Read Chang Naga EZEKIEL 43 Bible Online

EZEKIEL 43 - Chang Naga bible

EZEKIEL 43

¹Kho phaia müt khoei ngo chaangbou ae yeian kibü bakhün to leian haukei,

²hoba chühashi, Israel Mühghaü soneikangbü chaangbou aeka louko ngei hapbei. Haoeibü langh kho dei juong ngühbü tegü kikei, hoba kaodak kho haoeibü soneikangbüei ngesakan kikei.

³Ngei hapbü mangsang kho haoei sangnyu mautila loujinei ngei hapbü mangsang tegü kikei, hoba Kebar shumanga ngei hapbü mangsang tegü kikei, hoba ngo ngeibü the khüman yepbei.

⁴Hobaje BUNYUBOUeibü soneikangbü Lembüchem to chaangbou ae yeian kibü bakhün danko lotkei.

⁵Kheijinei Soushouei ngo leian angkei hoba maangkabou shemjang to leian loukei hoba chühashi, BUNYUBOU soneikangbüei Lembüchem kho shenkei.

⁶Müt kho kü junga loan kitoua Lembüchem maang ka BUNYUBOUei kü to joyobü ngei ditkei.

⁷Haoei kü to laukei, “Müteibü shou, hanei ngeibü Choba setshang ki. Ngo hanei Israel mütli shuong yoa kida hoba ngei haoen thüka ponpen songdakda. Touje Israel mütshuongei yingasikei ayingsi haoeneibü Choba shuongei yingasikei haoeneibü mühghaü shuong to lembü danko ayingsi haoeneibü Choba shuongeibü haibü mang khünbü danko ngeibü saopobü nyen ladangkei ashatilabü.

⁸Ladang Choba shuongei ngo si haoen kanglanga kümthang cheei ong auan, ngeibü amshang thena haoeneibü amshang, hoba ngeibü khamthung thena haoeneibü khamthung lotikei, kheijinei haoenei haoeneibü mangsenlabü kümsileiei ngeibü saopobü nyen shatikei. Hibü ngei ngeibü khauanga haoen mautikei.

⁹Tou haoenei lubü mühghaü shuong to lembü nangjan hoba haoeneibü Choba shuongeibü haibü mang heangsho shuong kuktijan. Haoenei khei kümalonga ngo haoen yoa ponpen kilabü.”

¹⁰BUNYUBOUei athakko laukei, “Müteibü shou, Israel mütli to haoen lulueibü shabü shanga himoulabü lele Lembüchem shangabü wanan lenashi. Haoenei kümthen kho daman nachüha,

¹¹hoba haoenei kümbü pendou shangabü haoen himouko kialonga, haoen la Lembü chemeibü kümthen, khei hoeibü kümhaang hele, satshang hoba lotshang, hoeibü kümhaang khümbo hoba takletbü si ngühkhüm pendou haoen la ngetiashi.

¹²Ho lembü chemeibü ngühkhüm ki: Shongh khua kaijembo leilang khümbo kho pendou to saopobou yinglabü. Chühashi, ho Lembü chemeibü ngühkhüm ki.”

¹³Habü ho iknop loubüei lemshang takan chühbü shuong ki, kho iknop che hoba ikmaang che takbü ki: Youdang aenei iknop che kilabü hoba photak kho iknop che, hoba thon kaijembo phak che, hoba kho lemshang denshang kho kilabü.

¹⁴Hobaje kao aenei kümyou phangkabou piyung koushang ka chemthon sühko iknop penyi, hoba photak iknop che, hoba chemthon hanbou ka chemthon yaangbou sühko iknop lei hoba photak iknop che.

¹⁵Hobaje lemshang hokjung kho tousüng iknop lei yinglabü, hoba lemshang hokjung thüka laang lei, che chenei iknop chebang yinglabü.

¹⁶Lemshang hokjung kho hip lei pendou aenei jeteitei, tousüng iknop anthüknyi hoba photak anthüknyi.

¹⁷Thükkabou chemthon kho pendou aenei takbü jeteitei, tousüng iknop anthüklei hoba photak iknop anthüklei, sembung thon iknop tho che hoba kaijembo kümbüa photak iknop che. Lemshon to anglabü younak shuong kho chaangbou ae yeian kikei.

¹⁸Hobaje Thükenbou BUNYUBOUei kü to laukei, “Müteibü shou, ngei ka to ai lendaje kho ditashi. Ladang lemshon kho yaülaje, nyi honei lembüsabü juokko hoba lemla kubü meisiau shuongeibü sii honei lakko saüenlabü.

¹⁹Zadok ka thenbü Levi phangeibü ungshedbou shuong ong kü to khangenla shanga ngo kishang to loujan. Ngo Thükenbou BUNYUBOUei ngühkhüm kuda. Nyi masu paangshou che shabü shanga lembü kula haoen la kulabü.

²⁰Nyi sii at sunglabü hoba kho laang leia hoba chemthon chemnyek lei hoba sembung kaijembo naanglabü. Kho tegütham nyi lemshon kho sakenlabü hoba saüenlabü.

²¹Kho phaia nyi shabü lembü shanga masu pongsu kho sungbalabü hoba kho Lembü- chem kaopheia takletbü saoposhanga juoklabü.

²²Nyibounyet nyi nali athebü lon paang che shabü lembü shanga lemlabü. Lemshang kho masu pongsueibü siiei saüenbü tegü saüenashi.

²³Ladang nyi saüenbü kho wanlaje, nyi nali athebü masu paangshou che hoba sanlon shuong yoka kap anakbü sanlon paang cheei lemjan.

²⁴Hobaje nyi khübü kho BUNYUBOU thedanga lemjan hoba ungshedbou shuongei haoen la jem phinkulabü hoba haoenei khübü kho BUNYUBOU la juokbü lembü kulabü.

²⁵Chalou nyetnyet chalou angboua lon paang che che shabü lembü shanga nyi lamlejan; tokei nyi kap anakbü masu paangshou che hoba sanchem ka sanlon paang cheei lemjan.

²⁶Chalou nyet ungshedbou shuongei lemshon dela shanga saüenlabü; kho tegü haoenei kho khümbo kuko saüenlabü.

²⁷Hobaje ladang chalou kho benlaje, setbounyet ka jaüan ungshedbou shuongei lemshon thüka kaneibü juokbü lembü lemlabü. Kheijinei ngei kan sungletlabü, dogo Thükenbou BUNYUBOUei lauda.”