Read Chang Naga DANIEL 2 Bible Online

DANIEL 2 - Chang Naga bible

DANIEL 2

¹Nebukhadnezzarei songdakbü po nyiboua Nebukhadnezzarei mangh likei hoba haoeibü soushou khonsakkei hoba nyeket alou.

²Kheijinei Choba la haoeibü mangh lenla shanga thulenbü, huonseibü shuong, manghtakbü shuong, seibüyaübü shuong hoba Khaldibü ngala Chobaei ngühkhüm kukei. Hibü haoen lotan Choba junga lokei.

³Hobaje Chobaei haoen to laukei, “Ngei mangh che lia, hoba mangh kho ngela kü soushou khonsakda.”

⁴Kheijinei Khaldibü shuongei Aramaika Choba to laukei, “O Choba, salangko kishi! No khangenbü shuong la kaibü mangh lenshima, hoba künei tetlabü kho lenlabü.”

⁵Chobaei Khaldibü to jongaiko laukei, “Ngeibü ngüh ho tükde kia, kanei kü la mangh kho alenen longa hoba khoeibü tetlabü angeti longa kan netla yeiko wapettilabü, hoba kaneibü chem odlanotla yeitilabü.

⁶Lausikei kanei ho mangh hoba tetlabü lenena longa kü ka kanei jongsak, mu hoba nyenhang yaang haplabü; hibü kü la mangh si tetlabü kho lenashi.”

⁷Nyiboukei haoenei jongaiko laukei, “Chobaei haoeibü sambü shuong la mangh kho lenashi hoba künei tetlabü lenlabü.”

⁸Chobaei jongaiko laukei, “Kanei jih pailetla haujemda dogo ngei maisho ngeakei, aieilausi ngeibü ngüh ho tükde kia dogo kanei ngekei.

⁹Lausikei kanei kü la mangh kho alen longa kan shanga ngühkhüm che ong kia, aishanga jeileibü che longla hai- yeiko kanei amlang ngüh kü to laula lamlekei, hibü kü la mangh kho lenbü, hoba kanei tetlabü lenenkei dogo ngei ngelabü.”

¹⁰Khaldibüei Choba to jongaiko laukei, “Chobaei phebü onlanglabü lele songsido kibü müt che ongkei kaodaka aki; aishanga Choba latetche yaangbü hoba hau kibü yinglaje yingasikei ho tegü thulenbü, huonseibü, manghtakbü ayingsi seibüyaübü Khaldibü to ladangkei phean achüh.

¹¹Chobaei kümsilei sekbü che pheda hoba kho mühghaü shuong aoyou müt yoa akida haoen to liman Choba to lenla athük.”

¹²Khoei Choba aeibou maangto shatkei hoba maangpokkei, hoba Babilonbü hapbü ngebü pendou mautila ngühkhüm kukei.

¹³Hibü songbüdobü shuong kho haitijan dogo ngühkhüm kho pendou ae phinthonkei, hoba haoenei Daniel hoba haoeibü thangbou shuongkei haitila lambei.

¹⁴Kheijinei Chobaeibü lombou leiyeibou Ariok, ao Babilona songbüdobü shuong haitila hauan kikei, hao to Danielei songsido kiko hoba ngühmaanglanko jongaibü kukei.

¹⁵Chobaeibü leiyeibou Ariok to haoei laukei, “Chobaeibü ngühkhüm kho aila kheinyu kaangkei?” Ladang Ariokei ho shangabü shaknyinan Daniel to lenkei,

¹⁶Daniel tongde atkei, hoba Choba to hao la jih kushi dogo sukeijakei hoba haoei Choba la tetlabü kho kulabü dogo laukei.

¹⁷Kheijinei Daniel haoeibü chem to ngaikei, hoba ho shangabü haoei haoeibü jenabou, Hanania, Mishael hoba Azaria to lenkei.

¹⁸Hobaje kho huphang ngüh shanga Daniel hoba haoeibü youjambü shuong Babilonbü songbüdobü shuong yoa amautila haoenei khuthük Mühghaüeibü onou phela shanga ngetikei.

¹⁹Kheijinei nangnak mangsanga huphang ngüh kho Daniel jungto tang khitkei.

²⁰Danielei laukei, “Ponpen thon akibü Mühghaü nyen haübou yingshi! Aieilausi songsihon hoba hau hao shangabü ki.

²¹Haoei jihsiphai hoba poang hongjih jeileikuda. Haoei Choba shuong sungan apda hoba Choba shuong phongaida; songbüdobü la haoei songsido kuda hoba ditenbü la haoei hapbü ngebü kuda.

²²Haoei haoeneibü huphang kümsilei shuong tang khittida; nakthüh phanga ai ki haoei ngekei, hoba ngesakbü hao yoa kia.

²³O no ngeibü pisiboueibü Mühghaü, Ngo kato olinda hoba no sangda. Nyi songsihon hoba hau kü la kukei, hoba tou künei kaka ai hikei nyi kü la ngetikei; aishanga Choba shanga nyi kü la ngetikei.”

²⁴Hibü Babilona hapbü ngebü mautila Chobaei pienbou Ariok jungto Daniel atkei; hao hauan hao to laukei, “Babilonbü hapbü ngebü temauti, ngo Choba jungto leian atkai, hoba ngei Choba la tetlabü kho lenlabü.”

²⁵Kheijinei panteiko Choba jungto Ariokei Daniel leian atkei, hoba hao to ho tegü laukei, “Langsenbü Jihudabü shuong yoa Choba la tetlabü ngetilabü ngei müt che hapakei.”

²⁶Daniel aoeibü nyen Belteshazar nyenan kikei hao to Chobaei laukei, “Ngei laobou mangh hapbei hoba khoeibü tetlabü nyi kü la lenla thüklep lo?”

