Read Chang Naga EZEKIEL 36 Bible Online

EZEKIEL 36 - Chang Naga bible

EZEKIEL 36

¹“Müteibü shou, Israel shongh shuong to tetenbü ngüh joyoashi hoba lauashi, ‘O Israel shongh shuong, BUNYUBOUeibü ngüh ditashi.

²Thükenbou BUNYUBOUei hai lauda: Dangboulabouei ka shangabü hai laukei, “Aha! Shangiedbü shongh shuong sen shangabü la yeia!”

³“Hibü tetenashi hoba lenashi, ‘Thükenbou BUNYUBOUei hai lauda: Ladang lepbü phangshou phangnaei Israeleibü shongh shuong shikei hoba sangliphang la yeitikei, müt pendouei Israel la nyikukei.

⁴Hibü, O kan Israel shongh shuong, Thükenbou BUNYUBOUeibü ngüh ditashi: Thükenbou BUNYUBOUei shongh hoba shonghshou shuong to, dei koushang hoba pholi shuong to, hoba sangliphanga satetlangan kibü shuong to, hoba nangletbü sangnyu shuong, laobou kaijembo kibü lubü phangshuong thedanga takettila hoba nyikula yeian ki, khübü to lauda:

⁵“Thükenbou BUNYUBOUei hai lauda: Ngo khauang longbü yaanga ngei joubü phangshuong pendou khulimbo, hoba aeilaleko Edom khulimbo laua, aishanga maangphanga olinko hoba nyikuko haoenei ngeibü kaonyu shikei hoba khoeibü lamshaushang soan sungkei.

⁶“Hibü Israelbü kaonyek shangabü tetenashi hoba shongh shuong to, shonghshou shuong to, dei koushang hoba pholi to lenashi: Thükenbou BUNYUBOUei hai lauda: Chühashi, ngei nyekto shatbü hoba khauang lotbüa laua, aieilausi phangshuongeibü himou kanei künkei.

⁷Thükenbou BUNYUBOUei hai lauda: Ngei thedalanda, kan kaijembo kibü phangshuongei haoeneibü himou künlabü.

⁸Lausikei kan, O Israel shongh shuong, nyi kü mütli Israel shanga bhek longtilabü hoba mai hekkulabü, aishanga haoen tongde chem to loulabü.

⁹Ngei kan shanga dambuda hoba kaneibü kaonyu nyibou shapnyintila hoba khonei youli wentila ngo kan la yingkulabü.

¹⁰Hobaje Israel chung pendoua ngei kaneibü lühbak haatikulabü. Sang sangngailabü hoba leilubü shuong kümetlabü.

¹¹Hobaje ngei kan thüka müt si shatsinam lühbak juongtikulabü, hoba haoen haalabü hoba püngko juongko lang heklabü. Ngei shangied tegütham ka to mütshuong kitilabü hoba shaangbou toje maibou kan naang maitilabü. Kheijinei kanei ngo BUNYUBOU kia dogo ngelabü.

¹²Haü, ngei kü mütli, kan Israelbü, nyibou kaneibü kaonyua kitila leibalabü. Kho kaneibü kaonyu yinglabü, hoba no haoeneibü phet yinglabü; hoba touje ka to haoeneibü youyikei akonglabü.

¹³“Thükenbou BUNYUBOUei hai lauda: Aieilausi mütshuongei ka to lauda, ‘Nyi mütshuong suida hoba ho phangeibü youyik langkuda.’

¹⁴Lausikei tou ka jaüan hoei ladangkei müt asuilabü hoba ka mütli youyikei akonglabü, dogo Thükenbou BUNYUBOUei lauda.

¹⁵Ngei touje phangshuongei kan nyikula lebü adititilabü ayingsi touje mütshuongei kan to hakbü aditlabü ayingsi touje kan phangshuong aphaiyetlabü, dogo Thükenbou BUNYUBOUei lauda.”

¹⁶Tokei BUNYUBOUeibü ngüh kü jungto nyibou loukei:

¹⁷“Müteibü shou, ladang Israel mütli haoen kaodaka kikei, haoenei haoeneibü thechüh hoba kümsileiei kho shatikei. Kü thedanga haoeneibü thechüh kho yaksa mang asaopobü chaloua ihinseibü hima kikei.

¹⁸Kaonyeka haoenei sii angtibü haangjung hoba haoeneibü heangshoei kho shatibü laüa ngei haoen thüka ngeibü maangshat khüpan jinkukei.

