Read Chang Naga EZEKIEL 28 Bible Online

EZEKIEL 28 - Chang Naga bible

EZEKIEL 28

¹BUNYUBOUeibü ngüh kü jungto loukei:

²“Müteibü shou, Tairbü Choba to lenashi, Thükenbou BUNYUBOUei hai lauda: Aieilausi kaibü lilisese maangpona nyi lauda, ‘Ngo mühghaü che ki.’ Ngo mühghaü setshanga yungnyu jenyua setda.” Lausikei nyi no mühghaü che phatko sangadoakei dogo damasikei no müt che ong ki, no mühghaü aying.

³Daniel tokei no songsido kibou sai? Ka ka aikei huan aki sai?

⁴Kaibü songeidoei, kaibü ditenbüei nyi kaibü nyaksinam sungbakei, hoba hon si chandinam kaibü thanshang to sungbakei.

⁵Kaibü namyaknamsei songsido yaangbüei nyi nyaksinam thankei, hoba kaibü keisiyaangei kaibü maangpon liliseseko yeikei.

⁶“Hibü Thükenbou BUNYUBOUei hai lauda: Aieilausi nyi kaibü maangpona no mühghaü maimai songbüdobü dogo damdabü,

⁷ngei no khulimbo kaangbüsekbü küksithang phangshuong leibalabü; haoenei kaibü saomaibü hoba songsido khulimbo haoeneibü in tonlabü hoba kaibü chühjanbü son leilutikulabü.

⁸Haoenei no püngkhün to senyanlabü, hoba yungnyu jenyua haitian aplabü.

⁹Khülonga nyi no haitibou shuong thedanga, ‘Ngo mühghaü che ki,’ dogo lauena sao? No haitibou shuong ikmanga no müt che ong, mühghaüje aying.

¹⁰No küksithangeibü ikmanga akipbü shuong haibü hima hailabü. Aieilausi ngei kho lauan apa, dogo Thükenbou BUNYUBOUei lauda.”

¹¹Tokei BUNYUBOUeibü ngüh kü jungto loukei:

¹²“Müteibü shou, Tairbü Choba shanga mang haapashi hoba hao to lenshi: Thükenbou BUNYUBOUei hai lauda: No penbüsoubü tetsida songeidoei shenan ongayasetham hemaisaomai kiteikei.

¹³No Mühghaüeibü neichem Edena kikei; namsek laang wekoei no shanglepan kikei: phülem hoba daimond; topaz, beril, karnelian, hoba jasper; safair, emerald, hoba garnet. Nyi honeibü chisiyak kikei. No kümnyet khübü kho ka shanga lamlean kiteikei.

¹⁴Ngei hatlamoklabü kaakyembü kherabim no lomla phokukei. No Mühghaüeibü saopobü shongha kikei; no jajalalabü namsek laang yoa paikei.

¹⁵Nyi amaibü kümla akhangshongko no kümbü chalou ka jaüan ka to benbüsoubü kikei.

¹⁶No namyaknamsei yaangbüei akong asaosapbo kikei, hoba khoei no ik shatyobü hoba shabü to leikei. Hibü ngei no Mühghaüeibü shongh ka saüjim tegü nangan apbei, hoba no homlepan kibü kaakyembü kherabimei no jajalalabü namsek laang yo ka shian sattikei.

¹⁷Hemai saomaibüei no lilian yeikei, hoba kaibü nyenhangei nyi ngoualoua kümla khangkei. Hibü ngei no kaoa phetettikei; hoba lubü Choba shuong jemtentila ngei no haoen thea phokukei.

¹⁸Kaibü shedshonbü juongei hoba no nam- yaknamseia ngühmaang alanbüa nyi saoposhang shatia. Hibü ngei ka ka wan longtikei, hoba khoei no suikei, hoba ka to chühko kibü shuong pendou thea ngei no tap la yeitikei.

¹⁹No ngean kibü phangshuong pendou kaibü thu hapan mokde apyoda; no hatlamoklabü thonshang che to loua hoba touje ladangkei akilabü.”

²⁰Hobaje BUNYUBOUeibü ngüh kü jungto loukei:

²¹“Müteibü shou, kaibü thenyek Sidon ae yeiashi, hoba sao khulimbo teten- ashi

²²hoba lauashi: Thükenbou BUNYUBOUei hai lauda: Chühashi, ngo no khulimbo kia, O Sidon, hoba ka to kümbü ka ngo soneikanglabü. Ladang ngei ka to kibü shuong la kayang kuko ngo saopobü dogo lenlaje kheijinei haoenei ngo BUNYUBOU kia dogo ngelabü.

²³Aishanga ngei sao jungto shatlim hautikulabü hoba saoeibü khongnyua sii koutilabü. Jiji pendou aeka sao shilabü hoba saoeibü mütshuong inei hailabü. Kheijinei haoenei ngo BUNYUBOU kia dogo ngelabü.”

²⁴BUNYUBOUei laukei, “Touje Israel mütli shanga kaijembo kibü nyikubü phangshuong kho jetlabü jak ayingsi sepyetlabü jak phatko aikei akilabü.”

²⁵Thükenbou BUNYUBOUei hai lauda: “Ladang ngei Israel mütli phangshuong phinthonan kibü ka leishailaje, phangshuong pendouei ngo saopobü dogo ngelabü. Kheijinei Israelbü shuong ngei Jakob la kubü haoeneibü jembü kaodaka kilabü.

²⁶Haoen khünei khümenan kilabü. Haü, haoenei chem danglabü hoba semlüh laak lelabü. Hobaje ngei haoen kaijembo kibü haoen la nyikubü pendou shieikoelabü, hoba Israel khümenan kilabü. Kheijinei haoenei ngo BUNYUBOU haoeneibü Mühghaü ki dogo ngelabü.”