Read Chang Naga EZEKIEL 4 Bible Online

EZEKIEL 4 - Chang Naga bible

EZEKIEL 4

¹Mühghaüei laukei, “Müteibü shou, juoklaang che sungashi, hoba kho ka thedanga phoashi, hoba kho thüka Jerusalem sangnyu noksa kümashi.

²Kho khulimbo thangetlabü kümashi, hoba kho khulimbo lapheishon shuong kümashi. Kho nyangko shongh kho to suokbü kümashi; kho nyangko lapheibü setshang kümashi hoba kho kaijembo khulimbo tuyetlabü peisilei tentian phoashi.

³Kho phaia namkung shelebü phau sungba hoba kho sangnyu kasi kanglanga nameibü kümthang phatko phoashi, hoba thiaeto kaibü thenyek yeiashi, hoba kho komleplabü hoba nyi kho khulimbo sangshibü kümlabü. Ho Israel phangshuong shanga tetsida che kilabü.

⁴“Kho phaia kaibü nanaenei no shimtian yepshi, hoba kho thüka Israel mütliei shed shonbü ka thüka künshi. Chalou lalokche no lengan kilaje kho thüng nyi haoeneibü shedbüshabü künlabü.

⁵Aishanga haoeneibü shabü ka- yang po che bang weko ngei ka la chalou lühbak che bang tetkuda. Hibü chalou saongao semto anjinngao nyi Israeleibü shedshonbü künlabü.

⁶Hobaje nyibou nyi ho küman phaia no kaibü maeaenei phetetnyu yepashi, hoba Jihudabü phangei shedshonbü künashi. Ngei ka la po shanga chalou che dogo chalou saonyi tetkuda.

⁷“Hobaje Jerusalem komlepbü aeto kaibü nyek theashi hoba kho khulimbo ik shingan tetenashi.

⁸Hobaje chühashi, nyi komlepbü takletbü chalou apen shongko jiphei ka jiphei to sepeila athüklabü lele ngei kala lühmong jinkuan khühleplabü.

⁹“Tokei whet si barli, kaobak si napashik, jei si monshushumai hoba shikmeimailabü khübü chak chenei jinshi, hoba khoei ka shanga wentek kümshi. Nyi khübü kho no chalou saongao semto anjinngao no nashuan yepbü sünga shaulabü.

¹⁰Hobaje nyi shaulabü shausiyung kho takbü chalou weko shekel saoche yingjan; chalou weko jih takletbü chenei nyi kho shaujan.

¹¹Hobaje nyi dei takbü hin phejan lak ka che yungjan; chalou weko jih takletbüa yungjan.

¹²Hobaje nyi müteibü sed linbü jikan wentek ngouashi hoba nyi kho mütshuongei hapbo barli wentek tegü shauashi.”

¹³Hobaje BUNYUBOUei laukei, “Kho tegü ong Israel shousi shuongei phangshuong yoa ngei haoen laeto shian sattilaje khonei asaüenbü wentek shaulabü.”

¹⁴Kheijinei ngei laukei, “Khei aying, Thükenbou BUNYUBOU! Chühashi, ngei ladangkei asao- pobüei ngo lolo shaan achühkei. Ngei heshoutang ka tou sühko hao lolo haibü, ayingsi meiei taketbü yingsikei kheibü asaüenbü ashauda. Ngei kü sembung to asaüenbü shausiyung jinan achühkei.”

¹⁵Hibü Mühghaüei laukei, “Aeibou maikei, müteibü sed jeiko ngei ka la masu sed kukho hoba khoei nyi kaibü wentek kümjan.”

¹⁶Tokei haoei kü to laukei, “Müteibü shou, ngei Jerusalema shausiyung shitikulabü. Mütshuongei wentek seret takletan maangsangko shaulabü, hoba haoenei dei jemtenko yunglabü,

¹⁷aishanga shausiyung si deiei aeibou mühlabü. Haoeneibü shedbü shabü haangjung haoen cheei che to mokkotham yeilabü.”