Read Chang Naga EZEKIEL 29 Bible Online

EZEKIEL 29 - Chang Naga bible

EZEKIEL 29

¹Kün langsenbü po anboubü, lit anboubü, chalou anthüknyiboua BUNYUBOUeibü ngüh kü jungto loukei:

²“Müteibü shou, Ijep Choba Farao khulimbo kaibü thenyek sepeiashi, hoba hao khulimbo hoba Ijepbü pendou khulimbo tetenashi.

³Joyoashi hoba lenashi, Thükenbou BUNYUBOUei Ijep Choba to hai lauda: Ngo no khulimbo kia, O Ijep Choba Farao, shumang jenyua kibou Molo jisang. Nyi lauda, ‘Nail shumang kho ngeibü; ngei ho kü shanga kümbei.’

⁴Ngei kaibü haken shedlangko ngauyaüjin che attikulabü hoba kaibü shumang kabü ngau shuongei kaibü koua khangyolabü. Kheijinei ngei no Nail shumang ka to khang- yoan kibü ngau pendou yoa sungenlabü.

⁵Ngei no hoba kaibü shumanga kibü ngau pendou khongthuyaang kongkongbüa tekan aplabü. No kaoa atlabü hoba ahelabü ayingsi akhünlabü. Ngei no kaodak meisiau la hoba mühkabü aushuong la shausiyung shanga kulabü.

⁶Kheijinei Ijep kaodaka kibü mütshuong pendouei ngo BUNYUBOU kia dogo ngelabü.” BUNYUBOUei laukei, “Israelei Ijep to sounongkei, lausikei haoen thakdu julo to aikei kaangbou yingan akitei.

⁷Ladang haoenei ka to ikei jungkei no paknyinkei hoba haoeneibü ik si phak seithetkei, hoba ladang haoenei ka to nongyolangkei no pakngokkei hoba haoeneibü shenjang leptikei.

⁸Hibü Thükenbou BUNYUBOUei hai lauda: Chühashi, ngei ka thükto in sungbalabü hoba kaibü mütshuong si samkesamuk haitilabü.

⁹Ijep sangliphanga nangletnyu apbü kaonyu che la yeilabü. Kheijinei haoenei ngo BUNYUBOU kia dogo ngelabü. “Aieilausi nyi laukei: Nail shumang kho ngeibü; ngei kho kümbei,

¹⁰hibü ngo no khulimbo hoba Nail shumang khulimbo ki. Hobaje ngei Ijep kaodak kho yungthang aenei Migdol sangnyu ka yungkük aenei Aswan sangnyu sühko, hoba Ethiopia leilang onlangko lemailela leilubü hoba apshang dangbü kaonyu che la yeitilabü.

¹¹Khunakshousi ayingsi meisiau aieikei kho nakjung adanlabü. Po saonyi onko khonei aikei akilabü.

¹²Ngei Ijep kaodakbü yoa pendou to amaiko leilubü sangliphang la yeitikulabü. Hobaje ngei Ijepbü shuong phangshuong yoa phinnyintilabü hoba kaonyek shenko haoen aatilabü.”

¹³Thükenbou BUNYUBOUei hai lauda: “Po saonyi onan phaia ngei Ijepbü lae ong lintikei, khübü phangshuong yo ka leishailabü,

¹⁴hoba ngei Ijepbü thu nyibou kümetkulabü, hoba haoen bakshang Pathros kaonyek to leibalabü. Khünei haoen hau akibü Choba sangle che kilabü,

¹⁵hoba haoen pendou to hau akibou Choba sangle yinglabü hoba haoenei ladangkei lubü phangshuong thüka songdak alelabü.

¹⁶Touje Israel mütli shanga Ijep kho ladangkei maanglemshang ayinglabü lausikei haoen jungto thuibü khambo haubü kho shedbü dogo damenlabü. Kheijinei Israelei ngo Thükenbou BUNYUBOU dogo ngelabü.”

¹⁷Kün langsenbü po saoto nyetboubü shaangboubü lita shaangbou nyet BUNYUBOUeibü ngüh kü jungto loukei:

¹⁸“Müteibü shou, Babilonbü Choba Nebukhadnezzarei Tair khulimbo haoeibü sepai tan la kümsilei yaangbünyu khangtia. Haoei on atsheibü küntibü danko sepai shuong khüngja khetikei hoba phakshok khokan aptikei, khei yingasikei hao ayingsi haoeibü sepai shuongei Tair khulimbo wapyola longyobü ka ai apailet.

¹⁹Hibü Thükenbou BUNYUBOUei hai lauda: Chühashi, ngei Babilonbü Choba Nebukhadnezzar la Ijep kaodak kuan apla kümda. Haoei Ijepbü haulanglabü hoba haoei haoeibü sepai shuongeibü mu shanga kaonyu kabü nyaksinam solanglabü.

²⁰Haoei khangenbü shanga ngei hao la haoei kümbü mu tegü hao la Ijep kaonyek kuda, aieilausi hao hoba haoeibü sepai shuongei kü shanga kümbei, dogo Thükenbou BUNYUBOUei lauda.

²¹“Kho chaloua ngei Israel mütli shanga che longtilabü hoba ngei haoen yoa kaibü sembung hopatham ipbulabü hoba haoenei ngo BUNYUBOU kia, dogo ngelabü.”