Read Chang Naga EZEKIEL 37 Bible Online

EZEKIEL 37 - Chang Naga bible

EZEKIEL 37

¹BUNYUBOUeibü ik kü thüka kikei hoba haoei ngo BUNYUBOUeibü Soushouei leian haukei, hoba pholi jenyua haoei ngo settikei hoba kho losilakei shenan kikei.

²Haoei ngo khübü kaijembo to leian haukei, hoba chühashi, khongthu yomang shenko lo juong kikei, hoba khübü kho aeibou linokbang kikei.

³Hobaje haoei kü to laukei, “Müteibü shou, khübü lo shuong lang kila thüka sao?” Ngei laukei, “O Thükenbou BUNYUBOU, nyi ong ngekei.”

⁴Kheijinei haoei kü to laukei, “Habü lo shuong to thusei ngüh joyoashi hoba haoen to lenshi: O lo linbü shuong, BUNYUBOUeibü ngüh ditashi!

⁵Thükenbou BUNYUBOUei habü lo shuong to hai lauda: Chühashi, ngei kan la hak metan jinkulabü hoba kan lang kilabü.

⁶Hobaje ngei kan la haulüh si phejak jinkulabü, hoba khonei küplepkulabü. Ngei kan la hak jinkulabü hoba kan lang kilabü hoba kanei ngo BUNYUBOU kia dogo ngelabü.”

⁷Hibü kü la sakkubü tegü ngei thusei ngüh lenkei. Hobaje ngei tetenko kijinei, tenbü langh yaangbü che ditkei losilak shuong kho lulueibü lo lamjung chela takshatkei.

⁸Hobaje ngei chühko kijinei khübü thüka haulüh si phejak kikei hoba khübü thüka khonei yuklepbei, lausikei khübü to hak akitei.

⁹Kheijinei haoei kü to laukei, “Hak to thusei ngüh lenashi; tetenashi, O müteibü shou, hoba hak to lenashi, Thükenbou BUNYUBOUei hai lauda: Yeilam lei ka kaiya, O hak, hoba habü haibü shuong to haoen lang kitila hak atashi.”

¹⁰Hibü haoei sakkubü tegü ngei thusei ngüh lenkei, hoba haoen to hak atkei; haoen langkei hoba haoeneibü youei loenkei. Haoen sepai tan yaang tetche kiteikei.

¹¹Kheijinei haoei kü to laukei, “Müteibü shou, habü lo shuong ho Israel chung khümbo ki. Haoenei lauda: Seneibü lo shuong linoktham apa, hoba seneibü maanglem maua; sen lemai lela wapan apakei.

¹²Hibü tetenashi, hoba haoen to lenashi: Thükenbou BUNYUBOUei hai lauda: O kü mütli, ngei kaneibü hee ipbulabü hoba kan khüka longtilabü; ngei kan Israel kaodak to nyibou leian longeilabü.

¹³Hobaje ladang ngei kaneibü hee ipbulaje hoba kan khüka longtilaje, kanei ngo BUNYUBOU kia dogo ngelabü.

¹⁴Hobaje ngei ka la kü Soushou jinkulabü hoba kan lang kilabü, hoba ngei kan kaneibü kaoa phokulabu. Kheijinei kanei ngo BUNYUBOUei kho laua dogo ngelabü, hoba ngei kho küma dogo ngelabü, dogo BUNYUBOUei lauda.”

¹⁵BUNYUBOUeibü ngüh kü jungto loukei:

¹⁶“Müteibü shou, nyi julo che sungashi hoba khonei hai doashi: ‘Jihuda sangle.’ Tokei lubü julo che sungashi hoba khonei hai doashi: ‘Israel sangle.’

¹⁷Kho phaia julo penyi kho che maimai haplabü lele kaibü ika thon si thon thenyoan jungashi.

¹⁸Ladang kaibü mütli shuongei ka to, ‘Habü ho nyi ai tetlabü lendaje kün la alenlep lo?’ dogo phealonga,

¹⁹kheijinei haoen to lenshi: Thükenbou BUNYUBOUei hai lauda: Chühashi, Israel nyen phongbü julo kho ngei sunglabü hoba Jihuda nyen phongbü che kho to thenlabü. Ham khoei ngei che la ong yeitilabü hoba ngeibü ika junglabü.

²⁰“Julo penyi kho ka ika jungashi hoba mütshuong la haptiashi.

²¹Hobaje nyi haoen to lenashi, Thükenbou BUNYUBOUei hai lauda: Ngei Israel shousi shuong, haoen hauan kibü phangshuong yo ka sungngailabü. Ngei haoen kaijembo kibü pendou ka leishailabü hoba haoen kaodak to nyibou leibalabü.

²²Hobaje Israel shongha ngei haoen phang che yeitilabü. Haoen pendou thüka Choba che ong kilabü hoba touje haoen ladangkei phang penyi ayinglabü, ayingsi touje aieikei haoen sangle penyi la ajanlabü.

²³Touje haoen ladangkei haoeneibü heangshoei ayingsi mangsenlabü kümsilei ayingsi ngühkhüm lulimbü shabü aieikei ashalabü. Ngei haoen sukjung ngaibü shabü pendou ka ngei khümenlabü, hoba ngei haoen saüenkulabü. Haoen ngeibü mütli, hoba ngo haoeneibü Mühghaü yinglabü.

²⁴Hobaje ngo khangenbou Dawid haoen thüka Choba yeilabü, hoba haoen pendouei sanlombou che kilabü. Haoen ngeibü ngühkhüm- a pailabü hoba ngeibü sakkubü nouanepbo jungeilabü.

²⁵Hobaje ngo khangenbou Jakob la ngei kubü kaonyeka, ainei kaneibü pisibousi shuong kikei, khünei haoen kilabü. Khünei haoeneibü shousi hoba haoeneibü shousi shisi shuong ponpen shanga kilabü, hoba ngo khangenbou Dawid ponpen shanga haoeneibü kilabü.

²⁶Ngei haoen yoa sangmai thesilan kümlabü; kho thonsithak akibü theyolanyobü kilabü. Ngei haoen kitilabü hoba haoen lühbak juong yeitilabü, hoba ngei ponpen shanga haoen yoa ngeibü saoposhang pholabü.

²⁷Ngeibü lemshang neichem haoen yoa kilabü, ngo haoeneibü Mühghaü yinglabü hoba haoen ngeibü mütli yinglabü.

²⁸Hobaje ladang ngeibü lemshang haoen yoa ponpen shanga kilaje kheijinei phangshuongei Israel saüenan phokubou BUNYUBOU kho ngo ki dogo ngelabü.”