Read Chang Naga EZEKIEL 3 Bible Online

EZEKIEL 3 - Chang Naga bible

EZEKIEL 3

¹Hobaje haoei kü to laukei, “Müteibü shou, ka thedanga kibü tulai kho shauashi; hoba hauan Israel phang to joyoashi.”

²Hibü ngei kü sembung ipbei, hoba haoei tulai kho kü la shaula kukei.

³Hobaje haoei kü to laukei, “Müteibü shou, ngei ka la kubü tulai ho shauashi hoba kaibü shi shentiashi.” Hibü ngei kho shaukei, hoba kho ngeibü sembunga naodei tegü teishiktham kikei.

⁴Hobaje haoei kü to laukei, “Müteibü shou, Israel phang jungto hauashi, hoba ngeibü ngühei haoen to joyoashi.

⁵Aishanga ngühyem sekbü hoba küksithang ngühyem che jungto no hautida aying lausikei Israel mütli jungto hautida;

⁶nyi aditenlabü ngühyem sekbü hoba phang juong jungto ohauti. Ngei no haoen jungto hautikei laubü tegüje haoenei ka to ditkuan kikhoulabü.

⁷Lausikei Israel mütlieije ka ngüh ditmang asühlabü aishanga haoenei kü to ditkula maangüangda; aishanga Israel mütli pendou tubüsekbü hoba khünbüyangbü maangpon ki.

⁸Chühashi ngei kaibü thenyek haoeneibü thenyek tegü shangtüngtham yeitilabü.

⁹Ngei kaibü khüngja laangkoklok laang tokei kaangbou tegütham yeitikulabü. Haoen khulimbü phang yingasikei haoen to hatkomokko teki.”

¹⁰Tokei haoei kü to laukei, “Müteibü shou, ngei ka la lenbü ngüh pendou kaibü maangpona sungletashi, hoba kaibü nouei ditashi.

¹¹Hobaje langsenbüa kibü ka mütli jungto hauashi hoba haoen to joyoashi. Haoenei ditsikei aditsikei haoen to, ‘Thükenbou BUNYUBOUei hai lauda,’ dogo lenashi.”

¹²Kheijinei soushouei ngo tonenkei, hoba ngei kü phainei ngühkei ngühko langh yaangbü cheei, “BUNYUBOU kishanga hao soneikangbü haübou yingshi!” dogo lauko ditkei.

¹³Hobaje lang kibü meisiaueibü kaak cheei che to kakyojinei longbü langh hoba khübü nyangko tongjinyou langh, khei selonyibü langh yaangbü tegü ngei ditkei.

¹⁴Kho tegü soushouei ngo tonenkei hoba leilangkei, hoba ngo ngeibü soushou maangto shatko khauangko haukei hoba BUNYUBOUeibü ik kü thüka hau kiko kikei.

¹⁵Hobaje Kebar shumang nyangko Tel- Abiba kibü langsenbü mütshuong jungto ngo loukei; hoba khünei haoen yoa ngo chalou nyet maangpangan shembo setkei.

¹⁶Chalou nyet kian phaia BUNYUBOUeibü ngüh kü jungto ho hai loukei:

¹⁷Haoei laukei, “Müteibü shou, ngei no Israel mütli thüka lapheibou yeitikei; hibü kü sembung kabü ngüh ditashi, hoba haoen la kü ka maangsanglabü kushi.

¹⁸Amaibü müt to, ‘No maimaitham hailabü,’ dogo ngei lausi, hoba nyi hao la maangsanglabü akulonga, hoba haoeibü langkei khümenla shanga nyi hao lamnyu amaibü ka sepeitila maangsanglabü ngüh alenlonga, kho müt amaibü haoeibü shedbüa hailabü, lausikei hao haibü sii ngei ka ka hilabü.

¹⁹Khei yingasikei nyi müt amaibou la maangsanglabü kualonga hoba hao amaibü ka ayingsi hao amaibü lamnyu ka hao asepei longa hao jembü shabüa hailabü, lausikei noje ka langkei khümenlabü.

²⁰“Tokei, ladang saopobü müt jembü saopobü ka sepeian amaibü kümlaje, hoba ngei hao thedanga phaiyetshang che phokulaje, nyi hao la maangsanglabü akulonga haoje jembü shabüa hailabü. Haoei kümbü saopobü kümsilei maibü ngei adamenkulabü, hoba hao haibü sii ngei ka ka hilabü.

²¹Khei yingasikei, nyi saopobü müt la haoei shabü ashonlabü lele maangsanglabü kualonga hoba haoei shabü ashonlonga, maimaitham hao lang kilabü, aieilausi haoei maangsanglabü lenbü ngüh ditkei hoba nyi ka langkei khümena.”

²²Hobaje BUNYUBOUeibü ik kü thüka kikei, hoba haoei kü to laukei, “Meimeiashi, yomang khüto hauashi, hoba khünei ngei ka to joyolabü.”

²³Kheijinei ngo meimeikei, hoba yomang khüto likei. Hobaje ngei Kebar shumang nyangko hapbü soneikangbü tegütham BUNYUBOUeibü soneikangbü hapbei. Hobaje ngo the khüman tuongkei.

²⁴Kheijinei Mühghaü Soushou kü to atkei, hoba ngeibü youei lotian phokukei hoba haoei kü to laukei, “Hauashi, kaibü chemmanga no lolo khinlepashi.

²⁵Hobaje no müteibü shou, chühashi, haoenei ka to ik shatlabü hoba khübü khoei no khühlabü, hoba no mütshuong yoa ohauenlabü.

²⁶Hobaje ngei kaibü lishang li khiptilabü, hoba haoen to ühaktila shanga kaibü lishang ngeia khiptilabü, aishanga haoen ngüha alebü mütli ki.

²⁷Lausikei ladang ngei ka to joyolaje, ngei kaibü sembung ipbulabü hoba nyi haoen to, ‘Thükenbou BUNYUBOUei hai lauda,’ dogo laulabü. Aoyouei ditlaje haoenei ditashi, hoba aoyouei ditmang asühda haoenei tedit, aishanga haoen khulimbü phangshuong ki.”