Read Chang Naga EZEKIEL 27 Bible Online

EZEKIEL 27 - Chang Naga bible

EZEKIEL 27

¹BUNYUBOUeibü ngüh kü jungto hai lenko loukei:

²“Müteibü shou, Tair shangabü mang haapashi.

³Yungnyu yungko lamnyua setbou yungko kaodak pendou aenei kibü mütshuongeibü namyak namseibou Tair to, ‘Thükenbou BUNYUBOUei hai lauda,’ dogo lenshi: O Tair, nyi lauda, ‘Ngo hemai saomaia penbüsoubü.’

⁴Kaibü chem kho yungnyu ki. No kümbou shuongei kaibü hemaisaomai pentisoutia;

⁵Haoenei kaibü waphei pendou Hermon Shongh ka, fir buei kümbei Hobaje kaibü thaonyu shanga Lebanon ka cedar bu sungbakei.

⁶Haoenei longlei waphei kümla shanga Bashan ka yembu sungbakei; Haoenei Kupra su ka shon shanga busimei kümbei Hobaje kho thunyu hauhei shuian kümbei.

⁷Kaibü longlei nei kho inyaibü neiei kümbei, Ijep ka noksa jinbü inyaibü nei maibü, khei usa ka sosotham shenko kikei. Elisha su ka sangtüngbü si nakthüngan sakbüei Kaibü yemekoubü küman kikei.

⁸Kaibü longlei waphei kho Sidonbü si Arvadbü shuong kikei. O Tair, kaibü songbüdobü shuong kho longleibü dan kikei.

⁹Longchemeibü mistri shuong kho Gebalbü kabü sonenbü jaishou shuong kiteikei. Yungmanga haubü longchem leibü dan weko ka Kaibü namseishanga namyaksamsei kümbei.

¹⁰“Persia, Lidia hoba Putbü mütshuong kaibü lakjaibü tan yoa sepai kümsileia khangenko kikei. Haoeneibü aih si namkhun kaibü kümthanga antian phokukei. Ka la soneikangbü thüksimin sungbabou kho haoen ki.

¹¹Arvad si Helekbü shuongei kaijeman kaibü kümthang lombo kikei; hoba Gammadbü mütshuongei kaibü lapheishon lombei. Haoenei haoeneibü aih kaibü kümthanga antian phokukei. No sao maitibou kho haoen ki.

¹²“Kaibü nyaksinam den juong kibü danko Tarshishei ka to jeiyoko namseikei, chandinam, nammai, tin, hoba shisanamei ka to jeiyoko namseikei.

¹³Javan, Tubal, hoba Meshekhei ka to namyak jekyokei; haoenei ka to aaomüt si chisaknamei lubü peisilei to jeiyokei.

¹⁴Nyi kaibü namsei peisilei shuong Beth Togarmabü mütliei kato koli, wapyobü koli, hoba gadu lu jeiyokei.

¹⁵Dedanbü mütshuongei ka to namyak jekyokei, hoba yungkoa kibü juong kaibü namseiyen kiteikei; haoenei kaibü peisilei lu ka la thunyu hauh si eboni kukei.

¹⁶Nyi peisilei juongnyu longtibü ka Siria mütliei ka ka nyaksinam juong jeklangkei. Haoenei ka la kaibü peisilei lu emerald, nakthüngle sakbü nei, noksa shuibü kümsilei, phembanei inyaibü, koral hoba namseklaang jeikukei.

¹⁷Jihuda si Israel kaodakei ka to namyak namsei kümbei; haoenei Minnith ka whet youshou, oliv onang, naodei, onang hoba maitibü moli yakyo jekyokei.

¹⁸Kaibü nyaksinam juong hapshang kibüei hoba kaibü nyaksinam den juong kibü danko Damaskaei ka to Helbon ka ih hoba Zahar ka thupaibü wiei namyak seiyokei.

¹⁹Uzal ka Danitbü si Grikbü shuongei ka to neisimeiei seiyojekyokei; namsak, budei hoba kalamus khübü kho kaibü namyak peisilei to jeiyokei.

²⁰Dedan mütshuongei meisiau taka müt setla imbü nei ka la yaakkukei.

²¹Arabia si Kedar kabü leiyeibü shuong pendou kaibü namseiyen kikei; haoenei ka la san shoushou, sanlon paang hoba lon yaakkukei.

²²Sheba si Raama kabü namseibü danei ka to yaakyo jekyokei; kaibü peisilei shanga haoenei ponlem maiboutham hoba namsek laang, hoba hon kukei.

²³Haran, Kanne hoba Eden sangnyu shuong, Shebabü namyak namseibü shuong, Ashur si Khilmad sangnyu shuong, haoen pendouei ka to nam seiyokei.

²⁴Kaibü namyakshanga haoenei ka la shanenbü neisimei, nakthüngle sakbü, hoba noksa shuian kümbü, shuishuilelebü amnyu, hoba maisho yikyoan shenbü janglüh yaakkukei.

²⁵Tarshish kabü longchem shuongei kaibü namyak peisilei künkei. No yungnyua onei manetnyu kibü Longchem che phatkei.

²⁶Kaibü longchem leibü shuongei no dei haübü aeto leibakei, Chaangbou yeiei no yungnyu jenyua leilutikei.

²⁷Kaibü nyaksinam, seibütakbü peisilei shuong, Kaibü longchem leibü shuong pendou, Kaibü longchemeibü mistri si kaibü namseibü dan, Longchema atan kibü sepai shuong pendou, Ladang kaibü longchem lusakkei Kheijinei khümbomeiko yungnyua shema.

²⁸Kaibü longleibü shuongei ngekbü ngühlangei Yungko nyaakeilabü.

²⁹“Longchem pendou inleda, Hobaje longleibü pendou yungko to sada.

³⁰Haoen pendouei haoeneibü khu to tham mokan jinko Hobaje tapa lekeiko ka shanga khauektham mang haapda.

³¹Haoenei ka shanga haoeneibü khu shuan apda. Hobaje haoen lolo senounei neida. Haoen ka shanga mang haapjinei maang laakda.

³²Haoenei ka shanga manghaap chia atda: ‘Yungnyua sangsembo kibou Tair to ao takteiyola?

³³Ladang kaibü namyak namsei yungnyua haukei, Nyi phangshuong khambü senyühshemtikei. Nyi kaibü nyaksinam juongbüei Kaodak Choba shuong keitikei.

³⁴Tou no yungnyua lusakan kia; No yungnyu haübüa shemjung atan leiluakei. Kaibü namyak peisilei shuong Hobaje ka shanga kümbüleibü shuong pendou Ka yoa liko simaanga maua.’

³⁵“Sukoa kibü pendouei kaibü thu hapan maangpangda; haoeneibü Choba shuong hatbümokbüei shena hoba haoeneibü thenyek maangmauei shena.

³⁶Phangshuong yoa namyaknamseibü shuongei kaibü thu to mokde apyoda; no hatlamoklabü thonshang che to loua hoba touje no ladangkei akilabü.”