Read Chang Naga DANIEL 7 Bible Online

DANIEL 7 - Chang Naga bible

DANIEL 7

¹Babilonbü Choba Belshazzar shaangboubü poa Danielei haoeibü yepshanga mangh che likei hoba mangsang hapbei; kheijinei haoei mangh kho dokei hoba kho shanga ngühnyek kongnyu lenkei.

²Danielei laukei: Nangnak ngeibü mangsanga ngei mühkabü yei pem leiei yungnyu yaangbü thüka souko hapbei.

³Kheijinei yungnyu ka meisiau den lulu pem lei longkei.

⁴Hobaje shaangboubü kho molosaonyu phatko kikei, hoba aulueibü kaak yeman kikei. Hobaje haoei chühko kitoua kaakshuong kho khean apbei, hoba kho kaodak ka tonenkei hoba müt tegü you penyiei lotikei, hoba khola müteibü maangponlang kukei.

⁵Hobaje chühashi, nyiboubü meisiau kho sap che tegü ji pheinei hao tonenan kikei, hoba haoeibü sembunga hauh kaanglanga hiplo sem kikei, hoba hao to laukei, “Piashi, phe juong suiashi.”

⁶Kho phaia ngei chühkei, hoba chühashi, lubü che, kongkhü che taka aueibü kaak lei yeman kikei, toukei meisiau kho la khu pem lei yeman kikei, hoba hao la songdaklabü hau kukei.

⁷Kho phaia nangnak mangsanga ngei chühkei, hoba chühashi, leiboubü meisiau hatlamoklabü che hoba yongko sekokbü hoba kho la nameibü hauh yaangbünyu kikei, khoei suikei hoba netla yeiko jitnyinkukei hoba joubü kho youei nakeikei. Hobaje thedangtobü meisiau pendou dokei ho phang che kikei, hoba kho la laang an yeman kikei.

⁸Ngei laang shuong khüto chühko kisi, chühashi, khübü yoa laang lubü hanbü che longkei, laobou thedanga shaangbou laang pensem kho li yoan lühan apbei hoba chühashi, kho laanga müteibü nyeklang tegü hoba ngüh atshaibü laubü sembung kikei.

⁹Ngei chühko kijinei Choba setshang shuong kho phokei, hoba jaishou che setkei haoeibü neisimei ninthu tegü thupaibü hoba haoeibü khua khulou wi hinseibü tegü thupaibü kikei, haoeibü Choba setshang wanlong tegü hoba khoeibü kailong you wanlong longbü wan tegü kikei.

¹⁰Hobaje waneibü shumang che koukei hoba hao thedanga koukei, hajar hajarei hao khangenkei hoba hajar anei hao thedanga lokei, matjemla lamlekei; hoba le shuong ipbei.

¹¹Laang khoei ngüh atshaibü lausije ngei chühko kikei, hoba ngei chühko kitoua meisiau kho haitikei hoba mautikei, hoba hao kho wanei juokla aku shongko ngei chühkei.

¹²Joubü meisiau shuong khoeije haoeneibü songdak jungan satkei, lausikei haoen jih tuisho shanga lang phokukei.

¹³Kheijinei nangnak mangsanga ngei chühkei, hoba chühashi, müha sangmeia müteibü shou che phatko loukei hoba haoei shangiedbü chalou jungto loukei hoba hao jungto hao leian louan phokukei.

¹⁴Hobaje mütli shuong, phang shuong, hoba ngühyem shuong pendouei hao khangenla hao la songdakla hoba soneikangbü hoba Choba sangle kukei, haoeibü songdak kho pon- pen thon aki, ladangkei adanlabü hoba haoeibü sangle kho maula athük.

¹⁵Ngo Daniel je, kü to soushou khonsakko kikei, hoba ngeibü khua mangsangei ngo mokde apyotikei.

¹⁶Nyangko loan kibü che jungto ngo nyangko haukei, hoba kho pendou shangabü phekei. Hibü haoei kü to lenkei, hoba khübü tetlabü kü la ngetikei.

¹⁷“Khübü meisiau yaangbü pemlei kho kaodaka longlabü Choba lei ki.

¹⁸Lausikei Thükkaboueibü saopobü shuongei sangle kho sungletlabü, hoba ponpen shanga sangle kho lelabü, khei ponpen thon akiko.”

¹⁹Kheijinei meisiau leiboubü laobou haoen pendou tokei phangche kikei, yongko hatlamoklabü, aoeibü hauh namkung hoba iksen chisaknam kikei, laobouei suian netla yeiko leilutikukei hoba haoeibü youei nakeikei kho shanga tükdebü kho ngemang sühko ngei phekei.

²⁰Hobaje haoeibü khua laang an kibü shanga hoba lubü laang che louan laobou thedanga sem kho kakan apbei, nyek yembü laang, hoba ngüh atshaibü laubü sembung laobou chühla lubü toje yaangbou kikei, kho shanga phekei.

²¹Hobaje ngei chühko kijinei kho laangei saopobü shuong to wapyokei hoba haoen kho thükkei.

²²Lausikei shangiedbü mütshuong louan Thükkaboueibü Saopobü shuong shanga matjembei hoba saopobü shuongei sangle lela jih sühkei.

²³Haoei hai laukei, “Meisiau leiboubü kho kaodaka Choba sangle leiboubü kilabü; ho sangle pendou toje phangche kilabü hoba khoei kaodak pemtou suilabü hoba kho nakan yantilabü, hoba kho netla yeiko leilutilabü.

²⁴Laang an shangabü kho hai, kho sangle ka Choba an longlabü, hoba haoen phainei lubü che longlabü hoba shaangbü toje hao phangche yinglabü hoba haoei Choba sem yantilabü.

²⁵Hobaje Thükkabou khulimbo haoei ngüh laulabü hoba Thükkaboueibü sao- pobü shuong haoei khonkutilabü hoba haoei jih hoba ngühkhüm jeileila huon taklabü hoba haoen jih che, jih penyi hoba jih thoche shanga kulabü.

²⁶Lausikei matjembü kilabü hoba haoeibü songdak sunglanglabü, mautikulabü hoba thon sühko leilutikulabü.

²⁷Hobaje Choba sangle, songdak, hoba mühnyu phanga kaodak khümbo sangle shuong, yaangenbü kho Thükkaboueibü Saopobü shuong la kulabü, haoeneibü sangle kho ponpen thon akibü sangle hoba songdakbü pendouei hao to khangenlabü hoba ngüha lelabü.”

²⁸Ho thonbü. Ngo Danielje, aeibou senyüh pipikei, hoba ngeibü son jeikei; lausikei ajanjan pendou kho ngeibü maanga phokei.