Read Chang Naga EZEKIEL 31 Bible Online

EZEKIEL 31 - Chang Naga bible

EZEKIEL 31

¹Kün langsenbü po anthük- cheboubü lit semboua shaangbounyet BUNYUBOUeibü ngüh kü jungto loukei:

²“Müteibü shou, Ijep Choba Farao to hoba haoeibü mütli shuong to lenashi: No seisihau latetche yaangkei! Ngei no ao to takteiyola?

³Chühashi, no Lebanona cedar phatkei, Hemaisaomai, yeme kubü bubhek, Sangmeia onlangko thong loubü bulong.

⁴Khünei hao chingtilabü dei, Hobaje kho thounoula kaomanga shumang kiteikei. Chingko kibü bulong la khübüei dei lakkukei Hobaje yambabü bulong pendou to shumang koutikei.

⁵Aieilausi honei dei maisho lakbü ka, Ho lubü bulong shuongtokei loubou chingkei. Hoeibü bhek shangan hoba louan khaükei.

⁶Mühkabü au phang pendouei hoeibü bheka hap kümbei; Yambabü meisiauei hoeibü hamphanga shoushou sitkei; Kaodak phangshuongei hoeibü yeme phanga haksokei.

⁷Bhek loubü yo to khütetche suokan Kho bulong latetche hemaikei. Khoeibü lishuong dei haübüa sühko atakei.

⁸Mühghaüeibü bamang cedar aitokei kho takteiyola athük; Busim long aineikei kho tegübü bhek akhaü, Hobaje plen bunyua kho tegübü bhek akitei. Mühghaüeibü bamanga mangkei Kho tegübü hemaibü bulong akitei.

⁹Khaübü bhek shuong yoa ngei ho he maitikei. Mühghaüeibü Eden bamanga ho pendou to dühbü bulong kiteikei.

¹⁰“Hibü tou, sangmeia asühlang shongko bukhu louko chingbou bulong khola ai haüthüklaje ngo Thükenbou BUNYUBOUei ka la lenlabü. Ho loubou chingsi aei ong yonglambei;

¹¹hibü ngei ho inleda hoba küksithang songdakbou che la hao kuan apa. Haoei kho bulong la hao amaibü shanga haoei mubü thüng kungailabü.

¹²Hobaje hatlabü küksithang phangshuongei hao chengan koutilabü hoba ap- yolabü. Hoeibü pakngokbü bubhek shuong kaonyeka shongh thüka hoba yomanga atlabü. Hoeibü yeme phanga kibü phangshuong pendou satan apbulabü.

¹³Kho tuongbü bulong thüka mühkabü au shuong pendou thünglabü hoba yamkabü meisiau shuong pendou haoeibü bu bheka shailabü.

¹⁴Deiei pangteiko kibü bulong yingasikei kho tegübü loubü bulong aikei ayemlabü ayingsi sangmeia jakko suokbü onlanglabü akilabü. Aieilausi haoen pendou haila tetkei; khunakshousi yoa kaomang to aoyou yemsang to kouda, haoen yoa yantila tetkei.”

¹⁵Thükenbou BUNYUBOUei hai lauda: “Kho bulong yemsang to yannyet ngei kaomang kabü dei shuongei mang haapbü küktet ngei shumang shuong senetlabü hoba haülangbü dei yaangbü akoutiko lothetlabü. Aieilausi bulong haiabuba ngei Lebanon Shongh thükto nakthüh sungbalabü hoba lamang kabü bulong pendou linoktham aptilabü.

¹⁶Ladang ngei hao yemsang to koutilaje ho tuongbü langhei phangshuong nyaakeilabü. Eden kabü bulong pendou, shanenboutham hoba Lebanon kabü deilakbü bulong maiboutham shuong pendou kho tuongbü shanga kaomanga senyühshemlabü.

¹⁷Haoeibü yemekoubü phanga kibü shuong si hao to aihkhüna jambü shuong pendou inei tuongbü shuong yoa yola haoen yemsang to koulabü.

¹⁸“Bulong kho Ijep Choba hoba hao mütshuong ki. Eden kabü bulong shuong mangkei kheinyu loubü yaangbü hoba soumo kakbü akitei. Lausikei tou, Eden kabü bulong shuong tegü, kho yemsang to koulanglabü hoba mühghaü angebü si lasona inei tuongbü shuong yoa yolabü. Kho ngei joyoa, dogo Thükenbou BUNYUBOUei lauda.”