Read Chang Naga EZEKIEL 30 Bible Online

EZEKIEL 30 - Chang Naga bible

EZEKIEL 30

¹BUNYUBOUeibü ngüh kü jungto loukei:

²“Müteibü shou, tetenashi hoba lenashi: Thükenbou BUNYUBOUei hai lauda: Haapashi, hoba lauashi, Khünyetbü chalou shanga ügütü!”

³Aishanga chalou khama nyanga, Haü, BUNYUBOUei kümlabü chalou nyanga, Phangshuong shanga sangmei shangbü chalou, Hobaje khonkulabü chalou yinglabü.

⁴Ijepa lason kilabü Hobaje Ethiopia thükto khonku loulabü. Ijepa haitibü phetetet yeplabü, Saoeibü nyaksinam aaklanglabü, Hobaje saoeibü chemshang lusaklabü.

⁵“Kho lasona Ethiopia, Libya, Lidia, Arabia, Kub, hoba ngeibü jembü mütli ka leishaibü sepai shuong yoan inei hailabü.”

⁶BUNYUBOUei hai lauda: “Yungkük aenei Migdol ka yungthang aenei Aswana sühko Ijep to aihkhün jambü dan pendou lasona hailabü. Ijepeibü lilisesebü lakjaibü tan shemlabü, dogo ngo Thükenbou BUNYUBOUei lauda.

⁷Ngei kaonyu kho kaodakbü yoa pendou to amaiko leilubü sangli- phang la yeitikulabü, hoba khoeibü sangnyu shuong kho lusakbü sangnyu shuong yoa kilabü.

⁸Ladang ngei Ijep la wan sapbulaje hoba haoeibü pü lebü shuong khümbo shemtilaje kheijinei haoenei ngo BUNYUBOU kia dogo ngelabü.

⁹“Ladang kho chalou loulaje hoba Ijep maulaje, ngei khünyet apialembü Ethiopia mütshuong moktila longchema ngühlang künbü shuong hautilabü hoba haoen hatbülühbüei shenlabü. Kho chalou louada!”

¹⁰Thükenbou BUNYUBOUei hai lauda: “Ngei Babilonbü Choba Nebukhadnezzareibü ikei Ijepeibü nyaksinam khümbo shemtilabü.

¹¹Hao hoba haoeibü mütli yoa sekbülakbü phang leian kaonyek kho mautila loulabü. Haoenei Ijep khulimbo haoeneibü in setenlabü, hoba mangjimei kaonyek shentilabü.

¹²Hobaje ngei Nail shumang ulangtham aptilabü hoba Ijep kho müt amaibüeibü ik to kuan aplabü. Kaonyek hoba khünei kibü pendou ngei küksithangeibü ikei sangliphanga apyokulabü. Ngo BUNYUBOUei kho laua.”

¹³Thükenbou BUNYUBOUei lauda: “Ngei heangsho shuong leilukulabü hoba Memfisa amlangbü mühghaü shuong thonshang to loutikulabü. Ijep kaodaka songdakla ao akilabü hoba ngei müt pendou hattimoktilabü.

¹⁴Ngei yungkük Ijep sangliphang la yeitilabü hoba yungthang aenei Zoan sangnyua wan sapbulabü. Ngei Thebes sangnyu sangyaang shieikoelabü.

¹⁵Ngei Pelusiam, Ijepeibü lapheishon thükto ngeibü khauang khüpan jinkulabü, hoba Thebes nyaksinam ngei wapan apbulabü.

¹⁶Ngei Ijepa wan che sapbulabü, hoba Pelusiam khonku yaanga kilabü. Thebes kümthang leilunyu aplabü; hoba sangnyu kho yungsenei dangleplabü.

¹⁷Heliopolis si Bubastis heshou shuong lasona inei hailabü, hoba lubü mütshuong lang senlabü.

¹⁸Ladang ngei Ijepeibü songdak buleng hau leilukulaje Tahpanhesa nakthüh kilabü hoba haoen aeibou yonglam liliko kibü hau thonshang che to loutilabü. Sao sangmeiei khuileplabü, hoba saoeibü sangnyu shuong langsenbü to haulabü.

¹⁹Kho tegü ngei Ijep shieikoelabü hoba haoenei ngo BUNYUBOU dogo ngelabü.”

²⁰Kün langsenbü po anthük- che boubü shaangbü lit chalou nyetbounyet BUNYUBOUeibü ngüh kü jungto loukei:

²¹“Müteibü shou, ngei Ijepbü Choba Faraoeibü ik ngoktikua. Chühashi, mou maitila shanga aoeikei akaikukei ayingsi hau kiko in jungla shanga jutho akhühku.

²²Hibü Thükenbou BUNYUBOUei hai lauda: Chühashi, ngo Ijep Choba Farao khulimbo kia. Ngei haoeibü ik hau kibou ae si leilubou ae ham pakngokkulabü, hoba haoeibü ik ka inlou attilabü.

²³Ngei Ijepbü shuong phangshuong yoa phinnyintilabü hoba kaonyek shuong danko aatilabü.

²⁴Hobaje Babilonbü Chobaeibü ik hau kitilabü hoba ngeibü in haoeibü ik to jinkulabü. Lausikei ngei Faraoeibü ik pakngoklabü, hoba haoei hao thedanga haila leilubü mütei ngühbü tegü wilabü.

²⁵Haü, ngei hao hau akibou yeitilabü hoba Babilon Chobaeibü ik hau kitilabü. Ladang ngei hao la ngeibü inlou jinkulaje hoba haoei Ijep kaodak khulimbo tuoklaje, kheijinei pendouei ngo BUNYUBOU kia dogo ngelabü.

²⁶Ngei Ijepbü phangshuong yoa lintilabü hoba kaonyek danko aatilabü. Kheijinei haoenei ngo BUNYUBOU kia dogo ngelabü.”