Read Chang Naga EZEKIEL 42 Bible Online

EZEKIEL 42 - Chang Naga bible

EZEKIEL 42

¹Kheijinei haoei ngo khong aekabü shemjang yungthang aeto leikei hoba Lembü- chem chanep thonbü aenei chem ka yongan asaako, Lembüchem yungthang aekabü chem to leikei.

²Yungthang ae yeian kibü chemsüng kho iknop saongao hoba photak iknop anjinsem kikei.

³Lin jiji thedang aenei maangkabou shemjang khong iknop saoche, hoba khong shemjang küplepan kibü khünei thenyoan kibü shemjang den sema lin küman setshang jajung angan kikei.

⁴Shemjang shuong thedang aenei lam che kikei, hoba kho khaang iknop an hoba tousüng iknop saongao. Hobaje khübüeibü koukap yungthang aenei kikei.

⁵Thenyoan kibü thükkabou shemjang shuong kho lubü toje nyonyembou kikei, aishanga setshang jajung angbüei lombabou shemjang si phangkabou shemjang toje haoen ka kaophei aei yaangbou lekei.

⁶Aishanga khübü shemjang shuong kho chem sem thenyoan dangbü kiteikei, khoei semboubü shon khoneije thaonyu akitei; hibü khoei haoen kho phangkabou si jenyu kabü shon to hanbou kikei.

⁷Khonei tangkabou kümthang, shemjang shuong si tangkabou khongchi to jeteitei kikei; ho shemjang thedang aeto iknop anjinsem lilangan kikei.

⁸Aishanga tangkabü khongchi thena shemjang lin kho tousüng iknop anjinsem kikei, hoba chühashi, lembüchem thedang aeneije iknop saongao kikei.

⁹Shemjang phangae kabü to chaangbou aeka atshang che kikei, aishanga khütoje tangkabü khongchi ka atshang lam kikei.

¹⁰Yungkük ae lembüchem shemjang thedang hoba chemeibü kümthang thükaenei shemjang shuong kikei

¹¹hoba khübü thedanga lam che kikei. Khübü kho yungkük ae yeian kibü shemjang shuong phatko kikei; süng si khaang jetei, kümsembü chühla jetei, hoba koukhün shuong jetei kikei.

¹²Hobaje kümthang khangshang, shemjang to atshang, chaang ae thonbüa chemeibü yungkük aekabü shemjang shuong phanga koukap che kikei.

¹³Kheijinei haoei kü to laukei, “Chem ham kho saopobü ki. Khübünei BUNYUBOU yobü to atbü ungshedbou shuongei lembü saopoboutham shauda. Aieilausi shemjang shuong kho saopobü buba ungshedbou shuongei lembü saopoboutham khonei tentian phokulabü: khübü kho shusiphon lembü hoba shabü shanga kubü lembüsabü ayingsi shedbü angbü lembüsabü.

¹⁴Ladang ungshedbou shuong Lembüchem maangto atlaje hoba khongto angmang sühda, kheijinei haoenei BUNYUBOU khangenjinei lebü saopobü neisimei kho khübü shemjang maanga phoyojan. Mütshuong kamshaian kibü kaoen to üangjinei haoenei lubü neisimei jeijan.”

¹⁵Ladang müt khoei Lembü- chem maangkabou kaophei takkhümbei, haoei ngo chaangbou bakhün danko lilangkei hoba tangkabou kaophei kaijembo takkei.

¹⁶Haoei phodong jungkei hoba chaangbou ae kho takkei; kho iknop saongao ngao kikei.

¹⁷Haoei phodong jungkei hoba yungkük ae takkei; kho iknop saongao ngao kikei.

¹⁸Haoei phodong jungkei hoba yungthang ae takkei; kho iknop saongao ngao kikei.

¹⁹Tokei haoei phodong jungkei hoba chanep ae sepeikei hoba takkei; kho iknop saongao ngao kikei.

²⁰Hibü haoei chemhip lei kho pendou takkei. Ho kaijembo kümthang kikei, hoba asaopobü ka saopobü bangnyinla shanga honei tousüng iknop saongao ngao hoba khaang iknop saongao ngao kikei.