²⁷Danielei Choba to jongaiko laukei, “Hapbü ngebü, manghtakbü, khopjikseibü, seibüyaübü, huonseibü ayingsi, khanshoulitshou tetenbü aoeikei Chobaei khangbü huphang ngüh kho alenen.

²⁸Lausikei huan kibü tang khittibou khuthüka Mühghaü che kia, hoba haoei ho phaia ai yingla kho Nebukhadnezzar la ngetia. Kaibü mangh hoba mangsang kaibü shen thüka kaibü khu aenei habü ho kia.

²⁹“Choba, ka jungto no shena lengan kijinei loulabü jihsiphaia ai yingla dambü loukei, hoba aoei huan kibü tang khittida haoei ai haüthükla kho ka la ngetikei.

³⁰Lausikei kü shangaje khei lubü müt pendou toje ngeibü songsido aei kibü shanga ho huphang ngüh ho kü la tang khittikei aying, lausikei tetlabü kho ka la ngetila hoba kaibü maangpon dambü shuong nyi ngela shanga ki.

³¹“O Choba, nyi hapbei, hoba chühashi, heangsho yaangbunyu che kikei. Kho heangsho aeibou yaangbü hoba yongko soneikangko kikei, hoba ka thedanga lokei, hoba khoeibü hesihang hatlamoklabü che.

³²Kho heangshoeibü khu kho hon hinseibü kikei, haoeibü khukhu hoba ikshon chandinam kikei, haoeibü shimung hoba haoeibü youshi chisaknam kikei.

³³Haoeibü you namkungnam, haoeibü youdem pheiche nam hoba pheiche shungkungtham.

³⁴Nyi khüto chühko kijinei ik ayoko thüngenbü laang cheei haoeibü youdem pheiche nam hoba pheiche shungkungtham dogo kibü khüto kakkei hoba khübü kho netla yeikei.

³⁵Kheijinei namkung, shungkungtham, chisaknam, chandinam hoba hon liko netla yeiko phetnyinkei, hoba sulang amshang kabü youshou sho tegü yeikei, hoba yeiei khübü kho soulangkei hoba haoen kishang ühüpbo apbei. Lausikei heangsho kühnyinkubü laang kho shongh yaangbü che la yeikei hoba kaodak pendou shenkei.

³⁶“Mangh kho ho kikei, hoba tou künei Choba la tetlabü kho lenlabü.

³⁷No, O Choba, Choba shuong thüka Choba, aola khuthükbü Mühghaüei sei, hau hoba soneikangbü kukei.

³⁸Hobaje lanei ong müteibü shousi shuong ki, yamkabü meisiau hoba mühkabü au haoei kaibü ik to kukei khübü pendou thüka ka la songdaktikei, honeibü khu kho no ki.

³⁹Ka phainei ka to hanshangbou sangle che longlabü hoba semboubü chisaknam sangle cheei kaodak pendou thüka songdaklabü.

⁴⁰Hobaje leiboubü sangle kho namkung tegü hau kiko kilabü; aieilausi namkungei peisilei pendou ngümnyinkuda; hoba namkungei peisilei pendou ngünnyinkubü tegü, haoei khei netla yeiko leilutikulabü hoba ngünnyinkulabü.

⁴¹Hobaje nyi youdem hoba youbem pheiche chak yaübüeibü shungkungtham hapbü tegü kho janyinbü sangle che yeilabü, lausikei nyi shungkungtham yoa namkung kheiyoan hapbü tegü khonei namkung kaangbü maibü atje kilabü.

⁴²Lausikei youdem pheiche namkung hoba shungkungtham kibü tegü sangle kho pheiche hau akibü kilabü.

⁴³Hobaje nyi namkung shungkungtham totbü yoa kheiyoan hapbü tegübü kho haoen laolam yaknga soyolabü, lausikei namkung shungkungtham to akhangyobü tegü haoen che la nyatyoan akilabü.

⁴⁴Hobaje khübü Choba shuong chaloua khuthükbü Mühghaüei ladangkei amaubü sangle che huonglabü, ayingsi sangle kho lubü mütli la üpyokulabü, lausikei khoei khübü sangle pendou netla yeiko leilutikulabü hoba mautikulabü hoba kho ponpen loan kilabü.

⁴⁵Khei shongh ka müteibü ik ayoko laang che thüngenbü nyi hapbü tegü hoba khoei namkung, chisaknam, shungkungtham, chandinam hoba hon netla yeiko leilutikubü tegü yaangenbou Mühghaüei ho phaia ai haüthükla kho Choba la ngetia, hoba mangh kho tükde hoba tetlabü maimaitham ki.”

⁴⁶Kheijinei Nebukhadnezzar Chobaei haoeibü the kaoa khüpetkei hoba Daniel to lembei hoba hao la lembü hoba ponlem maibü kula haoen la sakkukei.

⁴⁷Chobaei Daniel to laukei, “Maimaitham kaibü Mühghaüje mühghaü shuong thüka Mühghaü hoba Choba shuong thüka Bunyubou, hoba nyi ho huphang ngüh tang khittisije, hao huan kibü tang khittibou ki.”

⁴⁸Kheijinei Chobaei Daniel thükkabou setshang to angtikei, hoba hao la jongsak yaangbü juong kukei, hoba Babilon provins khümbo thüka songdakbou hoba Babilonbü hapbü ngebü pendou thüka kongnyubou yeitikei.

⁴⁹Kheijinei Danielei Choba to subüjabüei Babilon provinsa songdak kümsilei thüka haoei Shadrak, Mishak hoba Abednego pienkei, lausikei Danielje Chobaeibü chema kikei.