Read Chang Naga EZEKIEL 7 Bible Online

EZEKIEL 7 - Chang Naga bible

EZEKIEL 7

¹Nyibou BUNYUBOUeibü ngüh kü jungto loukei:

²“Müteibü shou, Thükenbou BUNYUBOUei Israel kaonyek to ho hai lauda: Thonbü! Kaonyu chemnyek lei pendou thükto thonbü che lousüha.

³“Tou ka thükto thonbü louakei, hoba ngei ngeibü khauang longbü ka thükto lottilabü. Ngei no kaibü kümsilei thüng no matjemlabü, hoba kaibü mangsenlabü kümsilei pendou ngei ka la kungailabü.

⁴Ngei ka to aphokeilabü ayingsi onou alenlabü. Lausikei kaibü amaibü lamnyu shuong, hoba kaibü mangsenlabü kümsilei shuong ka la kungailabü. Kheijinei kanei ngo BUNYUBOU ki dogo ngelabü.”

⁵Thükenbou BUNYUBOUei hai lauda, “Maangshat che thükto maangshat che louada!

⁶Thonbü che louan apa! Thonbü che loua! Ho kakhu limbo louda, chühashi, kho louada!

⁷O kaonyeka kibü shuong, ka la sühbü thonbü jih che louakei. Jihsiphai lousüha, chalou nyangko kia; lemshang shongh thüka olinyobü ayingko panglangbü ong ki.

⁸“Tongde ngeibü khauang ka la yeian jinkulabü. Ngei nyi kümbü thüng kaibü mat jemlabü, hoba kaibü mangsenlabü kümsilei thüng ngei ka la kungailabü.

⁹Ngei ka to aphokeilabü ayingsi onou alenlabü. Lausikei kaibü amaibü shuong, hoba kaibü mangsenlabü kümsilei shuong ka la kungailabü. Kheijinei kanei ngo BUNYUBOU ki dogo ngelabü.”

¹⁰“Chühashi, chalou kho lousüha! Ho louan apa! Leilubü tangto lousheda, yonglambü tongbü khida hoba lilibü kho bunga!

¹¹Maanga yambü amaibü shieikoelabü julo la yeiakei; mütli yo ka aokei ajoulabü, haoen yo ka yingasikei ayingsi haoeneibü keisiyaang, haoeneibü nyenhang ayingsi haoeneibü soneikangbü ajoulabü.

¹²“Jihsiphai lousüha, chalou nyangko loua. Jekbou teolin, ayingsi yakbou tengang, aishanga mütshang khümbo thükto maangshat ki.

¹³Aishanga ham lang kishongko yakbouei haoei ai yaakkei kho nyibou ühüpmailabü, aishanga mütshang khümbo shangabü mangsang kho üeisheilabü. Haoeneibü shabü haangjung aoeikei jembü langkei senetan apholabü.

¹⁴Haoenei teklaang metsikei hoba pendou lamleasikei, aokei lason to ohaulabü, aishanga ngeibü maangshat mütshang khümbo thüka ki.

¹⁵“Tangaenei in, hoba maang- aenei hailabü shatsinyat hoba mühsinou ki; aoyou khongthua ki hao inei hailabü, hoba aoyou sangnyua ki, haoen mühsinou hoba limsilangei suilabü.

¹⁶Lausikei aoyou ong khübü ka satenlaje haoen shongha yo kabü jemau phatko kilabü. Haoen pendou mütpem weko lulueibü shabü shanga haapyoko shailabü.

¹⁷Mütpem wekoeibü ik hau thetlabü hoba youkük pendou hau akiko dei tegü yeilabü.

¹⁸Haoenei senounei neilabü, hoba haoen pendoua hatbüei lühlabü. Haoeneibü khu shuan aplabü, haoeneibü thenyek himouei yukleplabü.

¹⁹Haoenei haoeneibü chandinam si hon asaopobü peisilei che tegütham khonga tekan aplabü. BUNYUBOU khauang maangpok jihsiphaia haoeneibü chandinam si honei haoen akhümenlabü. Haoenei jembü senyühshemtila ayingsi shi shentila khübü peisilei akhamlabü, aishanga khübüei haoen shabüa phaiyetkei.

²⁰Haoeneibü hemaibü namseklaangei haoen yonglamlabü ong yeitikei hoba haoeneibü mangsenlabü heangsho hoba lejim akibü noksa shuong khüka yaükei. Hibü ngei khübü kho haoen shanga asao- pobü peisilei la yeitikulabü.

²¹“Hobaje ngei khübü kho küksithang la koktilabü hoba kaodaka amaibü shuong la solangtilabü, hoba kho haoenei shatilabü.

²²Haoen ka ngei thenyek sepeilabü, hoba haoenei ngeibü huphang thanshang shatilabü hoba soshau soyungbü shuong khüto atlabü hoba kho shatilabü.

²³“Yangmen lamleashi, aishanga kaodak sii phinko ngühkhüm leilubüei shenakei, hoba ikshatyobüei sangnyu shen- akei.

²⁴Hibü ngei phang amaiboutham leibalabü, hoba khübüei haoeneibü chemsibung lean aplabü. Ngei hauki yaangkibü lilisese thonshang to loutilabü, hoba haoeneibü lemshang shatilabü.

²⁵Ladang leilubü loulaje haoenei sangmai lamlabü, lausikei ladangkei akilabü.

²⁶Thushed thükto thushed ngühphakphak thükto ngüh- phakphak loulabü. Haoenei thusei mangsang lamlabü, lausikei ungshedbou ka lenbü ngühkhüm hoba jaishou shuong ka songsido kubü dankhümlabü.

²⁷Chobaei mang haaplabü, hoba leiyeibü shuongei lulu lolo maangkhu yuibü neisimei lelabü hoba kaodakbü mütshuongeibü ik lühlabü. Ngei haoeneibü kümsilei thüng haoen to kümlabü, hoba haoeneibü matjem thüng haoen to mat jemlabü. Kheijinei haoenei ngo BUNYUBOU ki dogo ngelabü.”