Read Chang Naga EZEKIEL 45 Bible Online

EZEKIEL 45 - Chang Naga bible

EZEKIEL 45

¹Ladang kanei phetphan shanga kao jankulaje sao- pobü kao phejan BUNYUBOU la lemla kujan, kho loula iknop hajar saoto ngao hoba khaang iknop hajar saoche yinglabü; hoba kaijembü khümbo kho saopobü yinglabü.

²Khonei Lembüchem shanga chemnyek lei pendou aenei iknop saongao ngao bang kilabü, hoba kaijembo kanglanga kongbü kaophei iknop anjinsem kilabü.

³Hobaje kho kaoen ka tousüng iknop hajar saoto ngao hoba khaang iknop an dogo khonei Lembüchem, pendou to saopobü kaoen shanga kanei takletjan.

⁴Kho saopobü kaonyek yinglabü; kho saoposhang khangenbü shuong, aoyou BUNYUBOU nyangko khangenla louda, khübü ungshedbou shuong shanga kilabü, hoba kho haoeneibü chem shanga kaophei hoba Lembüchem shangabü saopobü kaoen yinglabü.

⁵Hobaje Levibü shuong aoyouei lemshanga khangenda, haoen shanga tousüng iknop hajar saoto ngao hoba khaang iknop hajar an kilabü; kho haoen shanga kishang chem shanga kilabü.

⁶Hobaje saopobü kaonyek shangabü jaletbü then to jenshuokko sangnyu shangabü kaonyek khaang iknop hajar ngao hoba tousüng iknop hajar saoto ngao sungenlabü; ho Israelbü pendou shangabü yinglabü.

⁷Tokei songdakbou Choba shanga kaophei sungenjan. Saopobü kaoeneibü chanep leilang ka ho Mediterrania Yungnyu sühko chanep aeto thenlanglabü; hoba hoeibü toulei kho Israel phang la jaletkubü kaophei to jeteitei yinglabü lele, chaangbou leilang ka ho kaonyeka chaang aephei to thenlangko jaletlabü.

⁸Israela ho haoeibü nyaksinam yinglabü. Hobaje ngeibü Choba shuongei touje ngeibü mütli ashiakoelabü; lausikei haoei Israel mütli la haoeneibü phang thüngthüng kao letilabü.

⁹Thükenbou BUNYUBOUei hai lauda, “O Israel songdakbü shuong, kanei shabü souko shona! Ikshatbü hoba shieikoe nangashi. Ai janbü si ngühmai ki kho kümashi. Touje kanei ngeibü mütli shuong haoeneibü kaonyek ka shian asattijan, dogo Thükenbou BUNYUBOUei lauda.

¹⁰“Kanei deiabü si linbü peisilei seret haubütakbüa ngühmai jungeijan.

¹¹“Efa si bat takbü jetei kilabü, khei bat kho homer phejan ana che, hoba efa kho homer phejan ana che yinglabü; homer kho tükdebü takletbü kilabü.

¹²“Hobaje shekel kho gera sao- che yinglabü; shekel saoche hoba shekel saoto ngao hoba shekel anthükngaoei kaneibü mina che yinglabü.

¹³“Kanei kulabü lembü kho ho ki: whet youshou homer weko ka efa chenei lakboubü hoba barli youshou homer weko ka efa chenei lakboubü.

¹⁴Kor weko, batei takbü onang kho phejan ana che ki (laobou bat an ayingsi homer cheei onda, aishanga bat an kho homer che to jetei ki).

¹⁵Tokei, Israela nindei lakbü lamshaushang ka sanshuong tan weko ka sanlon che bang sungbalabü. Khübü kho shausiyung lembü, juokbü lembü, sangmai lembü, khei mütshuong shanga shabü dela shanga jungeilabü, dogo Thükenbou BUNYUBOUei lauda.

¹⁶“Kaonyeka müt pendouei ho jongsakla kubü Israela konglebü shuong shanga phejan lelabü.

¹⁷Hobaje lemalanga hoba Israelbü chung pienbü lemsilang, khei Litnyu Haanbü hoba Nounyet tegübü pendoua, juokbü lembü, shausiyung lembü hoba yunglabü lembü kulabü kho konglebü shuongeibü phejan yinglabü. Israel chungeibü shabü dela shanga haoei shabü lembü, shausiyung lembü hoba sangmai lembü lamlejan.”

¹⁸Thükenbou BUNYUBOUei hai lauda, “Shaangbou lita shaangbounyet kanei nali athebü masu paangshou che sungashi hoba Lembüchem saüenlabü.

¹⁹Hobaje ungshedbouei shabü lembü sii kho sunglabü hoba kho Lembü- chem koukhüna hoba lemshon chemnyek leia hoba maangkabou shemjang koukhün thaonyu shuong thüka thipbulabü.

²⁰Kanei lita chalou nyetbounyet, müt atei alemlele ayingsi ai angeko mashikan kisi shanga dogo haoen nyena kho kümbulabü; kho khei kanei Lembüchem shanga shabü dean apbü kümsilei kümlabü.

²¹“Shaangbou lit chalou anthük leibounyeta kanei Püetbülem lijan, hoba kho chalou nyet libü lem, laonei kanei tokai ajinbü wentek shaulabü.

²²Khünyet songdakbouei jembü shanga hoba kaonyeka mütli pendou shanga masu pongsu che shabü lembü shanga sungbalabü.

²³Hobaje chalou nyeteibü Lemli sünga haoei chalou weko nali athebü masu pongsu nyet hoba sanlon paang nyet BUNYUBOU to lemla sungbalabü hoba kho pemtolo juokbü lembü kulabü. Tokei haoei chalou weko lonpaang che bang shabü debü lembü kulabü.

²⁴Hobaje shausiyung lembü shanga masu pongsu weko efa che lamlelabü hoba sanlon paang weko efa che, hoba efa weko shanga oliv onang hin che lamlejan.

²⁵“Lit nyetboubü, chalou anthük ngaobounyet khangbü chalou nyeteibü Lemli jihsiphaiakei, songdakbouei shabü shanga lembü, juokbü lembü, shausiyung lembü hoba oliv onang lembü lamlelabü.”