Read Chang Naga DANIEL 12 Bible Online

DANIEL 12 - Chang Naga bible

DANIEL 12

¹“Kho chaloua thükkabou hangangbü Maikhel lolabü. Haoei kaibü mütli shousi shuong shanga loda. Hobaje phang che kisilengko ka ladangkei kian achühbü khonku jih che kilabü hoba kho chaloua lea nyen doan kibü mütpem weko kaibü mütli shuong khümenlabü.

²Hobaje kaoa yepan kibü juong pilabü, at ponpen langkei to hoba at himou hoba ponpen thon akibü mangsenlabü to langngailabü.

³Hobaje aoyou songsido ki haoen mühloma soneikangbü tegü haulabü hoba aoei saopobü to juong se- peitilaje haoen khanshoulitshou tegü ponpen thon akiko kilabü.”

⁴“Lausikei, O Daniel, ngüh shuong kho khinlepnyu phoashi, hoba thonbü chalou asühshongko le kho khanglepnyu khinan phoashi, aishanga müt juongnyu hau longei dogo laangyolabü hoba songsido haalabü.”

⁵Kheijinei ngo Danielei chühkei, hoba chühashi, lubü müt nyi lokei, che hi yungkoa hoba che thi yungkoa.

⁶Hobaje shushou dei thükaenei kibou phembanei neibou to ngei laukei, “Habü maang- panglabü shuong thon sühla lalokche kila?”

⁷Kheijinei müt ao phembanei neian shushou dei thükaenei kikei, haoei haoeibü maeae hoba nanae khuthük ae shingkei hoba ao ponpen lang kida hao nyen phongko thekeilankei. “Kho jih che, jih nyi, hoba jih tho che, kilabü dogo laukei, hoba ladang haoen saopobü mütshuongeibü hau haoei netla yeiko leilukulaje khübü pendou thonlabü.”

⁸Hobaje ngei ditkei, lausikei aditen, kheijinei ngei laukei, “O ngeibü bunyubou, khübü kümsilei loushedbü kho ai yingla?”

⁹Hobaje haoei laukei, “Daniel, kaibü lamnyu to hauashi, aieilausi ngüh shuong kho küpa hoba thonbü asühshongko khinlepa.

¹⁰Juongnyu haoen lolo hinseilabü hoba haoen lolo thupailabü hoba saüenan kilabü; lausikei amaibü shuongei amaiko kümlabü, aoeikei aditenlabü, lausikei aoyou songsido ki haoenei ditenlabü.

¹¹“Athakko juokbü lembü sungan apbü jih ka hoba leilutibü mangsenlabü laobou kishanga phobü jih sühko chalou hajar che, saoanto anjinngao kilabü.

¹²Chalou hajar che saongao sem hoba khujinto ngao aoei haisühlaje hoba sühlaje hao haübou!

¹³“Lausikei no kaibü lamnyua thon asüh shongko hauashi, aishanga no haksojan, hoba chalou shuong thonbüa kaibü phejan penbü kaoena lojan.”