü youa ngok alonko tohau. Kaibü sembung teküplet ayingsi mang haapbü shausiyung teshau.”

¹⁸Hibü ngei mütshuong to ngeyang kho tegü joyokei, hoba chasem kü yak haikei hoba nyibounyet ngei kü la sakkubü tegü kümbei.

¹⁹Hobaje mütshuongei kü to phekei, “Nyi hai kümbü ho kün shanga ai ngühtet yingkeije kün la alenlep lo?”

²⁰Hibü ngei haoen to laukei, “BUNYUBOUeibü ngüh kü jungto loukei:

²¹Israel chung to lenashi: Thükenbou BUNYUBOUei hai lauda: Chühashi, kan Lembüchem shanga yonglamyoda. Kanei khüto chühmang sühda hoba kanei kho pean chühmang sühda, lausikei BUNYUBOUei kho shatila kümda. Hobaje Jerusalema jouletbü kan chemdang kabü jayang nouyangshou shuong kho lasona inei hailabü.

²²Hobaje ngei kümbü maimai kanei kümlabü. Kanei kaneibü sembung aküpletlabü ayingsi manghaap shausiyung ashauayunglabü.

²³Kanei khua akaiko ayingsi youkong apailabü ayingsi mang ühaaplabü ayingsi ühaaplabü. Kaneibü shabü hangjung kan linetlabü, hoba kan cheei che to ngühyoko kilabü.

²⁴Kheijinei Ezekiel kan shanga tetsida che kilabü; haoei kümbü tegütham kanei kümlabü. Ladang ho loushadlaje kheijinei kanei ngo Thükenbou BUNYUBOU ki dogo ngelabü.”

²⁵BUNYUBOUei laukei, “Hobaje no, müteibü shou, ngei haoen ka, hau kibü Lembüchem, laobou haoeneibü nyek to loubou hoba pean chühmang sühbou, haoeneibü yonglam hoba olinbü ki, kho langkulabü. Hobaje ngei haoeneibü jayang nouyangshou shuong langkulabü.

²⁶Khünyet chaloua satenbü yo ka at louan kan la kho ngühlang lenlabü.

²⁷Kho chaloua ao satenan ki hao jungto kaibü sembung iplabü hoba nyi ngüh laulabü hoba touje li akhiplabü. Hibü no haoen thedanga shenla ngelabü che kilabü hoba haoenei ngo BUNYUBOU kia dogo ngelabü.”