Read Chang Naga EZEKIEL 46 Bible Online

EZEKIEL 46 - Chang Naga bible

EZEKIEL 46

¹Thükenbou BUNYUBOUei hai lauda, “Maangkabou shemjang koukhün chaangbou ae yeian kibü kho kümsilei kümbü chalou lak khinan kilabü, lausikei Nounyet si Lit Haanbü chalouaje kho iplabü.

²Hobaje songdakbou thükkabou koukhün chemso lam khüto atlabü, hoba koukhün thaonyu nyangko lolabü. Ungshedbou shuongei haoeibü juokbü lembü hoba haoeibü sangmai lembü lemlelabü. Haoei kouyoua lemlabü, kho phaia hao anglabü, lausikei bakhün khoje chasem sühko akhinlabü.

³Hobaje Nounyet si Lit Haanbüa kaonyek kabü mütli shuongei kho bakhün koukap junga BUNYUBOU to lemlabü.

⁴Hobaje songdakbouei Nounyet BUNYUBOU to lemla sungbalabü kho sanlon paangshou lak hoba sanlon paang che, khübü pendou nali athebü yingjan.

⁵Hobaje sanlon paang yoa sungbalabü shausi- yung lembü kho efa che yingjan, hoba sanlon shoushou yoa sungbalabü shausiyung lembü khoje haoei thükthung, kho yoa efa weko shanga oliv onang hin che bang.

⁶Hobaje Lit Haanbü chalounyet haoei kap anakbü masu paangshou che, sanlon shoushou lak hoba sanlon paang cheei lemjan.

⁷Hobaje shausiyung lembü che tegü, masu pongsu yoa efa che, sanlon paang yoa efa che hoba sanlon shoushou shuong yoa haoei thükthüng, kho yoa efa weko shanga oliv onang hin che bang.

⁸Hobaje ladang songdakbou kho lotlaje hao koukhün chemso aeto atlabü hoba hao kho lam to anglabü.

⁹“Lausikei ladang mütshuong BUNYUBOU thedangto pienbü lemsilang to atlaje, ao yungthang bakhün lam ka lemla atlaje hao yungkük bakhün lam to anglabü; hoba ao yungkük bakhün lam ka atlaje hao yungthang bakhün lam to anglabü. Aokei hao atshang bakhün lam to sepeinyu alongeilabü, lausikei mütpem weko hao lotbü tangküng lam to ngailabü.

¹⁰Ladang haoen atlaje songdakbou kho haoen yoa atlabü, hoba ladang haoen anglaje hao haoen yoa anglabü.

¹¹Lem chalou hoba pienbü lemsilanga, shausiyung lembü kho masu pongsu che yoa efa che, sanlon paang yoa efa che, hoba sanlon shoushou shuong yoa haoei thükthüng, kho efa weko shanga oliv onang hin che bang.

¹²“Hobaje ladang songdakbouei BUNYUBOU la maangangbü lembü che kulaje, khei juokbü lembü yingasikei ayingsi maangmai lembü yingasikei, hao shanga chaangbou bakhün kho ipbulabü. Haoei Nounyet lembü tegütham haoeibü juokbü lembü ayingsi haoeibü maangmai lembü kulabü. Kho phaia hao angan aplabü hoba hao phainei bakhün kho khinlabü.”

¹³BUNYUBOUei lauda, “Chalou angboua BUNYUBOU la kap anakbü po cheeibü sanlon shoushou che bang juokbü lembü kulabü; kanei kho ngeyang weko lamlejan.

¹⁴Tokei kanei kho yoa ngeyang weko shausiyung lembü shanga efa ka phejan lak la janan che, kho yoa wena nyatyola shanga oliv onang hin ka phejan sem la janan che dogo lamlelabü. BUNYUBOU la lemlasala kulabü kho ponpen shanga kaangbüsekbü ngühkhüm kilabü.

¹⁵Kho tegü haoenei san shoushou, shausiyung lembü hoba oliv onang ngeyang weko athakko juokbü lembü kula lamlelabü.”

¹⁶Thükenbou BUNYUBOUei hai lauda, “Songdakbouei hao shousi yo ka che la haoeibü sekphai ka jongsak la kualonga kho haoeibü thensileneibü yinglabü; kho phetsihek aeka haoeneibü peisilei ki.

¹⁷Lausikei, haoei haoeibü phet ka haoeibü sambü yoa che la jongsak la kualongaje, dongebü chalou asüh shongko kho sambü khoeibü yinglabü; kho phaia songdakbou la ngaitikulabü. Haoeibü phetphan kho hao shousi shuong shangabü kilabü.

¹⁸Hobaje songdakbouei mütshuongeibü phetphan nyaksinam aikei alangkujan. Haoei jembü shousi la kubü nyaksinam khoje, kü mütlieibü kao soan sungko haoen aokei ashiakoelabü lele, hao la janletkubü kaophei ka ong yingjan.”

¹⁹Kheijinei müt khoei yungthang aephei yeibü bakhün danko atshang shemjang yungkük aenei maangkabou khongyaang to ngo leibakei. Khübü kho ungshedbou shuong shanga saopobü shemjang ki. Haoei kü la chanep shemjang aenei kaoen che shean lenkei,

²⁰hoba laukei, “Ho ungshedbou shuongei shabü shanga lembü ayingsi shabü debü phe thungshang hokjung hoba shausiyung lembü wen kümshang ki, kho mütshuong anou asouko üptilabü lele haoenei saopobü peisilei tangkabü shemjang to asungba.”

²¹Kheijinei haoei ngo tangkabü shemjang danko leian haukei, hoba chühashi, shemjang chemnyek lei wekoa shemjang che che kikei.

²²Shemjang lei chemnyeka shemjang sapyoan kikei, kho tousünga iknop saonyi hoba khaang iknop khujin kikei; chemnyek lei pendoua shemjang weko takbü jetei ong kikei.

²³Hobaje khübü chemlin kaijembo laangeibü kümthang kikei, hoba kümthanga thenan hokjung kikei.

²⁴Kheijinei haoei kü to laukei, “Habü ho thungshang juokshang chem ki, hanei Lembüchema khangenbü shuongei mütshuong shanga lembü haitibü thungla shanga ki.”