Read Chang Naga EZEKIEL 5 Bible Online

EZEKIEL 5 - Chang Naga bible

EZEKIEL 5

¹Hobaje BUNYUBOUei laukei, “Müteibü shou, nyi in akbü che sungashi, hoba kho khushula khujin tegü jungeishi, hoba khoei kaibü khu si sembung wi kütan apashi. Kho phaia nyi seret kung jungashi hoba khulou kho janyinko takashi.

²Ladang sang komlepbü chalou shuong kho dankhümlaje sangnyu sangjia phejan sem ka che nyi jikan apashi. Hobaje phejan che kho nyi sangnyu kaijemjinei inei netla yeiko jemnyinshi. Hobaje phejan sema che nyi yei la soulangtiashi. Aishanga ngei haoen in in setenan shilabü.

³Hobaje nyi khüka shisho sungashi hoba kaibü shembe neia senashi.

⁴Hobaje kho nyibou nyi sungshi hoba wanji to jinshi, hoba kho wana lontishi. Kho ka Israel chung pendou aeto wan aalabü.”

⁵Thükenbou BUNYUBOUei hai lauda, “Ho Jerusalem ki, ngei hao phangshuong yoa phoyokei hoba kaonyek shuong hao kaijembo ki.

⁶Lausikei sao kaijembo kibü kaonyek shuong tokei aei amaibou kükhu limbei hoba saoei ngei sakkubü ngühkhüm deikhüm ajungei.

⁷Hibü Thükenbou Thükenbou BUNYUBOUei hai lauda, ‘Kan kaijembo kibü phangshuong tokei kanei aei ngüha ale, hoba ngeibü ngühkhüm deikhüma apai ayingsi ngeibü sakkubü ajungei. Kanei kan kaijembo kibü kaonyek shuong haang to ongkei paplepbo ajungeien.’

⁸Hibü Thükenbou BUNYUBOUei hai lauda, ‘Chühashi Jerusalem, ngo kakhu limbo kia, hoba phangshuong thedanga ngei kan la kayang kuko matjemlabü.

⁹Kaibü mangsenlabü kümsilei shuong shanga ngei kan yoa ladangkei küman achühbü hoba ho phaiakei ladangkei akümlabü kümsilei kümlabü.

¹⁰Kho haangjung kan yoa bousi shuongei shousi shuong shaulabü hoba shousi shuongei bousi shuong shaulabü. Ngei ka yoa matjemlabü hoba kan jouletbü shuong khümbo ngei yeia pilangtilabü.’

¹¹“Hibü ngo lang ki shongko, dogo Thükenbou BUNYUBOUei lauda, kanei kaneibü amaibü kümsilei hoba mangsenlabü kümsilei pendouei ngeibü Lembüchem shatia. Hibü ngei ka to üeisanou ayingsi onou akiko wapan tuongtilabü.

¹²Kan mütli phejan sem ka che sangnyu maanga limsilangei hoba mühsinouei hailabü; phejan sem ka che kan kaijembo kibüeibü inei tuonglabü; hoba kho phaia joubü phejan che kho ngei yei to aatilabü hoba haoen in phinan shilabü.

¹³“Kheijinei ngeibü khauang koulabü hoba ngeibü maangshat haoen thüka maangamailabü, hoba semjung ngailabü. Hobaje ladang ngei ngeibü maangshat haoen thüka yingtilaje, haoenei ngo BUNYUBOU maangshatei joyoa dogo ngelabü.

¹⁴Tokei ngei no kaijembo kibü phangshuong yoa hoba danbüphaibü pendou thedanga no inletbü hoba akhainyu che yeitilabü.

¹⁵“Ladang ngei ka to khau- angbü hoba maangpokbüa hatlamoklabü hakbüei matjemlaje no kaijembo kibü phangshuong shanga no moklabü jemtenlabü hoba maangpanglabü yinglabü; ngo BUNYUBOUei kho laua.

¹⁶Hobaje ngei kan khulimbo mühsinouei shemlabü hoba leilubüei hailabü laujin kipan litilabü. Ngei kan thükto mühsinou aei aei sungbalabü hoba kaneibü shausiyung hapshang khinkulabü.

¹⁷Hobaje ngei kan khulimbo mühsinou hoba yambabü meisiau hautikulabü, hoba khübüei kaneibü shousimi shemtilabü. Shatlimnyatlim hoba sii angbü kan thükto danlabü hoba ngei kan khulimbo in sungbalabü. Ngo BUNYUBOUei kho laua.”