Read Chang Naga EZEKIEL 44 Bible Online

EZEKIEL 44 - Chang Naga bible

EZEKIEL 44

¹Kheijinei müt khoei ngo chaangbou ae yeibü Lembüchem tangae bakhün to leibangaikei, hoba kho khinan kikei.

²Hobaje BUNYUBOUei kü to laukei, “Ho bakhün khinan ong kilabü. Ho aiplabü; aokei ho danko atla athük. Ho khinan ong kilabü, aieilausi Israel Mühghaü, BUNYUBOU ho danko ata.

³Choba ong ho bakhün maanga BUNYUBOU yoa setan shaula yungla thükkei. Hao atlabü hoba atshang shemjang bakhün danko hau longei dogo pailabü.”

⁴Kheijinei müt khoei ngo Lembüchem thedang yungkük bakhün aeto leibakei. Ngei chühsi BUNYUBOUeibü Lembüchem kho hao yobü soneikangbüei shenan hapbei. Ngei ngo lolo kaoa the khüman yepbei,

⁵hoba BUNYUBOUei kü to laukei, “O müteibü shou, nyi hapbü hoba ditbü pendou to maangsangko chühashi. Ngei ka la Lembüchem shanga ngühkhüm deikhüm kula kümda. Lembü- chem maangto aoyou lotla thükkei hoba longeila thükkei, hoba aoyou la asakkuda kho maangsangko chühan phoshi.

⁶“Ngüha alebü Israel chemdang to lenashi, Thükenbou BUNYUBOUei hai lauda: O Israel chemdang, kaneibü mangsenlabü kümsilei shuong kho khüai leshi!

⁷Kaneibü mangsenlabü kümsilei shuong pendou yo to tokei kanei kü la shausiyung, haabü hoba sii lemla kujinei kanei maangpona hoba phea akipbü küksithang shuong leibabü danko ngeibü Lembüchem shatikei, hoba kaneibü mangsenlabü kümsileiei ngeibü theyolanyobü leilukei.

⁸Hobaje ngeibü saopobü peisilei shuonga ikjai alebü ong ayingko, aeiko khübü küksithang shuong ngeibü saopobü peisileia ikjai lela leiyetkei.

⁹“Hibü Thükenbou BUNYUBOUei hai lauda: Maangpona hoba phea akipbü küksithang, khei Israel shousi shuong yoa kibü küksithang shuong mangkei aokei ngeibü Lembüchem to alotlabü.”

¹⁰BUNYUBOUei kü to laukei, “Lausikei kü jungka lounyu satbü Levibü shuong, ladang Israelbü ayingbü to haukei, haoenkei kü jungka bangan ayingbü heangsho shuong phaito haukei, haoenei jembü shedbü on künlabü.

¹¹Khei yingasikei haoenei lemshang koukhüna ikjaiko hoba lemshanga khangenko haoen ngeibü Lembüchema khangenbü shuong yinglabü. Haoenei mütshuongei juokbü lembü shanga sungbabü meisiau haitila thükkei, hoba mütshuong thedanga loan haoen khangenlabü.

¹²Lausikei haoenei haoeneibü heangsho thedanga haoen to khangenkei hoba Israel shousi shuong la shedbü shabü shontikei, khoei haoeneibü shedshonbü shanga ngei haoen shieikoelabü, dogo ngei theletlanletkei, dogo Thükenbou BUNYUBOUei lauda.

¹³Haoen kü jungto ungshedboueibü kümsilei kümla shanga ayingsi ngeibü saopobü kümsilei denche nyangko loula, ayingsi saopobü peisilei shuong shanga ngo nyangko aloujan ayingsi Pendou to Saopobou Kaoen to alotjan. Ho haoenei mangsenlabü kümsilei shuong kümbü shangabü himou kayang ki.

¹⁴Khei yingasikei ngei haoen la Lembü chema nongeisaelabü ikküm ikleia ikjai kulabü.”

