Read Chang Naga EZEKIEL 6 Bible Online

EZEKIEL 6 - Chang Naga bible

EZEKIEL 6

¹Hobaje BUNYUBOUeibü ngüh kü jungto loukei:

²“Müteibü shou, Israelbüeibü shongh shu- ong aeto kaibü thenyek sepeiashi, hoba haoen khulimbo tetenashi

³hoba lenashi, O Israel shongh shuong, Thükenbou BUNYUBOUeibü ngüh ditashi. Shongnyu si shonghshou shuong to, kaokhuong si pholi shuong to Thükenbou BUNYUBOUei ho hai lauda: Ngei kan khulimbo in sungbala kümda, hoba ngei kaneibü heangsho lemshang shuong leilukulabü.

⁴Hobaje kaneibü lemshang lusaklabü hoba kaneibü jenjok lemshon netlaphoula yeilabü; hoba ngei ka mütshuong pendou kaneibü lemshon thea haitikulabü.

⁵Ngei Israel shousi shuongeibü haibü mang haoeneibü heangsho thedanga lengtian phokulabü, hoba kaneibü losilak kaneibü lemshang kaijembo tekteksousou phokulabü.

⁶Kaneibü lemshon hoba khübeibü heangsho shuong netla yeiko phetnyinlabü, kaneibü jenjuok lemshon lusaklabü, hoba kanei kümenbü khümbomeiko kuan aplabü lele Israeleibü sangnyu shuong pendou shakkeishakko maulabü.

⁷Pendou aenei mütshuong haitilabü, hoba aoyou jouletlaje haoenei ngo BUNYUBOU kia dogo ngelabü.

⁸“Lausikei müt atje ngei in ka satentilabü hoba phangshuong yoto aatilabü,

⁹khonei haoen langsenbüa kilabü. Khünei haoenei ngo damenlabü hoba ngei haoen shieikoea hoba himou bautia dogo ngelabü, aieilausi haoeneibü maangalanbü maangponei ngo inletkei hoba haoenei kü toje heangsho to aei dühkei. Hobaje haoenei haoen lolo haoeneibü nyekei mangsenlabü pendou haoenei kümbü hapan amaibü shuong shanga haoen lolo himouko damlabü.

¹⁰Hobaje haoenei ngo BUNYUBOU dogo ngelabü; ngei jim akibüa khonkuei ühütlen dogo haoenei ngela shanga ngei haoen to lenkei.”

¹¹Thükenbou BUNYUBOUei hai lauda, “Israel phangeibü amaibü hoba mangsenlabü kümsilei pendou haangjung kaibü ik ipashi, hoba kaibü you jemashi, hoba ‘Ügütü!’ dogo ngekashi; aishanga haoen inei, mühsinouei hoba limsilangei tuonglabü.

¹²Saabüa kibü shuong limei hailabü, hoba nyangbüa kibü shuong inei tuonglabü hoba jouan hoba saten- an kibü shuong mühei shemlabü. Kho tegütham ngei ngeibü khauang maangpok haoen thüka dantilabü.

¹³Hobaje ladang haoen haitibü müt haoeneibü heangsho yoa, lemshang kaijembo shonghshou suokbü thüka, shonghkhu pendou thüka hoba haoeneibü lemshon pendoua ponlem teibü lemshang bulong sangtüngbü phang weko hoba yik shangtüngtham kibü yembulong phang wekoa haplaje, kheijinei haoenei ngo BUNYUBOU ki dogo ngelabü.

¹⁴Hobaje ngei haoen thükto ik shinglabü hoba kaonyek kho yam ka Ribla sühko, Israelbü kishang kaoen che ongkei ajoutiko sangliphang la yeitilabü. Kheijinei müt pendouei ngo BUNYUBOU kia dogo ngelabü.”