Read Chang Naga EZEKIEL 8 Bible Online

EZEKIEL 8 - Chang Naga bible

EZEKIEL 8

¹Po lakboubü lit lakboubü, chalou ngaobounyeta ngo ngeibü chema hoba Jihudabü jaishou shuong kü thedanga setan kijinei Thükenbou BUNYUBOUeibü ik kü thükto loukei.

²Kheijinei ngei chühkei, hoba chühsi müt phatbü mangsang che hapbei. Hao chühla shenjang ka jaüan youae wan tegü, hoba haoeibü shenjang ka thükae kho lailaitham mangh shoubü nam tegü kikei.

³Hobaje haoei ik phatbü che longtikei hoba ngeibü khua khulou shen chenei japbei. Hobaje kho mangsanga Mühghaü Soushouei ngo kaodak si khuthük kanglang to tonenkei, hoba Jerusalem to leilangkei. Haoei ngo Mühghaü khauang longtibou heangsho kishang Lembüchem maangkabou shemjang to atbü yungkük bakhün aeto leilangkei.

⁴Hobaje chühashi, Israelbü Mühghaü soneikangbü ngei Kebar Shumanga hapbü hesihaang phatko hanei hapbei.

⁵Mühghaüei kü to laukei, “Müteibü shou, yungkük aeto chühashi.” Hibü ngei chühkei, hoba yungkük bakhün to atshanga lemshon nyangko Mühghaü khauangtibou heangsho kho ngei hapbei.

⁶Hobaje haoei kü to laukei, “Müteibü shou, haoenei kümbo kibü nyi hapataoba lo? Israel mütliei ngo ngeibü saopobü kaoen ka aei aei saabou shian sattiko hanei mangsenlabü yaang kümbo kibü khüto chühashi.”

⁷Hobaje haoei tangkabü shemjang koukhün khüto ngo leian haukei, hoba kümthanga khün yetbü che kü la haptikei.

⁸Haoei kü to laukei, “Müteibü shou, tou kümthang kho thunyinashi.” Hobaje ngei kümthang kho thujung atkei hoba koukap che hapbei.

⁹Hobaje haoei kü to laukei, “Atashi hoba haoenei khünei amaibü mangsenlabü kümbü khüto chühashi.”

¹⁰Hibü ngo atkei hoba chühkei, hoba ngei khonei shanbü yangsikok phang weko hoba mangsenlabü meisiau hoba Israelbüei jungeibü heangsho pendou kümthang kaijembo küman kikei.

¹¹Hobaje haoen thedanga Israelbü chung jaishou shuong müt anjinlei hoba haoen yoa Shafaneibü shou Jaazaria yoan kikei. Mütpem weko lulueibü ika jen juokbü phau jungan loan kikei, hoba ponlem hilabü wankhük sangmei kho angko kikei.

¹²Mühghaüei kü to phekei, “Müteibü shou, Israelbü chung jaishou shuongei huphanga kümbo kibü kho hapdalao? Haoen mütpem wekoei lulueibü heangshoei shenbü shemjanga lemda. Aishanga haoenei lauda, ‘BUNYUBOUei kün ühüpda, BUNYUBOUei kaodak inleda.’ ”

¹³Kheijinei BUNYUBOUei kü to laukei, “Nyi haoenei ho to aeibü mangsenlabü kümbo haplabü.”

¹⁴Hibü haoei ngo BUNYUBOUeibü chem yungkük bakhün to atshang aeto leian haukei, hoba khünei yaksa shuong Tammuz mühghaü haibü shanga haapbo setan haptikei.

¹⁵Haoei kü to laukei, “O müteibü shou, nyi ho hapdalao? Nyi habü ho to aeibü mangsenlabü shuong haplabü.”

¹⁶Hobaje haoei BUNYUBOUeibü chem shemjang maangkabou to ngo leian atkei hoba chühashi, lemshang chem koukhün junga chemsophanga hoba lemshang kanglanga müt saoto ngao thüng haoeneibü takphai BUNYUBOUeibü lembü chem ae yeikuan hoba haoeneibü thenyek chanyu angbou ae yeian kikei, hoba haoenei chaangbou chanyu to lembo kikei.

¹⁷BUNYUBOUei kü to laukei, “Müteibü shou, nyi ho hapdalao? Jihudabü chung shanga hanei haoenei kümbo kibü mangsenlabü shuong ho kümsilei songokbü sai? Haoen ik shatyobüei kaodak shena hoba ngo nyibou khau angtilabü lele maangto shattilep lo? Haoenei haoeneibü kungkhün to bubhek attibü to chühashi!

¹⁸Hibü ngeikei haoen to khauangko jungeilabü; ngei haoen ajoutilabü ayingsi haoen to onouko adamlabü. Haoenei ngeibü noukhüna ngekasikei ngei haoen to aditkulabü.”