Read Chang Naga EZEKIEL 32 Bible Online

EZEKIEL 32 - Chang Naga bible

EZEKIEL 32

¹Kün langsenbü po anthüknyi boubü lit anthüknyi boubü shaangbounyet BUNYUBOUeibü ngüh kü jungto loukei:

²“Müteibü shou, Ijepbü Choba Farao shangabü mang haapbü che huiletashi hoba hao to lenshi: No phangshuongeibü molosaonyu che phatko küman lenda, lausikei no shumang kabü jisangei dei khatbü phatkei. Nyi kaibü youei dei ngattida hoba haoeneibü shumang shuong sepseptham yeitida.

³Thükenbou BUNYUBOUei hai lauda: Ladang mütshang juongnyu takshatlaje ngei no ngeibü taka mintilabü hoba haoen la yungko to senentilabü.

⁴Ngei no khongthua tekan aplabü hoba haoen la no shautila shanga kaodak kabü ausiyuk hoba meisiau shuong pendou ngashailabü

⁵Kaibü mangjim nyaübüei ngei shongh si yo pendou shentilabü.

⁶Ngei kaibü sii piyung tegü koutibüei shongha ontilabü, hoba aukhomakmak shuong kaibü pheei photlabü

⁷Hobaje ladang ngei no shemtilaje ngei müh küpleplabü hoba khünei kibü khanshoulitshou shuong nakthühtham aptilabü. Chanyu kho sangmei phainei hulabü hoba litnyuei jembü ngesak ohaulabü.

⁸Mühkabü ngesakbü pendou ngei kaibü kaonyu thüka nakthühtham aptilabü, dogo ngo Thükenbou BUNYUBOUei lauda.

⁹“Ladang ngei kanei ngean akibü kaonyek shuong danko kan shembü ngühlang phinthonlaje kheijinei phangshuong juongnyu maangpon shalelabü.

¹⁰Haü, ngei ka to kümbüei müt juongnyu mokde apyotilabü. Ladang ngei ngeibü inlou tuoklaje mokbüei lühlabü. No tuongnyet haoen pendou jembü langkei shanga lühlabü.”

¹¹Aishanga Thükenbou BUNYUBOUei Ijep Choba to hai lauda: “Babilon Chobaeibü in ka thükto loulabü.

¹²Keibükombü phangshuongeibü sepai shuong la ngei haoeneibü in setentilabü hoba ka mütli pendou haitilabü. Kaibü mütshuong pendou hoba no yonglam liliko kibü pendou shemtilabü.

¹³Dei juong kishang kabü kaibü shatsinam khümbo shemtikulabü. Khünei müt aokei akilabü, ayingsi shatsinameibü haakei nakbü youmo akilabü.

¹⁴Kheijinei ngei saoeibü dei dangshadtilabü hoba saoeibü shumang shuong onang tegü yeitikulabü, dogo Thükenbou BUNYUBOUei lauda.

¹⁵Ladang ngei Ijep kaodak sangliphang hoba leilubüa phokulaje hoba khünei shenko kibü pendou ngei haitilaje kheijinei haoenei ngo BUNYUBOU dogo ngelabü.

¹⁶Ho waangbü chia haoenei manghaap chia la laulabü. Phangshuongeibü saoshuongei Ijep si saoeibü mütli shuong pendou waangko ho manghaap chia laulabü dogo Thükenbou BUNYUBOUei lauda.”

¹⁷Kün langsenbü po anthük nyiboubü, shaangbü lit chalou anthük ngaobounyet BUNYUBOUeibü ngüh kü jungto loukei:

¹⁸“Müteibü shou, Ijep mütshuong juongnyu shanga mang haapyoashi. Haoen hoba nyenshen phangshuong yemsang to yantiashi.

¹⁹Haoen to lenashi: No ong pendou to hemaisaomaibü dogo damda sai? No yemsang to yanlabü hoba mühghaü angebü dan yoa yeplabü.

²⁰“Ijepbü shuong lasona haitibü shuong yoa tuonglabü. Haoen haitila in tonenakei; sao kho saoeibü mütshuong yoa senlangashi.

²¹Sonenbü lakjaibü shuongei hoba Ijep to aihkhün jambü shuongei Ijepbü shuong yemsang to sungletda. Haoenei ngekda, ‘Lasona haitibü mühghaü angebü shuong hato louyenakei!’

²²“Assiria hoba saoeibü sepai shuongeibü mangkhün kaijembo hanei kia. Haoen pendou lasona haitikei,

²³hoba haoeneibü mangkhün shuong kho yemsang thonshanga kia. Saoeibü sepai shuong pendou lasona tuongkei, hoba haoeneibü mangkhünei saoeibü hee kaijemakei.

²⁴“Elam hoba saoeibü sepai shuongeibü mangkhün kaijembo hanei kia. Haoen pendou lasona inei haitikei hoba haoen yemsang to akipbo yankei. Haoenei yemsang to yanbü shuong yoa haoeneibü himou thongda.

²⁵Elam lasona haitibü shuong yoa yepda, hoba saoeibü sepai shuongeibü hee sao kaijembo kia. Haoen pendou akipbü shuong, pendou lasona haitibü shuong ki. Aieilausi haoeneibü hatlamoklabü lang kibü kaodaka phinthonbü hangjung haoenei yemsang to yanbü shuong yoa haoeneibü himou künda; haoen haitibü shuong yoa yeptiakei.

²⁶“Meshek si Tubal, haoeneibü sepai shuongeibü mangkhünei kaijeman khünei kia. Haoen pendou akipbü, pendou lasona haikei. Khei yingasikei che haoenei lang kibü shuong moktikei.

²⁷Haoen la shangiedbü jihsiphai kabü lakjaibü shuong la tegü soumo mangap aku, aoyou yemsang to lason hele souko lean yankei, haoeneibü in khua aükei hoba haoeneibü aih haoeneibü mang thüka phokei. Khübü lakjaibü shuong kho jih chenei lang kibü shuong hattimoktila sekbülakbü kiasikei haoeneibü shabü kayang haoeneibü loa baukei.

²⁸“Kho tegü Ijepbü shuong, lasona haibü akipbü shuong yoa leiluan yeplabü.

²⁹“Edom saoeibü Choba shu- ong si saoeibü songdakbü shuong yoa hanei kia. Haoen sekbülakbü sepai shuong kiteikei, lausikei tou haoen lasona haibü akipbü shuong yoa yemsanga yepakei.

³⁰“Yungkükbü Chobaeibü shousi shuong pendou, hoba Sidonbü shuong pendou khünei kia. Haoeneibü hauei jih chenei hatlamoklabü phinthonkei, lausikei tou haoen lasona haian akipbo yemsang to koubü tegü nyenshed künakei.

³¹“Farao Choba hoba haoeibü sepai shuongei lasona haitibü shuong kho haplabü hoba haoen senyühshemlabü, dogo Thükenbou BUNYUBOUei lauda.

³²“Aishanga ngei Farao Choba lang kibü shuong hattimoktila pienkei, lausikei hao hoba haoeibü sepai tan pendou hailabü hoba akipbo lasona haibü shuong pendou yoa khünlabü,” dogo Thükenbou BUNYUBOUei lauda.