Read Chang Naga EZEKIEL 41 Bible Online

EZEKIEL 41 - Chang Naga bible

EZEKIEL 41

¹Kho phaia müt khoei ngo lembüchem to leibakei hoba thaonyu shuong takan chühkei; hoba kho jijiham photak iknop lakbang kikei.

²Hobaje chem maang to atshang lam kho iknop an kikei, hoba lam atshang naphei shuong kho jijiham iknop ngaobang kikei. Haoei tokei lemshang tangkabou kho takan chühkei; hoba kho tousüng iknop saonyi hoba khaang iknop saoche kikei.

³Kheijinei hao maangkabou lemshang to atkei, hoba khamthung weko atshang lam takan chühkei; khoeibü khaang iknop nyibang kikei. Atshang lamkhaang kho iknop lak kikei, hoba thungetbü kümthang shuong kho jijihama iknop nyet bang kikei.

⁴Hobaje haoei maangkabü lemshon khoeibü süng kho takan chühkei; kho iknop saoche kikei, hoba khoeibü tangkabü lemshon thon sühko taksi iknop saoche kiteikei. Haoei kü to laukei, “Ho Pendou to Saopobou Kaoen ki.”

⁵Kheijinei müt khoei Lembü- chem kümthang takan chühkei; kho iknop lak shangbü kikei, hoba chem kaiko hip aenei shemjang weko kho khaang iknop lei bang kikei.

⁶Hobaje naphei shemjang shuong kho chemlip chenei shemjang khujin bang sem thenan dangbü chem kikei. Chemlip weko Lembüchemeibü tangkabou kümthang kho, shemjang shuong kümthanga aphenyoko lola tinlabü lele phangkabou shon to pekbou kikei.

⁷Hobaje tangküng ka hapjineije, Lembüchem kümthang shuong kho khusunga onko jeteitei shangan hapbei. Hobaje Lembüchem tangkabü kümthang to yuko shemjang phangkaboutham ka jenyu kabü shemjang danko müt anglabü younak chung kikei.

⁸Hobaje Lembüchem kaijembo shemjang shanga chemshang longko shon tonenan küman ngei hapbei. Kho phodongei lapbo iknop lak loubü kikei.

⁹Shemjang tangkabü kümthang shangbü kho iknop ngao kikei. Lembüchem shemjang kanglangeibü kongkongbü kaoen

¹⁰hoba ungshedboueibü shemjang shuong kho Lembüchem kaijembo iknop saoche kikei.

¹¹Hobaje khongmaang ka naphei shemjang to haulabü lam yungthang aenei che hoba yungkük anei che kikei; hoba kong apyoan kishang kho kaijembo khaang iknop ngao kikei.

¹²Khongmanga Lembüchem chanep ae yeian kibü chem kho khaang iknop anjinlei kikei. Chem kaiko kümthang shangbü, hoba tousüng iknop anjinngao kikei.

¹³Kheijinei müt khoei Lembü- chem tang takan chühkei; hoba kho tousüng iknop saongao kikei. Hobaje Lembüchem khong ka kongkongbü kaoen danko chanep aekabü chem sühko taksi kanglang kho tousüng kho iknop saongao kikei.

¹⁴Chaangbou aekabü chem thedang ae kho khong yoan khaang iknop saongao kikei.

¹⁵Kheijinei haoei chemsüng jiji- hama shonshe yoan khong chanep ae takan chühsi tousünga iknop songao kikei. Lembüchem maangkabou, Sao- pobü Kaoen, hoba Pendou to Saopobou Kaoen

¹⁶pendou shon ka kouloma sühko bu kinlepbüei thanglepan kikei.

¹⁷Lembüchem maangkabou kümthang khümbomeiko, koukhün thüka sühko

¹⁸kaakyembü kherabim si pünglong noksa kümbüei küplepan kikei. Pünglong shuong si kaak- yembü kherabim che thena che dogo shemjang kaiko kümbei. Kaakyembü kherabim weko thenyek penyi bang yeman kikei:

¹⁹müteibü thenyekei ji aedang kabü pünglong to chühko, hoba ji pheinei molosaonyueibü thenyekei pünglong aeto yeian kikei.

²⁰Kho noksa shon ka koukap thüka onko küman kikei.

²¹Lembüchem Saopobü Kaoeneibü thaonyu shuong kho takbü jeteitei kikei. Pendou to Saopobou Kaoen koukhün to atshanga

²²bueibü lemshon phatko denche hapbei. Kho suokla iknop sem hoba süng si khaang iknop nyibang kikei; Hoeibü koukhün shuong denshang hoba naphei pendou buei kümbü kikei. Hobaje haoei kü to laukei, “Ho BUNYUBOU thedanga kibü khümsok ki.”

²³Lembüchem si Pendou to Saopobou kaoen hama koukap penyi bang kikei.

²⁴Khübü koukap weko kakphei penyi bang soueitaiko ki.

²⁵Kümthanga küman kibü tegütham, khübü koukap shuonga kaakyembü kherabim si pünglong noksa shuong küman kikei. Hobaje atshang chemso thaonyu kho buei yuklepan kümbei.

²⁶Hobaje chemso napheinei jijihama khinan kibü koulom kikei, hoba kho pünglong noksa kümbüei küplepan kikei. Hobaje Lembü- chem naphei shemjang thaonyu shuong küplepan kikei.