Read Chang Naga DANIEL 1 Bible Online

DANIEL 1 - Chang Naga bible

DANIEL 1

¹Jihudabü Choba Jehoakim songdakbü po semboubüa Babilonbü Choba Nebukhadnezzar Jerusalem to loukei hoba haoei shikei.

²Hobaje Mühghaü chema kibü thungsiphau at yoan BUNYUBOUei hao la Jihudabü Choba Jehoakim kukei, hoba haoei khübü kho Shinar kaodak to haoeibü mühghaü chem to jungan haukei; hoba haoei thung si phau shuong kho haoeneibü mühghaü lemshanga phokei.

³Hobaje sungphatbü mütshuong thüka leiyeibou Ashpenaz to Israelbü shousi shuong at, khei Choba chempen hoba yaangenbüeibü shousi at leiba dogo Chobaei hao to laukei.

⁴Khei nali athebü heshou süngsilop maibü songadoa shetenbü, hapbü ngebüa maangli maangsang hoba pithen bouthen ditenbü, hoba Choba chema lola mubü hoba haoen la Khaldibüeibü ngühyem hoba dobüshibü lenla thükbü yingjan.

⁵Hobaje haoen shanga chalou angbou Chobaeibü shausi- yung maibü hoba haoei yungbü ih kula Chobaei sakkukei hoba haoen po sem pangteijan hoba thonla haoen Choba thedanga lojan.

⁶Khübü yoa Jihudabü phang ka Daniel, Hanania, Mishael hoba Azaria kikei.

⁷Hobaje sungphatbü mütshuong yo kabü bunyuei haoen la nyen nyenkukei. Daniel la haoei Belteshazar nyenkukei, hoba Hanania la haoei Shadrak hoba Mishael la Meshak hoba Azaria la Abednego dogo nyenkukei.

⁸Lausikei Danielei haoeibü maanga Chobaeibü shausiyung maibü ayingsi haoeibü ih yungbüei hao lolo ashalabü dogo janthetkei; hibü haoei sungphatbou müt bunyubou to haoei hao lolo ashala shanga sukeijakei.

⁹Hobaje Mühghaüei sungphatbou müt thedanga Danielei maangshik hoba onou haptikei.

¹⁰Hobaje sungphatbou müt bunyubouei Daniel to laukei, “Ngei ngeibü bunyu Choba aoei kan la shaula hoba yungla sakkukei hao to hatda; aila kaneibü thenyek kan himshuong toje amaibou hao la haptila? Khei yingalonga kanei Choba thed- anga ngeibü khu thusheda phokuda.”

¹¹Kheijinei ikjaibou ao Daniel, Hanania, Mishael hoba Azaria thüka sungphatbou müt bunyubouei pienkei hao to Danielei laukei,

¹²“Chalou annyet shanga khangenbü shuong to takteiashi, shaula pikshik hoba yungla dei labü.

¹³Kho phaia ka junga küneibü thenyek hoba Chobaeibü shausiyung maibü shaubü heshou shuong thenyek chühyoshi, hoba ka la maibü che no khangenbü shuong to jungeishi.”

¹⁴Hibü kho shanga haoei haoen to ngüha lekei, hoba chalou an haoen takteikei.

¹⁵Hobaje chalou an thonan Chobaeibü shausi- yung maibü shaubü heshou pendou tokei haoen chühlalela hesihang maibou hoba phe netbou kikei.

¹⁶Hibü ikjaibouei haoen la shausiyung maibü hoba haoenei yungbü ih aku lausikei pikshik shausiyung kukei.

¹⁷Tou khübü heshou müt lei shanga Mühghaüei haoen la hapbü ngebü hoba ditenbü pendoua songbüdobü kukei, hoba mangsang hoba manghlibü pendoua Daniel ditenbou kukei.

¹⁸Hobaje haoen leian loula Chobaei takletbü chalou sühbüa sungphatbü mütshuong yoa BUNYUBOUei Nebukhadnezzar Choba thedang to haoen leian loukei.

¹⁹Hobaje Chobaei haoen to joyokei, hoba haoen yoa Daniel, Hanania, Mishael hoba Azaria, tegübü ao akitei; hibü haoen Choba thedanga lokei.

²⁰Hobaje Chobaei laobou songsido hoba ditenbü kümsilei shanga ong phekei, haoeibü sanglea thulenbü hoba huonseibü pendou tokei phejan anei haoen maibou hapbei.

²¹Hobaje Sairas Choba shaangboubü po sühko athakko kikei.