Read Chang Naga EZEKIEL 25 Bible Online

EZEKIEL 25 - Chang Naga bible

EZEKIEL 25

¹Hobaje BUNYUBOUeibü ngüh kü jungto loukei:

²“Müteibü shou, Ammonbü aeto kaibü thenyek sepeiashi hoba haoen khulimbo tetenashi.

³Ammonbü shousi shuong to lenashi, ‘Thükenbou BUNYUBOUeibü ngüh ditashi. Thükenbou BUNYUBOUei hai lauda: Aieilausi ngeibü Lembü- chem shaan apjinei, hoba Israel kaodak sangliphang la yeitijinei hoba Jihuda mütli shuong langsenbü to haujinei nyi, “Akhai!” dogo laukei.

⁴Hibü chühashi, chaangbou aekabü shousi shuong la letila shanga ngei no khümbo kulabü. Hobaje haoenei ka to otshang kümlabü hoba khonei sang sanglabü. Haoenei kaibü buhek shaulabü hoba kaibü sendei yunglabü.

⁵Ngei Rabba ut shuong shanga lamshaushang yeitilabü hoba Ammon kaonyek khümbo sanshuong shanga yepshang yeitila ngei no khümbo kulabü. Kheijinei kanei ngo BUNYUBOU kia dogo ngelabü.

⁶“Aishanga Thükenbou BUNYUBOUei hai lauda: Aieilausi nyi olinbüei kaibü ik ipbei hoba you jembei. Nyi Israel kaodak khulimbo kaibü maangpona nyikukei,

⁷hibü chühashi, ngei kakhu limbo ngeibü ik tuoklabü hoba phangshuong la shitila shanga khümbo kulabü. Ngei no mütli yo ka wapan aplabü hoba ngei no kaonyek ka lemailela mauan aptilabü. Ngei no mautilabü hoba nyi ngo BUNYUBOU kia dogo ngelabü.”

⁸Thükenbou BUNYUBOUei hai laukei, “Aieilausi Moab si Seirei laukei: Chühashi, Jihuda mütli lubü phangshuong phatko yeia.

⁹Chühashi, ngei Moabeibü jiphei leilang kabü sangnyu shuong ka shanenbü sangnyu shuong khei Bet Jeshimot, Baal Meon, hoba Kiriathaim yoan shitilabü.

¹⁰Ngei Ammon yoan Moabeibü chaangbou aekabü shousi shuong la letila kuan aplabü, hibü phangshuongei touje kho adamenlabü.

¹¹Kho tegü ngei Moab thükto mat jemlabü, hoba ngo BUNYUBOU ki dogo haoenei ngelabü.”

¹²Thükenbou BUNYUBOUei laukei, “Aieilausi Edomei Jihuda chung khulimbo maangshat lamlam phoklambei hoba kho maangshat phoklamei Edom to lole shed shonkei.

¹³Hibü Thükenbou BUNYUBOUei hai lauda: Ngei Edom khulimbo ngeibü ik shinglabü hoba khükabü mütshuong si meisiau haitilabü. Ngei kho sangliphang la yeitilabü hoba Teman ka Dedan sühko haoen inei shemtilabü.

¹⁴Edom thükto ngei kü mütli Israelbü ik danko phoklamlabü, hoba haoenei ngeibü khauang si maangshat thüng Edom to jungeilabü; hoba haoenei ngeibü phoklambü ngelabü,” dogo Thükenbou BUNYUBOUei lauda.

¹⁵Thükenbou BUNYUBOUei laukei, “Aieilausi Filistiabüei maangshat lamlam phok lambei, hoba maangpona thon akibü nyikubü dangbülebüei Jihuda mautila jungeikei.

¹⁶Hibü Thükenbou BUNYUBOUei hai lauda: Chühashi, ngei Filistiabü khulimbo ngeibü ik shinglabü hoba Keretbü ngei wapan aplabü, hoba yungkoa joubü shuong mautilabü.

¹⁷Hobaje ngei haoen thükto hatla moklabü khauang yaangei phoklamlabü. Hobaje ladang ngei haoen thükto phoklamlaje kheijinei haoenei ngo BUNYUBOU ki dogo ngelabü.”