Read Chang Naga EZEKIEL 38 Bible Online

EZEKIEL 38 - Chang Naga bible

EZEKIEL 38

¹BUNYUBOUeibü ngüh kü jungto loukei:

²“Müteibü shou, Magog kaodaka, Meshek si Tubal Choba yaangbou Gog aeto kaibü thenyek sepeiashi hoba hao khulimbo tetenashi,

³hoba lenashi: ‘Thükenbou BUNYUBOUei hai lauda: Chühashi, O Gog, Meshek si Tubal konglebou Choba, ngo no khulimbo kia.

⁴Ngei no kaiyeitilabü hoba kaibü kaumaanga ngau yaüjin jinkulabü hoba kaibü sepai tan pendou, koli hoba kolia wapyobü mütshuong haoen pendou, insiaubu penko jungan hele manko lean, wapyobü aih si aih jungbü tan yaangbü, haoen pendou in jungan,

⁵Persia, Ethiopia, hoba Put, haoen pendou aih jungan hoba nameibü khun hanan hao to thipakei,

⁶hoba tokei Gomer hoba haoeibü tan pendou, hoba yungthang thonbü ka Beth Togarma si kaibü sepai shuong pendou, khei phangshuong juongnyu yoa ngei no senbalabü.

⁷Lamleashi, haü, no hoba ka jungto takshatbü sepai shuong pendou lamlean kishi; hoba haoen la ngühkhüm kushi.

⁸Hobaje po juongnyu phaia nyi, phangshuong juong yo ka liko leibabü hoba wapyosuyo hatlalühlabü akiko haksoa kibü kaonyek che shilabü. Hobaje posilit lounyu sangli phanga apshang dangan kibü, lausikei touje müt pendou püetan kibü Israel shongh shuong nyi shilabü.

⁹Hobaje yeinak che tegütham no louyenlabü hoba kaibü sepai tan pendou hoba ka yoa müt juong yeithu yeinak phatko kaonyek nyonglepbo sangmei che tegü loulabü.’ ”

¹⁰Thükenbou BUNYUBOUei Gog to ho tegü lauda: “Ladang kho jihsiphai loulaje, nyi kaibü maangpona huonsiyou amaibü damla khanglabü.

¹¹Nyi laulabü: Ngei ba alebü sang shuong shilabü; sangsembo kibü mütshuong, aoyou hatlamoklabü akiko ki, ngei haoen shilabü. Haoen pendou baei alelepbo hoba koukhinei athangko ki.

¹²Ngei apsilebü peisilei aaklabü hoba soshau soyunglabü, hoba leilubü sang lengaibü kaodak khulimbo hoba shatsinama hoba peisileia keibü kaonyek jenyua kibü, phangshuong yo ka leishailabü mütli khulimbo ngeibü ik sepeilabü.

¹³Sheba, Dedan hoba Spain kabü sangnyu shuong kabü namyaknamseibü shuongei ka to phelabü, ‘Soletbü peisilei aakla no loukei sai? Nyi kaibü jenabou ka soshau soyungla kamshaitikei sai? hon si chandinam sunglangla hoba shatsinam si samkeisamuk sungla hoba soletbü juong aaklangla shanga loukei sai?’ ”

¹⁴Hibü, müteibü shou, tetenashi hoba Gog to lenshi: Thükenbou BUNYUBOUei hai lauda “Tou kü mütli Israel hatlamoklabü akiko sangmaia kijinei

¹⁵no hoba ka yoa mütli phangshuong juong, pendou kho kolia setan, shuong yaangbü hoba hau yaangbü sepai kaibü kishang yungthang thonbü ka loulabü.

¹⁶Hobaje sangmeiei kaonyek yuklepjung loubü tegü no ngeibü mütli Israel khulimbo loulabü. Jihsiphai lousühjinei, O Gog, ngei no ngeibü kaonyek khulimbo sungbalabü hoba no danko phangshuongei ngo saopobü dogo tang khitlabü.

¹⁷Thükenbou BUNYUBOUei ho tegü lauda: Shangied ngei ngo khangenbü Israel thuseibü shuong danko laubou kho no aying lo? Kho jihsiphaia ngei no haoen khulimbo sungbalabü dogo haoenei tetenkei.”

¹⁸Khünyet chaloua hai haüthüklabü: “Ladang Gogei Israel kaodak shilaje, kheijinei ngeibü khauang maangpok loushadlabü, dogo Thükenbou BUNYUBOUei lauda.

¹⁹Aishanga ngeibü maangdak hoba khauang maangshata khünyet Israel kaodaka selo nyibü yaang kilabü.

²⁰Hibü yungnyu kabü ngao, mühkabü au, yamkabü meisiau, kaoa kibü yangsikok pendou hoba kao thea kibü khunakshousi wekoei kü thedanga hatbüei lühlabü. Shongh shuong thapletlabü, laanglip shuong limletjung loukoulabü, hoba kümthang shuong tuonglabü.

²¹Hobaje ngei ngeibü shongh shuong pendoua Gog khulimbo in ngaletlabü, dogo Thükenbou BUNYUBOUei lauda. Hao mütshuong cheei che khulimbo wapyolabü.

²²Hobaje ngei hao khulimbo shatlim hoba sii angbü kayang kulabü. Ngei hao thükto hoba haoeneibü sepai tan thükto hoba hao yoa thipbü phangshuong juongnyu thükto langtok yaangbü hoba sen yaangbü, khei wan hoba wansat moli jonyantilabü.

²³Hobaje ngei ngo yaangenbü hoba saopobü lenlabü, hoba ngei phangshuong juongnyu thedanga ngo lolo shentilabü. Kheijinei haoenei ngo BUNYUBOU ki dogo ngelabü.”