Read Chang Naga EZEKIEL 34 Bible Online

EZEKIEL 34 - Chang Naga bible

EZEKIEL 34

¹BUNYUBOUeibü ngüh kü jungto loukei:

²“Müteibü shou, Israel sanlombü shuong khulimbo tetenashi. Thusei ngüh lauashi, hoba haoen to lenashi: ‘Thükenbou BUNYUBOUei hai lauda: Jembü ong thounoubü Israel sanlombü shuong shanga ügütü! Sanlombü shuongei sanshuong apangteilep lo?

³Kanei haabü shauda, kanei winei neida, amenboutham kanei haitian shauda. Lausikei kanei sanshuongje apangteida.

⁴Kanei hau akibü shuong alommaiti, ayingsi shatbü amaiti, ayingsi akbü mou akhühku. Kanei ayinglam to satbü aleingai, ayingsi maubü alam. Lausikei kanei maangshat lamlam hoba kaangbü sekbüei haoen thüka songdakkei.

⁵Hibü haoen linkei, aieilausi sanlombü akitei, hoba ladang haoen khongthu- yama aakei kheijinei haoen yamkabü meisiauei haoen taketnyu shaukei.

⁶Hibü ngeibü sanshuong shongh peiko hoba shonghshou suokbü wekoa shoongaikei. Haoen kaothe pendoua phinthon- an kikei hoba haoen lamla ayingsi chühla aokei akitei.

⁷“Hibü kan sanlombü shuong, ngo BUNYUBOUei lenbü ngüh ditashi:

⁸Ngo langkeibü Mühghaü ki shongko, kanei kü ngüha lebou kiteikei. Ngeibü sanshuong yamkabü meisiauei shian taketkei hoba haoen shaukei aieilausi khünei sanlombou akitei. Ngeibü sanlombü shuongei sanshuong lamenla hauajem. Haoenei jembü ong laka sanshuong athounou.

⁹Hibü kan sanlombü shuong, BUNYUBOUeibü ngüh ditashi.

¹⁰Thükenbou BUNYUBOUei hai lauda: Chühashi, ngo sanlombü shuong khulimbo kia, hoba haoeneibü ik ka ngei ngeibü sanshuong hilabü. Ngei haoen sanshuong lombü ka thaktilabü, khei yingsi ong touje sanlombü shuongei jembü lolo athonoulabü. Ngei ngeibü sanshuong haoeneibü sembung ka khümenlabü, hoba kho haoen shanga shausi- yung ayeitilabü.

¹¹“Aishanga Thükenbou BUNYUBOUei hai lauda: Chühashi, ngei ngo lolo ngeibü sanshuong lamlabü, hoba haoen haplabü.

¹²Sanlombou che haoei thounoubü sanshuong aan kibü lamenan nyibou leibabü tegütham ngei ngeibü sanshuong lamlabü. Haoen sangmei shangbü hoba nakthühbü chaloua haoen aan kibü kaoen pendou ka ngei haoen püetlabü.

¹³Ngei haoen phangshuong ka leibalabü hoba kaonyek ka leishailabü, hoba haoen jembü kaodak to leibalabü. Ngei haoen Israel shongh to hoba dei koushang to leilabü hoba sanglaak kee maibüa thounoulabü.

¹⁴Ngei haoen shongh si yo kabü nyemsang alibüa lamshautilabü hoba Israel shongh khua haoen keeshang kilabü; hoba khünei sanglaak maibüa Israel shongh thüka haoen lamshaulabü.

¹⁵Ngo ngeibü sanshuongeibü lombou kilabü, hoba ngei haoen yeptilabü, dogo Thükenbou BUNYUBOUei lauda.

¹⁶“Mauan kibü ngei lamlabü, linan kibü nyibou leingailabü, leilubü khühetkulabü, hoba shatko kibü maitikulabü; lausikei netbü si hau kibü ngei leilutikulabü, aishanga ngo janbü kümbou sanlombou ki.

¹⁷“O ngeibü sanshuong, kan shangabü Thükenbou BUNYUBOUei hai lauda: Chühashi, ngei kan mütpem weko mat jemlabü hoba maibü si amaibü janyinlabü hoba san si lon bangnyinlabü.

¹⁸Kan yoa atje nyem maiboutham lamshaukokei senyüh ashemda; kanei kanei ashaubü nyem mangkei nakeila leda! Kanei dei koshikbü yungda hoba kanei ayungbü dei ngattida!

¹⁹Kanei youei nakeibü nyem kho ngeibü sanshuongei shaulep sai ayingsi kanei ngattibü dei yunglep sai?

²⁰“Hibü Thükenbou BUNYUBOUei haoen to hai lauda: Chühashi, ngei san netbü si koplinbü kanglanga mat jemlabü.

²¹Aieilausi kanei hip si phakshokei aüda hoba haoen alintishongko kaneibü laangei hau akibü to thenda.

²²Lausikei ngei ngeibü san khümenlabü hoba haoen touje amaiko ajungeilabü. Ngei san weko mat jemlabü hoba maibü si amaibü pinyinlabü.

²³Hobaje haoen thüka sanlombou yingla shanga ngei ngeibü sambü Dawid phatbü choba che kulabü; hoba haoei haoen thounoulabü hoba haoeneibü sanlombou yinglabü.

²⁴Ngo BUNYUBOU, haoeneibü Mühghaü yinglabü, hoba ngo khangenbou Dawid phatbü Choba che kho haoeneibü songdakbou yinglabü; ngo BUNYUBOUei kho laua.

²⁵Hobaje ngei haoen yoa sangmai thesilan che kümlabü hoba ngeibü sanshuong ushia ai apeksekko yeplabü lele ngei sekbülakbü meisiau shuong shian sattikulabü.

²⁶“Hobaje ngei haoen haükulabü hoba haoen ngeibü saopobü shonghshoua kitilabü. Ngei haoen la langmin yantikuko haükulabü hoba khünei haülabü langmin haaklabü.

²⁷Hobaje yamkabü bulongei haoeneibü hek hekkulabü hoba kaodakei shusiphon hekkulabü, hoba mütpem weko jembü kaoa khümetangetan kilabü. Ladang ngei kü mütlieibü yangmen thettikulaje hoba haoen aaola lebü shuongeibü ik ka haoen litilaje kheijinei haoenei ngo BUNYUBOU kia dogo ngelabü.

²⁸Touje phangshuongei haitibou ayeilabü hoba yamkabü meisiauei haoen ataketlabü hoba ashaulabü. Haoen khümetangetan kilabü hoba aoeikei haoen ühütlenlabü.

²⁹Ngei haoen la shusiphon mailabü kaomai kulabü hoba kaonyua müh akitilabü. Touje lubü phangshuongei haoen to anyikulabü.

³⁰Kheijinei müt pendouei ngo BUNYUBOUei Israel püetda hoba haoen kü mütli dogo ngelabü, dogo Thükenbou BUNYUBOUei lauda.

³¹“Kan kü mütshuong, ngeibü nyemlaaka lamshaubü sanshuong ki, hoba ngo kaneibü Mühghaü ki,” dogo Thükenbou BUNYUBOUei lauda.