Read Chang Naga EZEKIEL 33 Bible Online

EZEKIEL 33 - Chang Naga bible

EZEKIEL 33

¹Hobaje BUNYUBOUeibü ngüh kü jungto loukei:

²“Müteibü shou, kaibü mütlieibü shousi shuong to joyoashi, hoba haoen to lenshi: Ladang kaonyek to wapyo loulaje kaonyek kabü mütli shuongei haoen yo ka müt at pienan lombou che phokuda;

³hoba ladang haoei kaonyek to labou louko hapda, haoei teklaang metko mütli shuong to maangsangla lenda.

⁴Kheijinei aoei teklaang metbüje ditda lausikei maangsangan akiko labou lousüh- an hao haitida, haoeibü sii hao thüka kilabü.

⁵Haoei teklaang ngühlang ditkei lausikei pianleman akitei, khoei hao haibü sii hao thüka kilabü. Hao pianleman kiteikei tegüje haoei hao langkei khümenan kikhoulabü.

⁶Lausikei, lombouei labou loubüje hapan mütshuong pianleman kitila teklaang ametkulonga, labou loulabü hoba shabü mütshuong kho hailabü, lausikei haoen haibü sii ngei lombou ka hilabü.

⁷“Hibü tou, müteibü shou, ngei no Israel phangshuong thüka lombou yeitida; hibü kü sembung ka angbü ngüh ditashi, hoba kü ka haoen la maangsanglabü kuashi.

⁸Ladang ngei müt amaibü to, ‘O müt amaibou, no maimaitham hailabü,’ dogo laulaje, hoba nyi müt amaibou kho haoeibü langkei khümenlabü lele haoeibü lamnyu ka sepeila alenlaje, kheijinei hao haoeibü shedbü shabü shanga hailabü, lausikei hao haibü sii ngei ka ka hilabü.

⁹Khei yingasikei nyi müt amaibou khüto haoeibü lamnyu ka sepeian maangsangan kila len- alonga, hoba hao haoeibü lamnyu ka asepeilonga, hao haoeibü shedbü shabü shanga hailabü, lausikei nyi ka langkeije khümenlabü.”

¹⁰BUNYUBOUei kü to joyokei: “Müteibü shou, Israel phangshu- ong to lenashi: Kanei hai lauda, ‘Maimaitham küneibü shedbü onat kün thüka kia, hoba kho hangshong kün linjung ngaida. Kholonga kün lai lang kila?’

¹¹Haoen to lenashi: ‘Ngo langkeibü Mühghaü ki shongko, shabü müt haibüa ngo olinbü aki. Aeiko ngei haoen shabü ka nangan lang kitimang sühda. Kaneibü amaibü lamnyu ka sepeiashi! O Israel phangshuong, kan aila haila?’ dogo Thükenbou BUNYUBOUei lauda.

¹²“Hibü, müteibü shou, kaibü Israel mütli shuong to lenashi: Saopobü müt haoei ngühkhüm leilunyet hao haoeibü saopobüei akhümenlabü. Müt amaibü cheei haoei amaibü kümbü ka nangalonga, hao ashiakoelabü, hoba müt maibü che shabü shonla khangalonga, haoeibü langkei khümenla athüklabü.

¹³Ngei müt maibü che to no maimaitham lang kilabü dogo thekula thükkei, lausikei haoei haoeibü danbü langkei maibü to maanglemalonga hoba shabü shonla khangalonga, haoei kümsilei maibü kümbü ngei aikei adamenlabü.

¹⁴Ngei müt amaibü che to, ‘No maimaitham hailabü,’ dogo hakla thükkei, lausikei haoei haoeibü shabü ka sepeian tangbü hoba janbümaibü kümalonga,

¹⁵tetlabüei, haoei lotbü shanga phokubü angthetnam kungaialonga ayingsi haoei kokbü ngaitikualonga, hoba haoei shabü kümbü nangan langkei kubü ngühkhüm phai semalonga, maimaitham hao lang kilabü, hao ühailabü.

¹⁶Ngei hao la haoei shonshaibü shabü apbulabü hoba hao lang kilabü; aieilausi haoei ai tangbü hoba janbümaibü ki kho kümbei.

