Read Chang Naga EZEKIEL 40 Bible Online

EZEKIEL 40 - Chang Naga bible

EZEKIEL 40

¹Kün langsenan phaia po saoto ngaoboubü, po haanbü lit chalou anboubü, hoba Jerusalem sangnyu shian apbü phaia po anthükleiboubü kiteikei. Khünyet chaloua BUNYUBOUeibü ik kü thüka kikei, hoba haoei ngo khüto leibakei.

²Mühghaüeibü mangsanga haoei ngo Israel kaodak to leian loukei hoba aicheküm- an shongh suokbü chenei ngo phoyokei. Ngei kü thedanga yungkük aenei sangnyu che huongbü phatko chem juongnyu hapbei.

³Hobaje haoei ngo khüto nyangko leian haukei, hoba chühashi, khünei müt che chühla chisaknam phatan kikei; hoba haoeibü ika takbü janglüh che hoba phodong ju che jungan bakhüna loan hapbei.

⁴Hobaje müt khoei kü to laukei, “Müteibü shou, kaibü nyekei chühashi, hoba kaibü nouei ditashi, hoba ngei ka la lenbü pendoua kaibü maangpon phoashi, aishanga khübü lenla shanga ngei no hato leibakei. Nyi hapbü pendou Israel mütli la lenashi.”

⁵Ngei Lembüchem che hapbei, hoba kho baei lelepan kikei. Kheijinei müt khoei takbü phodong ju jungkei hoba kho jutak che loubü kikei hoba haoei kümthang kho takkei. Kho jutak che suokbü hoba jutak che shangbü kikei.

⁶Kheijinei hao chaang ae yeibou bakhün khüto loukei. Hao younak khüto angkei, hoba onlangshanga haoei atshang kho takkei; hoba kho phodong jutak che haüan kikei.

⁷Hobaje kho danan lam che kikei hoba khonei lombou shuongeibü shemjang sem kiteikei. Shemjang weko süng si khaang phodong jutak che bang jeteitei kikei, hoba khübü kanglang kabü kümthang shuong kho iknop ngao bang shangan kikei. Hobaje lombou shemjang danan Lembüchem ae yeibou atshang bakhün khonei phodong jutak che kiteikei.

⁸Hobaje haoei bakhün chemso takkei;

⁹hoba kho iknop set haübü hoba khoeibü aüetbü thaonyu kho iknop penyi bang shangan kikei. Kho bakhün chemsoei Lembüchem ae yeian kikei.

¹⁰Hobaje chaangbou aenei bakhün maanga ji jinei lombou shemjang sem kikei; sem pendou takbü jeteitei kikei, hoba khübü kanglanga kümthang pendou kho jeteitei shangan kiteikei.

¹¹Kho phaia müt khoei bakhün to atbü khaang kho takkei; kho iknop an hoba khoeibü süng kho takbü iknop an kikei, hoba suokbü kho iknop anthüksem kikei.

¹²Hobaje lombou shuong shemjang thedanga iknop che suokbü kümthang kikei, hoba shemjang shuong kho pendou aenei jeteitei iknop lak bang kikei.

¹³Hobaje lombou shemjang ji kümthang ka ji sühko haoei takbüa khaang iknop saoto ngao, koukap che ka koukap che sühko kikei.

¹⁴Tokei haoei bakhüna maangkabü kümthang thungetbü kaiko takkei hoba kho iknop saosem kiteikei. Takbü kho khongae yeian kibü shemjang sühko kikei.

¹⁵Bakhün thedang khongchi ka maangae bakhün shemjang sühko iknop anjinsem kikei.

¹⁶Hobaje shemjang pendou kabü tangkabü kümthang hoba shemjang si shemjang kanglanga maangkabü kümthang pendoua koulom hanbang yettian kikei. Hobaje atshang ae yeian kibü thungetbü kümthang maangae pendoua pünglong noksa küman kikei.

¹⁷Kho phaia müt khoei ngo bakhün danko tangkabü khongmaang to leibakei. Khonei tangkabü kümthang to thenan dangbü shemjang khujin kiteikei, hoba khübü thedanga laangei yaüan jabü khongchi che kiteikei,

¹⁸hoba kho khongmaang kaiko yaüan kikei. Tangkabü khongmaang kho maangkabou khongmaang tokei kaobou kiteikei.

¹⁹Hobaje haoei kaobou shemjang maang ka maangkabou shemjang tangae kanglang takkei; kho chaangbou aenei hoba yungthang aenei iknop saongao bang kiteikei.

²⁰Hobaje müt khoei yungkük ae yeibou shemjang to atshang bakhün süngsikhaang takkei.

²¹Hobaje lombü shuongeibü shemjang sem pendoueibü thungetbü khamthung shuong kho takletbü jeteitei kikei. Kho tousüng iknop anjinsem hoba photak iknop saoto ngao kiteikei.

²²Khoeibü koulom shuong, thaonyu shuong kho hoba pünglong noksa kümbü shuong kho chaangbou bakhün ae yeibü takbü to jeteitei kikei. Hobaje khüto younak nyet angkei, hoba thaonyu shuong kho khübü tangkünga kikei.

²³Hobaje chaangbou aeto atboua kibü tegütham, khonei yungkük ae yeibou bakhün tangboua maangkabou shemjang to atlabü bakhün che kiteikei. Müt khoei bakhün penyi kanglang kho takkei hoba takbü iknop saongao kikei.

²⁴Hobaje haoei ngo yungthang aeto leian haukei hoba ngei khonei bakhün che hapbei. Haoei khoeibü aüetbü hoba thaonyu shuong takan chühkei hoba khünyi khokei lubü shuong tegütham takletbü jetei kikei.

