Read Chang Naga DANIEL 9 Bible Online

DANIEL 9 - Chang Naga bible

DANIEL 9

¹Medebü phang Ahasairaseibü shou Dairas shaangboubü poa ao Khaldibü sangle thüka Choba pentian kikei,

²haoeibü songdak shaangboua ngo Daniel, Jeremia thuseibou to BUNYUBOUei Jerusalem leilutila po lühbak tang khittibü le shuong ka ngei ditenkei, kho po anjinlei.

³Hibü ngei welaubü hoba subüjabüei mühei nyengko hoba senounei neian, hoba tap naangko ngo BUNYUBOU Mühghaü jungto ngeibü thenyek sepeikei.

⁴Hobaje BUNYUBOU ngeibü Mühghaü to ngei welaukei, hoba shedbü thekuko laukei, “O BUNYUBOU, yaangenbou hoba soumo hatlabü Mühghaü, ka to sanoubü hoba kaibü ngüh jungeibü to nyi kaibü thebülanbü hoba üeisanou lenda.

⁵“Künei shed shona hoba mashika, hoba maangkombo küma hoba lenbü adit, khei kaibü ngühkhüm ka hoba kaibü songle ngühkhüm ka sepeian apa.

⁶Hobaje no khangenbü thuseibü shuong aoyouei kaibü nyena küneibü Choba shuong songdakbü shuong hoba pisibousi shuong to hoba kaonyek kabü müt pendou to joyokei, haoen to künei ngüha ale.

⁷O BUNYUBOU, ngühmai kaibü ki, lausikei tat kibü tegü Jihudabü Jerusalema kibü shuong hoba Israelbü pendou nyi shian apbü kaonyek pendoua nyangbüa kibü hoba saabüa kibü haoen kakhu limbo ngühkhüm leilubü haangjung kün shanga himou ong ki.

⁸O BUNYUBOU, künei kakhu limbo shed shonsije kün shanga, küneibü Choba shuong shanga, küneibü yaangenbü shuong shanga hoba küneibü pisibousi shuong shanga himouei sühda.

⁹BUNYUBOU küneibü Mühghaüeibü üeisanou hoba ap apbubü kia, aieilausi künei hao khulimbo meimeikei.

¹⁰BUNYUBOU küneibü Mühghaüei kün thedanga hao khangenbü shuong hoba thuseibü shuong danko haoeibü ngühkhüma paila ngabü ngüha ale.

¹¹Haü, Israelbü pendouei ngühkhüm leilua hoba kaibü ngüh aditko sepeian apa, hibü shedsikhau hoba theletbü laobou Mühghaü khangenbü Mosa ngühkhüma doan phokukei kho shedsikhau kün la khüpan jinkua, aishanga künei no khulimbo shabü shona.

¹²Kün khulimbo hoba kün thüka aoyouei songdaka haoen khulimbo haoei laubü kün to thushed yaang loutibüei haoei song lena aishanga mühnyu phanga Jerusalem to kümbü tegü aküm.

¹³Mosaeibü ngühkhüma doan kibü tegü kho thushed pendou kün to süha, khei yingasikei küneibü shedbü ka sepeinyu hoba kaibü ngühmaia maangsangko künei BUNYUBOU küneibü Mühghaü üeisanou alam.

¹⁴Hibü BUNYUBOUei thushed lamlean phokukei hoba kho kün thükto sungbakei aishanga BUNYUBOU küneibü Mühghaüei haoeibü kümsilei pendoua ngühmai kümda, hoba künei haoeibü ngüha ale.

¹⁵“O BUNYUBOU, küneibü Mühghaü, aoei hau kibü ikei Ijep kaodak ka ka mütli leian loukei, hoba tat kibü tegü kaibü nyensang sungbakei, künei shed shona; künei maangkombo küma.

¹⁶O BUNYUBOU, kaibü saopobü kümsilei pendou tegü kaibü khauang longbü hoba no maang- pokbü kaibü sangnyu Jerusalem kaibü saopobü shongh ka sepeinyu ngaitiashi dogo ngei ka to sudajada; aishanga küneibü shabü haangjung hoba pisiboueibü shedbü haangjung kün kaijembo kibü pendou thedanga Jerusalem hoba kaibü mütli shuong shed himoulabü ngühli che yeia.

¹⁷Hibü tou, O küneibü Mühghaü, no khangenboueibü welau hoba subüjabü ditashi, hoba kaibü nyen shanga ongkei, O BUNYUBOU, leiluan kibü kaibü lemshang to kaibü thenyekei hauan yantishi.

¹⁸O ngeibü Mühghaü, kaibü nou haangkushi hoba ditashima, kaibü nyek ipashi, hoba kün sangliphanga kibü hoba kaibü nyena ngabü sangnyu to chühshima, aishanga kün saopobü shanga ka thedanga sudajada aying, lausikei kaibü onou yaangbü kibü shanga sudajada.

¹⁹O BUNYUBOU, ditkushima O BUNYUBOU, shedbü apbushima, O BUNYUBOU, maangkuashi hoba kümashi, O ngeibü Mühghaü, kaibü nyen shanga ongkei tephai; aishanga kaibü sangnyu hoba kaibü mütli kaibü nyenei ngaakei.”

²⁰Ladang ngo joyoko kikei, hoba ngeibü shabü hoba kü mütli Israeleibü shabü thekuko welauko kikei, BUNYUBOU ngeibü Mühghaü junga ngeibü Mühghaü saopobü shongh shanga sukojako kikei.

²¹Ngei tokei welauko joyoko kijinei Gabriel, ao shaangla mangsanga ngei hapbei, hao chasem lembü jihsiphaia panteiko kü jungto seengjung loukei.

²²Hobaje haoei kü la ditentila loukei, hoba kü to joyoko laukei, “O Daniel, ka la hapbüngebü hoba ditenbü kula tou ngo louakei.

²³Kaibü subüjabü khanglamto sakkubü che loukei, hoba ngei ka la lenla loukei, aieilausi no aeibou sanoubou ki; hibü ngüh kho damanchühshi, hoba maangsangko ditenashi.

²⁴“Ngühkhüm lulimbü nangla, shabü khüai shonla, shed shonbü angla, ponpen thon akibü saopobü leiyetla, mangsang si thusei ngüh khinan phola hoba saopobü kishang onang naangko pienla kaibü mütli shuong shanga hoba kaneibü saopobü sangnyu shanga bale anjinlei wean phokuakei.

²⁵Hibü ngeashi hoba ditenashi, Jerusalem kümetlabü hoba nyibou kümetla sakkubü ngüh haubü ka naangenko pienbü Chobaeibü shou loubü sühko bale nyet kilabü, kho phaia bale saosemto nyi khongnyu hoba phaseibü yoan khei khonsak khonku jiha kho kümetkei.

²⁶Hobaje mangsang thonbüa bale saosemto nyi phaia naangenko pienbou kho wapan aplabü hoba ai akilabü hoba loula kibü Chobaeibü shoueibü eikshuongei sangnyu hoba lemshang kho leilutilabü hoba haoeibü thonbü kho yungsenei kilabü hoba thon sühko wapyo kilabü; sangliphanga kilabü kho lamlea.

²⁷Hobaje juong to bale che shanga haoei kaangkhühtham theyolanyobü kümlabü; hoba bale tho che kho juokbü lembü si lemla kubü nangtilabü, hoba mangsenlabü shuong jeiko leilubü theletan kibü thon asühshongko leilutibou thükto khüpan jinkulabü.”