Read Chang Naga EZEKIEL 26 Bible Online

EZEKIEL 26 - Chang Naga bible

EZEKIEL 26

¹Kün langsenbü po anthük- che boubü lita chalou shaangbounyet BUNYUBOUeibü ngüh kü jungto loukei:

²“Müteibü shou, aieilausi Tairei Jerusalem khulimbo ‘Akhai’ dogo laukei! Phangshuongeibü bakhün sakleda, hoba khoeibü koukap shuong kü shanga ipan apa; touje sao leiluan apabü ngo naangmailabü.

³Hibü Thükenbou BUNYUBOUei hai lauda: Chühashi, O Tair, ngo no khulimbo kia, hoba ngei yungnyuei lai haoeibü deishou longtida kho tegütham, no shila phang juong loutikulabü.

⁴Haoenei Tair kümthang shuong leilukulabü hoba saoeibü lapheishon shuong panletkulabü. Hobaje ngei sao ka kaomai pendou kuanaplabü hoba sao laangkudak ong yeitilabü.

⁵Sao sangnyua ngau lapbü shuongeibü tak lamshang yeilabü, aishanga ngei kho lauan apa, dogo Thükenbou BUNYUBOUei lauda. Sao phangshuong shanga soletshang la yeilabü,

⁶hoba khongthua saoeibü jayang nouyang shuong inei haitilabü. Kheijinei Tairei ngo BUNYUBOU ki, dogo ngelabü.”

⁷Aishanga Thükenbou BUNYUBOUei hai lauda: “Chühashi, Choba shuong pendou to yaangbou, Babilonbü Choba Nebukhadnez- zar, Tair khulimbo leibalabü. Hao yungthang aeka koli shuong hoba koli kailong shuong hoba kolia setbü shuong yoa sepai tan yaangbü yoa loulabü.

⁸Haoei kaibü jayang nouyangshou shuong khongthua inei wapettilabü. Labou shuongei no khulimbo phasei kümlabü, shongh suoketnyu yaülabü hoba kaibü kümthang limbo aihei thanglepnyu yaülabü.

⁹Hobaje kaibü kümthang shuong danthetko haoei tuyetlabü buthem pholabü hoba wouei kaibü lapheishon jangnyinkulabü.

¹⁰Haoeneibü koli shuong juongsapbüei haoeneibü thamnguei no khuileplabü. Koli shuong, koli kailong shuong hoba koli sepai shuong, tuyetbü sangnyu bakhün danko nujung danbü langhei kaibü kümthang shuong nyaakeilabü.

¹¹Haoeibü koli shuongei kaneibü khongnyu peiko nakeilabü hoba kaibü mütli shuong inei haitilabü hoba kaneibü haukibü heangsho thaonyu shuong kao to lotlabü.

¹²Hobaje kaneibü nyaksinam haoenei aaklabü hoba kaneibü namyaknamsei solanglabü. Haoenei kaneibü kümthang shuong leilukulabü hoba kaneibü shanenbü chem shuong panletkulabü hoba kaneibü laang hoba kaneibü waphei hoba kaneibü kao khümbo haoenei simaang to jinkulabü.

¹³Kanei chia laubü ngühlang ngei thaktikulabü, hoba kaneibü kongkin ngühlang touje adittilabü.

¹⁴Hobaje ngei no laangkudak maimai yeitikulabü hoba no ngaulapbü shuongeibü tak lamshang la yeilabü. Sangnyu touje ladangkei akümetkulabü, aishanga ngo BUNYUBOUei kho laua, dogo Thükenbou BUNYUBOUei lauda.”

¹⁵Thükenbou BUNYUBOUei Tair to hai lauda: “Ladang kan shian aplaje, haitibü shuong haapyo wiyobü langhei yungko kaonyeka kibü mütshuong hatyo mokyolabü.

¹⁶Kheijinei yungko kabü Choba shuong pendou Choba setshang ka louyanlabü hoba haoenei neisimei hangletnyu pholabü, hoba noksa jinbü neisimei khokan aplabü. Haoenei sensentham lühko nei neilabü, haoen kaoa setlabü, hoba jih weko lühlabü hoba kaibü thu to maangpanglabü.

¹⁷Hobaje haoenei ka shanga ho manghaap chia laulabü: O nyenhang sangnyu, no lai maukei! Saoeibü longchem yungnyu ka ühüpbo apbei. Ho sangnyu mütshuongei yungnyu thüka songdakkei Hobaje yungkoa kibü shuong pendou hattiko kikei.

¹⁸Tou ho tuongbü chaloua, Su kaodak shuong lühda, Hobaje kho tuongbüa haoen mütshuong hatyoda.”

¹⁹Thükenbou BUNYUBOUei lauda: “Ngei no müt akishang sangliphang sangnyu shuong phatko yeitikulabü. Ngei no haülangbü yungnyu deiei küpletkulabü.

²⁰Kheijinei ngei no shangiedbü mütshuong yoa yola yemlam kaodak to yantilabü. Ngei no leilubü shuong yoa, kaonyumanga haibü shuong yoa kitilabü. No ladangkei alongeilabü ayingsi langkeibü shuong yoa kishang kaoen akimlabü.

²¹Ngei no lepde maushang dangtilabü hoba no touje akilabü. Mütshuongei no lamla thükkei, lausikei no touje ladangkei ühüplabü, dogo Thükenbou BUNYUBOUei lauda.”