²⁵Hobaje kho bakhün kabü shemjang shuong lubüa kibü tegütham koulom shuong kikei. Kho tousüng iknop anjinsem hoba photak iknop saoto ngao kiteikei.

²⁶Hobaje khüto angla younak nyet kikei, hoba khüto atlabü shemjang khokei khongchi ae yeiko thonbü aenei kikei. Hobaje jiji kümthanga thaonyu to yuko pünglong noksa kümbü kikei.

²⁷Hobaje yungkük aenei shemjang maangkabou aenei bakhün che kikei, hoba bakhün ka bakhün sühko yungthang ae takan chühkei hoba kho iknop saongao kikei.

²⁸Kheijinei müt khoei ngo yungkük bakhün danko maangkabou shemjang to leibakei, hoba haoei yungthang bakhün takan chühkei; ho takbü lubü shuong to jetei kikei.

²⁹Lombü shemjang shuong, thungetbü kümthang shuong hoba thaonyu shuong taksi lubü jetei kikei. Bakhün kabü shemjang shuong kaiko koulom shuong kikei. Ho tousüng iknop anjinsem hoba photak iknop saoto ngao kikei.

³⁰(Hobaje maangkabü shemjang kaiko thaonyu shuong kikei, tousünga iknop saotongao hoba photaka iknop ngao.)

³¹Hobaje khübü thaonyu shuong khongchi kabü shemjang ae yeian kikei; hoba khoeibü thaonyu shuong thüka pünglong noksa kikei, hoba khüto anglabü younak pemset kikei.

³²Kho phaia müt khoei ngo chaangbou bakhün danko maangkabou shemjang to leibakei.

³³Hobaje lombou shemjang shuong, kho thungetbü kümthang hoba thaonyu takan chühsi lubü to jetei kikei. Bakhün si thaonyu kaijembo koulom shuong kikei. Kho tousüng iknop anjinsem hoba photak iknop saoto ngao kikei.

³⁴Kho thaonyu shuong khoei shemjang ae yeian kikei; hoba pünglong noksa shuong jijiham aenei küman kikei, hoba khüto angla younak pemset kikei.

³⁵Hobaje müt khoei ngo yungkük bakhün to leibakei. Haoei kho takan chühkei hoba kho lubü shu- ong to jetei kikei.

³⁶Khübü phatko khoneikei lombü shemjang, noksa kümbü maangkabü kümthang hoba thaonyu kaijembo koulom kikei. Kho tousüng iknop anjinsem hoba photak iknop saoto ngao.

³⁷Hobaje hoeibü thaonyu kho khongchi kabü shemjang ae yeian kikei, pünglong noksa kümbü shuong kho jijihama kikei, hoba khüto angla younak pemset kikei.

³⁸Hobaje yungkük aekabü bakhüna thaonyu nyangko koukap yoa shemjang che kikei, khünei haoenei juokbü lembü sakan apbei.

³⁹Hobaje bakhün chemso- phanga shemjang jinei penyi hoba jinei penyi dogo khümsok lei kikei. Hobaje khübü khümsok thüka haoenei juokbü lembü, shabü lembü hoba saüsimaü lembü tegübü lembüsabü kulabü meisiau shuong haitikei.

⁴⁰Hobaje chemso tangae yungkük bakhün to atshang jiji aenei khümsok penyi bang, dogo jeteibü khümsok lei kikei.

⁴¹Hibü bakhün maang aenei khümsok lei hoba tang aenei lei dogo pendouei khümsok pemset lembü haitibü juokla shanga kikei.

⁴²Tokei laang ka jakenbü khümsok lei, tousüng iknop che tho hoba photak iknop che tho, hoba suokla iknop che kikei. Hobaje khübü khünei haoenei juokbü lembü kula haitilabü peisilei hoba lubü lembü peisilei shuong phokei.

⁴³Hobaje lembü haitian phe antian phola shanga kümthang kaijembo anjin ikmaang tetbang saüan kikei.

⁴⁴Hobaje haoei ngo maangkabou shemjang khüto leibakei. Hobaje maangkabü khongchia koulom shemjang penyi kikei, che yungthang bakhün junga yungkük ae yeian, hoba che yungkük bakhün junga yungthang ae yeian kikei.

⁴⁵Hobaje haoei kü to, yungthang ae yeian kibü shemjang ho Lembüchem lombü ungshedbou shuong shanga ki,

⁴⁶hoba yungthang ae yeian kibü shemjang kho lemshon lombü ungshedbou shuong shanga ki. Levieibü shousi shuong yoa haoen ong BUNYUBOU to khangenla shanga hao nyangko loula thükkei dogo laukei.

⁴⁷Kheijinei müt khoei maangkabou khongchi takan chühkei, hoba kho tousüng iknop saongao hoba photak iknop saongao, dogo süngsikhaang jeteitei kikei. Hobaje lemshon kho chemkoudeia kikei.

⁴⁸Kheijinei haoei ngo lembüchem chemsophang to leibakei. Haoei chemso thaonyu weko takan chühkei; khübü kho jijihama iknop ngao bang kikei. Atshang khaang kho iknop anthüklei hoba khoeibü thungetbü kümthang shuong khang kho jijihama iknop sem bang kikei.

⁴⁹Chemso khaang kho iknop saoche hoba thedang ka phai sühko iknop anthüknyi. Khonei chung younak an angan kikei, hoba atshang jijihama khamthung si thaonyu shuong kikei.