Read Chang Naga EZEKIEL 48 Bible Online

EZEKIEL 48 - Chang Naga bible

EZEKIEL 48

¹Yungthang kao leilang kho Yungnyu Yaangbou ka Hethlon to, Hamat Lamnyu to, Enon Sangnyu to, hoba Damaska si Hamath sangle kanglang leilang chaangbou aeto lida. Phang wekoei yungkük ka yungthang sühko chaangbou kao leilang ka Yungnyu Yaaangbou jembo kaonyu phejan takletbü che bang ho tegü hapjan: Dan Asher Naftali Manasse Efraim Reuben Jihuda

⁸Jihuda leilang nyangko chaangbou aeka chanep sühko kanei aeila lemla kulabü kho kilabü. Ho khaang iknop hajar saoto ngao kilabü, hoba chaangbou ka chanep sühko tousüng kho phang cheeibü phejan hima kilabü. Lembüchem kho jenyuyaaka kilabü.

⁹BUNYUBOU la kanei lemla kulabü kho tousüng iknop hajar saoto ngao hoba khaang hajar an.

¹⁰Ho ungshedbou shuong shanga saopobü phejan kilabü. Ho yungthang aenei tousüng iknop hajar saoto ngao, chanep aenei khaang iknop hajar an, chaang aenei khaang iknop hajar an hoba yungkük aenei tousüng iknop hajar saoto ngao kilabü. Hobaje khoeibü jenyuyaaka BUNYUBOUeibü Lembüchem kilabü.

¹¹Kho janletbü kaophei Zadok shousi shuong saüenbü ungshedbou shuong shangabü kilabü. Haoenei ngo maanglanko khangenkei hoba lubü Levi phangei kümbü tegütham joubü Israelbü shuong neinouko ayinglam to asat.

¹²Hibü haoen la Levibüeibü kaophei to leiko saopobü kaophei ka phangche shanenko janletkubü ki, hoba kho pendou to saopobou phejan kilabü.

¹³Levibü shuongeikei ungshedbou shuongeibü kaophei to leiko yungkük aenei aeila janletbü kaophei che kilabü. Kho tousüng iknop hajar saoto ngao hoba khaang iknop hajar an.

¹⁴BUNYUBOU shanga saüenbü kaophei kho kaonyu phejan pendou to maibou ki, hoba haka che ongkei ayaakshaulabü ayingsi aotokei ajeiyolabü. Ho saopobü hoba BUNYUBOUeibü ki.

¹⁵Hobaje joubü kaophei khaang iknop hajar ngao hoba tousüng iknop hajar saoto ngao kho sangnyu shanga chemsibung dangla hoba lamshaushang kee tegübü shanga jungeilabü.

¹⁶Hobaje khübüeibü takletbü habü ho kilabü, chanep phei iknop hajar leito saongao ngao, hoba chaangbou naphei iknop hajar leito saongao ngao hoba chanep iknop hajar leito saongao ngao.

¹⁷Hobaje sangnyua lamshaushang kee kho yungthanga iknop saoanto anjinsem, yungküka iknop saoanto anjinsem, chaangboua iknop saoanto anjinsem, hoba chanepa iknop saoanto anjinsem jaletlabü.

¹⁸Joubü chaangbou aenei tousünga iknop hajar an hoba chanep aenei hajar an saopobü kaophei to nyangyoko kilabü. Khüka longbüei sangnyua kümbüleibü shuong shanga shausiyung kulabü.

¹⁹Hobaje kho Israel phang pendou ka kümbüleibü shuongei mouenlabü.

²⁰Janletkubü khümboei jiji- ham aenei süng si khaang iknop hajar saoto ngao yinglabü. Kanei saopobü phejan kho sangnyubü peisilei yoa aeilabü jongsak che tegü shanenko sungenan phojan.

²¹Saopobü phejan si sangnyubü peisileiei jijiham aedanga kaangtibü kaophei kho songdakboueibü yinglabü. Ho saopobü phejan ka chaangbou leilang to iknop hajar saoto ngao, hoba chanep leilang to iknop hajar saoto ngao dogo lilabü. Phangeibü phejan toulei to linyoko kaophei ham songdakbou shangabü yinglabü, hoba Lembüchem yoan saopobü kaoen kho jenyuyaaka kilabü.

²²Hibü Levi shuongeibü peisilei si sangnyueibü peisilei shuong kho songdakboueibü kaophei jen- yuyaaka kilabü. Songdakboueibü kaophei kho Jihuda si Benjamin leilang kanglanga kilabü.

²³Aeila janletbü yungkük aenei joubü phang wekoei, chaangbou leilang chanep ae ka Yungnyu Yaangbou jembo yungthang ka yungkük sühko kaonyu takletbü che bang ho hai hapjan: Benjamin Simeon Issakhar Zebulun Gad

²⁸Gadeibü yungkük leilang kho Tamar ka Meribath-Kadesh dei sühko, hoba khüka Ijep kabü Wadi shumang ka Yungnyu Yaangbou sühko kilabü.

²⁹“Kanei Israel phangshuong la janletkulabü phet kho ho kaodak ki; hoba habü ho haoeneibü phejan ki,” dogo Thükenbou BUNYUBOUei lauda.

³⁰Habü ho sangnyu bakhün shuong kilabü: Yungkük aephei ka khangan, laobou tousüng iknop hajar leito saongao ngao,

³¹sangnyu bakhün shuong kho Israel phangeibü nyen nyenlabü. Yungkük aenei bakhün sem kho Reuben bakhün, Jihuda bakhün hoba Levi bakhün.

³²Chaangbou aenei bakhün sem kilabü, laobou tousüng iknop hajar leito saongao ngao: kho Josef bakhün, Benjamin bakhün hoba Dan bakhün.

³³Yungthang aenei bakhün sem kilabü, laobou takbü iknop hajar leito saongao ngao: kho Simeon bakhün, Issakhar bakhün hoba Zebulun bakhün.

³⁴Chanep aenei bakhün sem kilabü, laobou tousüng iknop hajar leito saongao ngao: kho Gad bakhün, Asher bakhün hoba Naftali bakhün.

³⁵Tang kaijembo kanglang kho iknop hajar anthükset yinglabü. Hobaje khünyet ka jaüan kho sangnyu nyen: “BUNYUBOU Hanei Kia!” dogo nyenlabü.