Read Chang Naga HOSEA 1 Bible Online

HOSEA 1 - Chang Naga bible

HOSEA 1

¹Uzzia, Jotham, Ahaz hoba Hezekia Jihudabü Choba shuong hoba Israelbü Choba Jehoasheibü shou Jeroboam haanga Beerieibü shou Hosea jungto loubü BUNYUBOUeibü ngüh.

²Ladang BUNYUBOUei shaangla Hosea to joyokei, BUNYUBOUei Hosea to laukei, “Hauashi, hoba ka shanga pejapelabü yaksa ngaashi, hoba pejapelabü shousi shuong bukashi, aieilausi BUNYUBOU ka bangan kaonyekei pejapela yaang jungeia.”

³Hibü haoei hauan Diblaimeibü nouyangshou Gomer yakla ngakei hoba sao mang akongko yeikei, hoba hao la bousu shou che bukkukei.

⁴Hobaje BUNYUBOUei hao to laukei, “Haoeibü nyen Jezreel nyenkushi; aishanga kho longche ong kian Jehueibü chemdang thük to Jezreeleibü sii shanga ngei phok lamlabü, hoba Israel chemdang sangle ngei thontilabü.

⁵Hobaje kho chaloua ho haüthüklabü, khei Jezreel pholia ngei Israeleibü laujin leilutikulabü.”

⁶Hobaje sao nyibou mang akongko apbei hoba yaksa shou che bukkei. Hobaje BUNYUBOUei hao to laukei, “Saoeibü nyen Lo-Ruhama nyenkushi, aishanga ngei Israel chemdang thük to hansho ongkei ap akulabü lele touje sanoudambü akilabü.

⁷Lausikei Jihudabü chemdang thük to üeisanou kilabü, hoba BUNYUBOU haoeneibü Mühghaüei haoen khümenlabü, lausikei laujinei, inei, lasonei, koli ayingsi koli sepai shuongei haoen akhümenlabü.”

⁸Tou Lo-Ruhamaei nyueibü sen apan phaia sao mang akongko apbei hoba bousu shou che bukkei.

⁹Hobaje BUNYUBOUei laukei, “Haoeibü nyen Lo-Ammi nyenshi, aishanga kan ngeibü mütli aying, hoba ngo kaneibü Mühghaü ayinglabü.”

¹⁰Khei yingasikei Israel shousi shuong lühbak atakenbü hoba aweenbü molo phetsen tegü kilabü, hoba ho haüthüklabü, “Kan ngeibü mütli aying” dogo laulabü jeiko “Kan langkibü Mühghaü shousi shuong” dogo nyenlabü.

¹¹Hobaje Jihuda shousi shuong hoba Israel shousi shuong liko kamshailabü hoba haoenei lei- yeibü che pienlabü hoba kaonyek ka longlabü aieilausi Jezreeleibü chalou yaangbü kilabü.