¹⁵Thükenbou BUNYUBOUei laukei, “Lausikei Levibü Ungshedbou shuong Zadokeibü shousi shuong, Israelbü shousi shuong kü jungka ayingbü to satjinei ngeibü Lembüchema maanglanko ikjaiko kibü shuong, haoen ngo nyangko ngo khangenla loulabü hoba haoenei kü to haabü hoba siiei lemla kü thedanga lolabü, dogo Thükenbou BUNYUBOUei lauda.

¹⁶Haoen ngeibü Lembüchem to atlabü; hoba haoen ong kü to khangenla shanga ngeibü lemshon nyangko loulabü hoba ngei sakkubü khangenbü kümsilei kümlabü.

¹⁷Ladang haoen shemjang maangkabou to atlaje haoenei nei inyaibü neijan; shemjang maangkaboua ayingsi Lembüchem chemmaanga khangenjinei haoenei winei aneijan.

¹⁸Haoeneibü khua nei inyaibü kaijan hoba haoeneibü shenjanga nei inyaibü kaijin kijan. Haoen lem khümlabü neisimei aieikei haoenei shembei akaijan.

¹⁹Hobaje ladang haoen müt shaishang tangkabü shemjang to anglaje, haoenei haoeneibü neisimei hangletlabü hoba haoenei khangenshang saopobü shemjanga phoyolabü. Haoeneibü saopobü neisimeiei mütshuong aphaiyettila shanga lubü neisimei lelabü.

²⁰“Ungshedbou shuongei haoeneibü khu atongjan ayingsi haoeneibü khulou lounyukei ümjan; lausikei lemaia amjan.

²¹Ungshedbou shuongei maangkabou shemjang to atjinei aoeikei ih ayungjan.

²²Ungshedbou aoeikei latnyu ayingsi bangbü sao yakla alelabü, lausikei Israel chemdang ka bukbü medei ayingsi ungshedboueibü yak latnyu che lela thükkei.

²³“Haoenei ngeibü mütli la saopobü si asaopobü kanglanga bangnyinbü lenjan, hoba haoen la hinseibü si ihinseibü kanglanga janyinla lenjan.

²⁴Oyolemen longsi haoenei matjembou tegütham ngüh jembulabü, hoba haoenei mat kho ngeibü ngühkhüm haangei jembujan. Ngeibü ngühkhüma kibü tegütham haoenei songle mailem lemsilang jungeilabü, hoba haoenei Nounyet saopotham pholabü.

²⁵“Ungshedbou aoeikei, haoeibü bou ayingsi nyu, ayingsi jayangshou ayingsi nouyangshou, jaisina ayingsi chemdang ayeibü medei to liman haibü mang to totyobüei jembü lolo ashattijan.

²⁶Hobaje kho tegü haoei totyoalonga chalou nyet haoei dantijan hoba kho phaia hao saüenlabü.

²⁷Hobaje saoposhanga khangenla hao maangkabou shemjang to khangenla hao ladang atlaje haoei hao shanga shedbü lembü kujan, dogo Thükenbou BUNYUBOUei lauda.

²⁸“Haoenei phetphan akilabü; ngo haoeneibü phetphan: hoba nyi Israela haoen la ai nyaksinam akulabü; ngo haoeneibü nyaksinam ki.

²⁹Shausiyung lembü, shabü lembü hoba shabü debü lembü shuong kho haoeneibü shausiyung kilabü; hoba Israela khümbo kubü saüenbü pendou haoeneibü yinglabü.

³⁰Aishanga shaangbou buhek deihek maiboutham hoba ajanjan pendou lembü laobou kanei kuda kho ungshedbou shuong shanga kilabü; hoba kaneibü chemdanga haülabü kila shanga kanei shaangla wentek kümbü ungshedbou la kujan.

³¹Au yingasikei ayingsi meisiau yingasikei, yemei haibü ayingsi meiei taketbü aikei ungshedbou shuongei ashaujan.”