Read Chang Naga EZEKIEL 47 Bible Online

EZEKIEL 47 - Chang Naga bible

EZEKIEL 47

¹Hobaje müt khoei ngo se- peinyu Lembüchem koukhün to leibakei. Hobaje chühashi, chaangbou ae Lembüchem koukhün phang ka dei pakkei (aishanga Lembüchem kho chaang ae yeian kikei). Dei kho Lembüchem phang yungthang aeka, lemshon yungthang ae ka loukouko kikei.

²Kheijinei müt khoei ngo Lembüchem ka yungkük aekabü bakhün lam ka leilangkei hoba chaangbou ae yeibü bakhün kaijembo leiyeikei. Hobaje chühashi, yungthang bakhün aeka shumang hanbüshou che kouko kikei.

³Müt khoei haoeibü ika takbü janglüh jungan chaangbou ae haukei, haoei iknop hajar che takkei, hoba younyeka thükko koubü dei khatko ngo leian dankei.

⁴Nyibou haoei hajar che takkei hoba youküka thükko kibü dei danko ngo hautikei. Tokei haoei hajar che takkei hoba shenjang sühko kibü dei danko haoei ngo hautikei.

⁵Kho phaia tokei haoei hajar che takkei hoba khoje ngei akhatenlabü shumang che kikei. Aieilausi kho dei itjung danlabü to liman akhatenlabü lele haüan kikei.

⁶Haoei kü to laukei, “Müteibü shou, nyi ho hapdalao?” Kheijinei haoei ngo sepeian yungko aeto leibakei,

⁷hoba ngo ladang khünei sühlangkei, chüh- ashi, ngei yungkoa jijihama bulong juongnyu hapbei.

⁸Haoei kü to laukei, “Ho dei chanyu angbou kaonyek to kouda, hoba Jordan Yo to hoba Haibü Yungnyu to kouda. Ladang ho Haibü Yungnyu to atda, hoei kho yungnyu kabü jemdei kho koshikbü deimai la yeitida.

⁹Shumang kho laeto ong koulaje, shuong shuonga paibü meisiau phang pendou khonei kilabü. Khünei ngau juongnyu kilabü, aieilausi ho shumang khüto kouda hoba jemdei kho koshikbü deimai la yeitida; hibü ho shumang laeto ong koulaje khünei ajanjan pendou lang kilabü.

¹⁰Ngau lapbü shuong yungko sünga lolabü; Engedi ka Eneglaim sühko yungkoa haoeneibü tak pinlabü kaoen kilabü. Khünei Yungnyu Yaangboua kibü tegütham ngau phang juongnyutham kilabü.

¹¹Lausikei deidang hoba thimdei akoshiklabü; khübü kho jem bakshang kilabü.

¹²Yungko jijihama shausiyung shanga bulong phang pendou khünei yemlabü. Khübüeibü pikyik shuong ladangkei ayuilabü, ayingsi khübüei buhek ahekko akilabü. Khübüei lit weko lang heklabü, aieilausi haoen to lakbü shumang kho Lembüchem ka kouda. Haoeneibü hek shausiyung shanga hoba haoeneibü pikyik shuong maitilabü shanga kilabü.”

¹³Ho tegü Thükenbou BUNYUBOUei lauda, “Israel phang anthüknyi yoa phetphanla shanga kaonyek nyi jankula shanga habü ho leilang ki. Josef jungto phejan nyi haulabü to liman kanei kho jeiteitei janlabü.

¹⁴Kaneibü püshi shuong la ngei ik shingan ho kaodak kula thekubü tegü ho kan shanga phetphanlabü kilabü; ho kan kanglanga jeteitei janashi.

¹⁵“Habü ho kaonyu leikhu leidang yinglabü: Yungkük aenei Yungnyu Yaangbou ka Hethlon sangnyu ka Hamat Lamnyu ka Zedad sangnyu sühko.

¹⁶Kho Berotha si Sibraim (laobou Damaska si Hamath leilang kanglanga kida), kho Hauran leilanga kibü Hazer Hattikon sühko.

¹⁷Yungkük leilang kho Damaska yungkük leilanga Hazer Enan, hoba yungthanga Hamath leilanga sühko koulabü. Kho yungthang leilang kilabü.

¹⁸“Chaangbou leilang kho Damaska si Hauran kanglang kabü kaonyek kük ka yungkük ae, hoba kho Jordan Shumangei chanep aenei Israel kaophei si chaang aenei Tamar jembo, Gilead kanglanga leilang longtiko kouda. Kho chaangbou leilang kilabü.

¹⁹“Yungthang leilang aenei Tamar ka Meriba Kadesh dei sühko, khüka Ijep kabü Wadi shumang aenei Yungnyu Yaangbou sühko. Ho chaangbou leilang kilabü.

²⁰“Chanep aenei Hamat lamnyu tangküng kaopheia sühko Yungnyu Yaangbou kho leilang kilabü. Ho chanep leilang kilabü.

²¹“Kho tegü kan yoa ho kaonyu Israel phangshuong thüngthüng kanei janyojan.

²²Hobaje kho kan lolo phet phanla shanga janletlabü, hoba kan yoa shousi bukan kibü yenbou shuong la janletkujan. Kanei haoen kho Israel mütli mütlang hima weeijan; hoba haoenlakei Israel phang yoa phetphan janletkulabü.

²³Laobou phanga ong yenbou kho kilaje, khünei kanei haoeibü phet janletkujan, dogo Thükenbou BUNYUBOUei lauda.”