Read Chang Naga DANIEL 3 Bible Online

DANIEL 3 - Chang Naga bible

DANIEL 3

¹Nebukhadnezzar Chobaei honeibü heangsho che kümbei, kho suokla iknop saosem hoba khaang iknop lak, haoei kho Babilon provins Dura pholia lotian phokei.

²Kheijinei Nebukhadnezzar Chobaei yaangenbü shuong, governor shuong, konglebü shuong, matjembü shuong, namthanbü shuong, songsido kubü shuong, nama bunyu shuong, hoba provinsa songdakbü shuong liko kamshaila ngala hautikei.

³Kheijinei yaangenbü shuong, governor shuong, hoba kongnyu matjembü shuong, namthanbü shuong, songsido kubü shuong nama bunyu shuong hoba provins thüka songdakbü shuong pendou Nebukhadnezzar Chobaei phonenbü heangsho saüenshanga kamshaikei, hoba Nebukhadnezzar Chobaei lotibü heangsho thedanga haoen lokei.

⁴Kheijinei Chobaeibü ngühlaubou cheei kaangko ngekkei, “O mütli shuong, phangshuong hoba ngühyem shuong, ho kan la sakkuda.

⁵Laobou chaloua teklaang ngühlang pithung hoba pithung phang juong hoba chia phang pendou ditlaje kanei khüpetlabü hoba Nebukhadnez- zar Chobaei kümbü honeibü heangsho kho lemlabü.

⁶Hobaje aoyouei akhüpetlaje hoba alemlaje kheijinei wan longan kibü wanang to lapan jinkulabü.”

⁷Hibü kho chaloua müt pendouei teklaang ngühlang kongkin hoba chia phang juong ditjinei khüpetkei hoba Nebukhadnezzar Chobaei lotibü honeibü heangsho to lembei.

⁸Hibü kho chaloua Khaldibü at nyangko loukei hoba Jihudabü aweasüngko,

⁹Nebukhadnezzar Choba to haoenei laukei, “O Choba, ponpen lang kishi!

¹⁰O Choba, mütpem wekoei teklaang ngüh, pithung, kongkin phang juong, hoba chia phang juong, hoba chia phang pendou ditjinei khüpetlabü hoba honeibü heangsho to lemlabü dogo nyi ngühkhüm kümbei;

¹¹hoba aoei khü- petan alemlaje wanlong longan kibü wanang jenyu to lapan jinkulabü.

¹²Babilon provinsa songdakbü kümsilei thüka ikjaiko Jihudabü at, Shadrak, Meshak hoba Abednego, nyi pienakei, O Choba, khübü mütshuongei no aweda, ayingsi nyi kümbü heangsho to alemda.”

¹³Kheijinei khau angko hoba maangpok angan Nebukhadnez- zarei Shadrak, Meshak hoba Abednego leian loula sakkukei; kheijinei haoenei khübü mütshuong Choba jungto leian loukei.

¹⁴Nebukhadnezzarei haoen to laukei, “O Shadrak, Meshak hoba Abednego, kanei ngeibü mühghaü to akhangenda ayingsi ngei kümbü honeibü heangsho to alemda dogo laubü kho tükde sai?

¹⁵Tou kanei teklaang, pithung, hoba kongkin phang juong ditjinei ngei kümbü heangsho thedanga khüpetla hoba lemla kanei lamlean kialonga, kho maibou, lausikei kanei alemlonga wanlong longan kibü wananga lapan jinlabü hoba ngeibü ik ka kan khümenlabü mühghaü ao ki?”

¹⁶Shadrak, Meshak hoba Abednegoei Choba to jongaiko laukei, “O Nebukhadnezzar, künei ho shanga ka to jongaila ai kongnyu aki.

¹⁷Chühashi, küneibü Mühghaü, ao künei khangenda haoei wanlong longan kibü wanang ka kün khümenla thükakei, hoba O Choba, haoei kün kaibü ik ka khümenlabü.

¹⁸Lausikei kho khei aying tegükei, O Choba, nyi ho ngeashi, künei kaibü mühghaü akhangenlabü, ayingsi nyi kümbü honeibü heangsho to alemlabü.”

¹⁹Kheijinei Nebukhadnezzar khau aeibou angkei hoba Shadrak, Meshak hoba Abednego khulimbo haoeibü thenyek si sembung aiche tegü jakshaikei, hibü wanlong kho shangiedbü toje nyetneiei aubou yeitishi dogo haoen la sakkukei.

²⁰Hobaje haoei sepai shuong yoa hau kibou müt at to Shadrak, Meshak hoba Abednego khühan wanlong longan kibü wananga lapan jinkula haoei sakkukei.

²¹Kheijinei khübü mütshuong haoeneibü tanga yukbü, mangyuk, khushen hoba manga yukbü hoba neisimei lubü yoan khühkei hoba wanlong longan kibü wanji to lapan jinkukei.

²²Hobaje Chobaeibü ngühkhüm aeibou kaangbü hoba wanlong kho yongko aubü yingsije Shadrak, Meshak hoba Abednego khühbü shuong wan longan kibü wanangei juoketkei.

²³Hobaje khübü müt sem Shadrak, Meshak hoba Abednego khühan wanlong jenyu to attikei.

²⁴Kheijinei Nebukhadnezzar mokkei hoba panteiko lokei, hoba haoei hao phanga songbüdobü shuong to laukei, “Senei müt sem khühan jinkukei aying lo?” Haoenei jongaiko laukei, “Maimaitham, O Choba.”

²⁵Haoei jongaiko laukei, “Chühashi, ngei müt lei sengan wanjia paiko hapda, hoba haoen to ai ayingda, hoba leiboubü kho chühla mühghaü shuongeibü shou che phatko kia.”

²⁶Kheijinei wanlong longan kibü sembung nyangko louan Nebukhadnezzarei joyoko laukei, “Shadrak, Meshak hoba Abednego, kan Thükkabou Mühghaü khangenbü shuong longashi, hoba hato kaiya. Kheijinei Shadrak, Meshak hoba Abednego wanlong jenyu ka longkei!”

²⁷Hobaje songdak kongnyu shuong hoba governor shuong hoba Chobaeibü damanchühbü shuong liko kamshaian khübü müt sem hapbei, hoba haoeneibü manga wanei ai aleko kikei, ayingsi haoeneibü khulou amakko kikei, ayingsi haoeneibü tangkabü neisimei mangyuk ajuok ayingsi haoen to wanmaklüm ongkei ahi.

²⁸Nebukhadnezzarei laukei, “Shadrak, Meshak hoba Abednegoeibü Mühghaü haübou yingshi; aoei hao khangenbü shuong aoyouei hao to maanglembei haoen khümenla haoeibü hang- angbü yantikei hoba haoenei haoeneibü Mühghaü to limbo lubü mühghaü aikei akhangenla ayingsi alemla shanga haoeneibü mang khümbo kuko Chobaeibü ngühkhüm jakshaitikukei.

²⁹“Hibü ngei ngühkhüm che kümda, khei mütli at, phang ayingsi ngühyem laobouei, Shadrak, Meshak hoba Abednegoeibü Mühghaü khulimbo ngüh che ongkei laulaje, netla yeiko wapnyinlabü, hoba haoeneibü chem odsinot shangan phobü tegü yeitikulabü, aishanga ho tegü khümenla thükbü lubü mühghaü aokei aki.”

³⁰Kheijinei Chobaei Shadrak, Meshak hoba Abednego Babilon provinsa setshang thükkabou to angtikei.