¹⁹Ngei haoen phangshuong yoa phinnyintikei hoba kaonyek shenko aatikei; haoeneibü thechüh hoba kümsilei thüng ngei haoen mat jembei.

²⁰Hobaje haoen haushang pendoua phangshuong thedanga haoenei ngeibü saopobü nyen shedtikei, aieilausi haoenei lauda: ‘Habü ho BUNYUBOUeibü mütli shuong ki, lausikei haoeibü kaodak ka kukla yeikei.’

²¹Khoei ong ngo maangto shatko kikei, aishanga Israelbü shuongei haushang pendoua ngeibü saopobü nyen shatikei.

²²“Hibü tou Israel phangshuong to lenashi, Thükenbou BUNYUBOUei hai lauda: O Israel chung, ngei ho kan laüa kümda aying, lausikei ngeibü nyen sao pobü, laobou kanei phangshuong yoa kan haushanga shatikei, kho laüa kümda.

²³Ngei ngeibü saopobü nyen yaangbü, laobou phangshuong yoa shatikei, laobou nyen kanei haoen yoa shaantikei, kho ngei saüenan pholabü. Ladang ngei kan danko phangshuong thea ngo saopobü yingkei dogo shentilaje kheijinei ngo BUNYUBOU kia dogo ngelabü, dogo Thükenbou BUNYUBOUei lauda.

²⁴Aishanga ngei kan phangshuong yo ka leibalabü hoba kaonyek pendou ka kan leishailabü hoba kan kaneibü kaonyek to leian loulabü.

²⁵Hobaje ngei kan la dei koshikbü lakkulabü hoba kan hinseian kilabü, kan la mak kakbü pendou ka hoba kaneibü heangsho pendou ka kan hinseitikulabü.

²⁶Ngei kan la maangpon haanbü kulabü hoba soushou haanbü jinkulabü, ngei kaneibü phe ka laangeibü maang- pon sungan apbulabü hoba kan la pheeibü maangpon kulabü.

²⁷Hobaje ngei kan la ngeibü Soushou jinkulabü hoba ngeibü ngühkhüm deikhüma paitilabü hoba kanei ngeibü ngühmai jungeilabü, hoba khübü kümlabü.

²⁸Kheijinei kaneibü pisibou la ngei kubü kaonyeka kan kitilabü. Kan ngeibü mütli kilabü hoba ngo kaneibü Mühghaü kilabü.

²⁹Ngei kan asaopobü pendou ka püetlabü. Ngei shusiphon haang maitilabü hoba kan thükto ai limsilang aloutilabü.

³⁰Mühlimnoulim danko phangshuong yoa kan himou abautila shanga ngei buhekdeihek hoba shusiphon haatijuongtikulabü.

³¹Kheijinei kanei kaneibü thechüh amaibü hoba kümsilei amaibü kümbü shuong damenlabü, hoba kaneibü shabü si shedtimashikbü shanga mangsenlabü.

³²Ngei ho kan laüa kümda aying dogo kan la ngetimang sühda, dogo Thükenbou BUNYUBOUei lauda. O Israel chung, kaneibü thechüh hoba kümsilei shuong shanga himouko hoba the alenenko kiashi!”

³³“Thükenbou BUNYUBOUei hai lauda: Ngei kaneibü shabü pendou ka saüenkunyet ngei kaneibü sang sangngaitilabü, hoba leilubü shuong kümetlabü.

³⁴Hobaje danbü phaibü pendouei hapbo apan kilabü jeiko apshang dangbü kaonyu sek la moulabü.

³⁵Haoenei laulabü, ‘Apan kibü kaonyek ho Eden bamang phatko yeia; hoba leiluan tekan apbü hoba maubü sangnyu shuong tenlepnyu mütei nyaka.’

³⁶Kheijinei kaijembo kibü phangshuongei ngo BUNYUBOUei leilubü kümetda, hoba apshang dangbüa kesiong keda dogo ngelabü. Ngo BUNYUBOUei kho laua, hoba ngei kho kümlabü.”

³⁷“Thükenbou BUNYUBOUei hai lauda: Ngei tokei che Israel mütli to haoen shanga kümtila kü to phetilabü hoba haoen shanga ho kümbulabü: ngei haoen mütli sanshuong phatko haatijuongtikulabü.

³⁸Jerusalema lemlasalabü san shuong phatko, tou leiluan kibü sangnyu shuong kho mütshangei shenlabü, hoba haoenei ngo BUNYUBOU kia dogo ngelabü.”