¹⁷“Khei yingasikei kaibü mütli shuongei lauda, ‘BUNYUBOUeibü lamnyu janbü aying.’ Lausikei ajanbü kho haoeneibü lamnyu ki.

¹⁸Ladang saopobü müt cheei hao saopobü ka sepeilaje hoba shed shonlaje hao kho shanga hailabü.

¹⁹Hobaje ladang müt amaibü cheei haoeibü songsido amaibü ka sepeilaje hoba ai tangbü hoba janbümubü ki kho kümlaje hao khoei lang kilabü.

²⁰Khei yingasikei, O Israel chung, kanei lauda, ‘BUNYUBOUeibü lamnyu janbü aying.’ Ngei kan mütpem weko lulueibü kümsileiei mat jemlabü.”

²¹Kün langsenbü po anthük nyiboubü, lit anboubü chalou ngaobounyet Jerusalem ka satenbü müt che kü jungto loukei hoba laukei, “Sangnyu kho tuonga.”

²²Hao loulabü thedangto chasem BUNYUBOUeibü ik kü thüka kikei. Lausikei nyibounyet ngeyang ladang müt kho kü junga lousühkei kheijinei ngeibü sembung ipbuan kikei; hoba touje ngo küpjembo akitei.

²³Kheijinei BUNYUBOUeibü ngüh kü jungto loukei:

²⁴“Müteibü shou, Israeleibü leilubü kaoa kibü mütshuongei athakko lauda, ‘Abraham müt che ong kikei, lausikei haoei kaonyek khümbo kiman kikei. Lausikei senje juong; phetphanla shanga maimaitham kaonyek kho sen la kuakei!’

²⁵“Hibü haoen to lenashi, Thükenbou BUNYUBOUei hai lauda: Kanei phea sii yoan shauda, hoba kaibü nyek heangshoa pükakei, hoba sii angtida, kholonga kanei kaonyek kho phet phanlep sai?

²⁶Kan kaneibü in to sounongda. Kanei mangsenlabü kümda, hoba kan mütpem wekoei lulueibü lepboueibü yak totnyinkuda. Kholonga kanei kaonyek kho kimenlep lo?

²⁷“Haoen to hai lenshi: Thükenbou BUNYUBOUei hai lauda: Ngo langkeibü Mühghaü ki shongko, leilubü sangnyua jouan kibü shuong inei hailabü, aoyou khongthuyaanga jouan kilaje ngei yamkabü meisiau la shautilabü, hoba aoyou shongha hoba laangpoba kilaje haoen shatsinyat limsilangei haitilabü.

²⁸Hobaje ngei kaonyek kho sangliphang kaonyu la yeitilabü, hoba sao yonglam lilibü thonshang che to loutilabü. Israeleibü shongh shuong aoeikei lamjung ohaulabü lele sangliphanga kilabü.

²⁹Ladang ngei kaonyek kho sangli- phang la yeitilaje hoba haoeneibü shabü shanga mütshuong shieikoelaje kheijinei haoenei ngo BUNYUBOU ki dogo ngelabü.”

³⁰BUNYUBOUei laukei, “Ka shangaje, O müteibü shou, ka mütliei haoen sangnyu kümthang nyangko hoba haoeneibü chem koukhüna haüyojinei ka shangabü lauyoda. Haoen cheei che to lauda, ‘Hauakho kaiya, hoba BUNYUBOU ka tou ai ngühlang loulaje ditakho.’

³¹Hibü ngeibü mütli shuong nyi lenbü ditla nyuyoda, lausikei nyi haoen to kümla lenbü khoje akümda. Aishanga haoeneibü sembunga sanou ngüh kia, lausikei haoeneibü maangponei jembü kusikhang ong shida.

³²Maimaitham haoen thedanga no kho ngühlang maibü kakbü, sanouyobü chia aeibou maian laubü hoba kongkin maisho tuokbü müt che ong phatkei; aishanga haoenei kaibü ngüh shuong ditda lausikei khübü kho tetche ongkei haoenei akümda.

³³Ladang khübü pendou tükde loushedlaje, maimaitham ho tükde loushedlabü haang, kheijinei ong haoenei thuseibou che haoen yoa kiteikei dogo ngelabü.”